ກຳປູເຈຍ ມີຜູ້ຕິດເຊື້ອໃໝ່ 938 ຄົນ ສູງເປັນປະຫວັດການ
ໜັງສືພິມ ເຄີແມ ເມື່ອວັນທີ 5 ພຶດສະພານີ້ ໃຫ້ຮູ້ວ່າ ເຈົ້າໜ້າທີ່ສາທາລະນະສຸກ ກຳປູເຈຍ ພົບເຫັນຜູ້ຕິດເຊື້ອໃໝ່ເພີ່ມຕື່ມ 938 ກໍລະນີ ໃນວັນທີ 4 ພຶດສະພາໃນວັນດຽວ ເຮັດໃຫ້ຕົວເລກຕິດເຊື້ອສະສົມເພີ່ມຂຶ້ນເປັນ 16.300 ຄົນ.
ນະຄອນຫຼວງພະນົມເປັນ ຍັງເປັນຈຸດຮ້ອນກວ່າໝູ່. ໃນຮອບ 24 ຊົ່ວໂມງທີ່ຜ່ານມາ ເຈົ້າໜ້າທີ່ສາທາລະນະສຸກພົບເຫັນຜູ້ຕິດເຊື້ອໃໝ່ 608 ຄົນ, ຖັດຈາກນັ້ນກໍແມ່ນແຂວງ ກັນດາ ມີຜູ້ຕິດເຊື້ອໃໝ່ 175 ຄົນ ແລະ ແຂວງ Preah Sihanouk 77 ຄົນ. ຜູ້ຕິດເຊື້ອທັງໝົດແມ່ນມີປະຫວັດພົວພັນກັບເຫດການຈັດງານບຸນໃນລະຫວ່າງເດືອນກຸມພາທີ່ຜ່ານມາ.
ທ່ານ ດອກເຕີ Hok Kim Cheng ກະຊວງສາທາລະນະສຸກກຳປູເຈຍ ຢືນຢັນວ່າ ສາເຫດຂອງການກວດພົບເຫັນຜູ້ຕິດເຊື້ອໃໝ່ຫຼາຍຂຶ້ນ ກໍເນື່ອງຈາກວ່າເຈົ້າໜ້າທີ່ສາທາລະນະສຸກ ກຳປູເຈຍ ໄດ້ເພີ່ມເຄື່ອງກວດຫາເຊື້ອແບບໄວ ຊຶ່ງສາມາດກວດພົບເຊື້ອພາຍໃນ 15 ນາທີ.
ສ່ວນຫຼາຍແມ່ນພົບເຫັນຜູ້ຕິດເຊື້ອຢູ່ໃນຊຸມຊົນເຂດສີແດງ ໝາຍຄວາມວ່າ ເຂດທີ່ມີການລະບາດສູງ. ຫຼາຍກວ່າ 10% ຂອງຜູ້ກວດຫາເຊື້ອໃນເຂດສີແດງ ແມ່ນຕິດເຊື້ອທັງນັ້ນ. ພວກເຮົາກຳລັງຂະຫຍາຍການກວດຫາເຊື້ອຢູ່ໃນເຂດດັ່ງກ່າວຕໍ່ໄປ. ການປິດເມືອງເປັນເວລາ 3 ອາທິດທີ່ຜ່ານມາ ມັນບໍ່ພຽງພໍໃຫ້ແກ່ການກວດຫາເຊື້ອຢູ່ໃນເຂດສີແດງນັ້ນໄດ້ທັງໝົດ ແຕ່ຢ່າງໃດກໍຕາມ ຍັງຈະໄດ້ສືບຕໍ່ກວດຫາເຊື້ອຕໍ່ໄປ.
