ການາດາປະເທດທຳອິດໃນໂລກ ອະນຸມັດໃຫ້ສັກໄຟເຊີໃນເດັກອາຍຸ 12-15 ປີ
ກະຊວງສາທາລະນະສຸກຂອງການາດາຖະແຫລງໃນວັນທີ 5 ພຶດສະພາ 2021 ວ່າ: ໄດ້ອະນຸມັດໃຫ້ມີການໃຊ້ວັກຊີນປ້ອງກັນໂຄວິດ-19 ຂອງໄຟເຊີ ໄບໂອເອັນເທັກ ໃນເດັກທີ່ມີອາຍຸລະຫວ່າງ 12-15 ປີແລ້ວ ຫລັງຈາກການກວດສອບແລ້ວພົບວ່າ: ວັກຊີນດັ່ງກ່າວມີຄວາມປອດໄພ ແລະ ມີປະສິດທິພາບໃນການປ້ອງກັນການຕິດເຊື້ອໂຄວິດໃນເດັກອາຍຸ 12-15 ປີ.
ຂະນະທີ່ ຄະນະກຳມະການອາຫານ ແລະ ຢາຂອງອາເມລິກາ ກຽມຈະອະນຸມັດໃຫ້ໃຊ້ວັກຊີນດັ່ງກ່າວໃນເດັກໄວດຽວກັນໃນມໍ່ໆນີ້.
ຂະນະທີ່ມີລາຍງານອີກດ້ານໜຶ່ງ ລະບຸວ່າ: ການາດາ ພົບຜູ້ເສຍຊີວິດຄົນທີ 3 ຈາກຜົນຂ້າງຄຽງຫລອດເລືອດອຸດຕັນ ເຊິ່ງເກີດຂຶ້ນຫລັງຈາກໄດ້ຮັບວັກຊີນຂອງແອສຕຣາເຊນເນກາ ໂດຍຜູ້ເສຍຊີວິດເປັນຜູ້ຊາຍອາຍຸປະມານ 60 ປີ ຢູ່ແຂວງບຣຸນສະວິກ. ສ່ວນຫົວໜ້າທີ່ອາວຸໂສດ້ານສາທາລະນະສຸກແຂວງບຣຸນສະວິກ ຢືນຢັນວ່າຈະຍັງໃຊ້ວັກຊີນຂອງແອສຕຣາເຊນເນກາຕໍ່ໄປ ເພາະກໍລະນີຫລອດເລືອດອຸດຕັນນັ້ນ ຍັງຖືເປັນເລື່ອງທີ່ພົບໄດ້ຍາກ ແລະ ມີຄວາມສ່ຽງສູງຕໍ່ການເຈັບເປັນ ແລະ ເສຍຊີວິດຫລາຍກວ່າ ຖ້າບໍ່ໄດ້ຮັບການສັກວັກຊີນ.
ຂະນະທີ່ ກ່ອນໜ້ານີ້ ມີລາຍງານຜູ້ເສຍຊີວິດໃນລັກສະນະດຽວກັນຢູ່ແຂວງອັລເບີຕາ ແລະ ແຂວງຄວິເບກ.
ກ່ອນໜ້ານີ້ ລັດຖະບານການາດາ ສັ່ງຊື້ວັກຊີນເຂົ້າໄປສັກໃຫ້ປະຊາຊົນ 10 ລ້ານກວ່າໂດສ, ແຕ່ການກະຈາຍວັກຊີນເຮັດໃຫ້ຊັກຊ້າ ເນື່ອງຈາກຄວາມຊັກຊ້າໃນຂັ້ນຕອນການລົງທະບຽນ.
ສຳລັບຜູ້ຕິດເຊື້ອໃນການາດານັ້ນ ມີຍອດສະສົມທັງໝົດ 1 ລ້ານ 2 ແສນ 5 ໝື່ນຄົນ ແລະ ກວ່າ 20% ຂອງຈຳນວນດັ່ງກ່າວເປັນຜູ້ທີ່ອາຍຸຕໍ່າກວ່າ 19 ປີ. ຂະນະທີ່ມີຜູ້ເສຍຊີວິດຈາກໂຄວິດແລ້ວ 24.000 ກວ່າຄົນ.
