Pfizer ສ້າງລາຍໄດ້ໄຕມາດ 1 ປີ 2021 ຈາກຍອດຂາຍວັກຊີນໂຄວິດ 3,5 ພັນລ້ານໂດລາ

ວັນທີ 5 ພຶດສະພາ 2021, ໄຟເຊີ ອິງ ບໍລິສັດຢາສັນຊາດອາເມລິກາ ເປີດເຜີຍຜົນການດຳເນີນງານລາຍໄດ້ ແລະ ກຳໄລປະຈຳໄຕມາດ 1/2021 ເຊິ່ງຫລາຍກວ່າທີ່ນັກວິເຄາະຫລາຍຄົນເຄີຍຕີລາຄາໄວ້ ໂດຍຕົວຂັບເຄື່ອນຫລັກມາຈາກຍອດຂາຍວັກຊີນໂຄວິດ-19 ທີ່ເຮັດຮ່ວມກັບໄບໂອເອັນແທັກ.

ໄຟເຊີ ລະບຸວ່າ: ໃນໄຕມາດນີ້ ບໍລິສັດສາມາດສ້າງລາຍໄດ້ 1,46 ໝື່ນລ້ານໂດລາສະຫະລັດ ເຕີບໃຫຍ່ 45% ຈາກໄຕມາດດຽວກັນກັບຊ່ວງປີກ່ອນ. ຂະນະທີ່ນັກວິເຄາະວໍສະຕຣີດຕີລາຄາໄວ້ວ່າ: ໄຟເຊີຈະມີລາຍໄດ້ໄຕມາດນີ້ 1,35 ໝື່ນລ້ານໂດລາ.

ທັງນີ້, ປັດໄຈຂັບເຄື່ອນລາຍໄດ້ໃຫ້ໄຟເຊີໃນໄຕມາດນີ້ຄືຍອດຂາຍວັກຊີນໂຄວິດ-19 ທີ່ສາມາດສ້າງລາຍໄດ້ເຖິງ 3,5 ພັນລ້ານໂດລາ ຫລື ເກືອບໜຶ່ງໃນສີ່ຂອງລາຍໄດ້ທັງໝົດ.

ໄຟເຊີ ລະບຸອີກວ່າ: ວັກຊີນອາດຈະຍັງເປັນທີ່ຕ້ອງການໄປອີກຫລາຍປີ ແລະ ຈະເປັນແຫລ່ງລາຍໄດ້ທີ່ຍືນຍົງໃຫ້ບໍລິສັດຕໍ່ໄປ ໂດຍບໍລິສັດຄາດວ່າຈະມີການເຊັນສັນຍາເພີ່ມອີກກັບອີກຫລາຍປະເທດໃນປີນີ້ ແລະ ຍັງຢູ່ລະຫວ່າງການເຈລະຈາກັບອີກຫລາຍປະເທດສຳລັບການໃຊ້ວັກຊີນໃນປີ 2022 ແລະ ຕໍ່ຈາກນັ້ນ.

ອ້າງອີງ:

https://www.reuters.com/…/pfizer-lifts-annual-sales…/