ຫວຽດນາມ ສົ່ງແພດຫມໍ 35 ທ່ານ ແລະ ອຸປະກອນການແພດມາຊ່ວຍລາວ ຕ້ານ ການແຜ່ລະບາດຂອງພະຍາດໂຄວິດ-19

ພິທີຕ້ອນຮັບຄະນະຊ່ຽວຊານ ແລະ ແພດຫມໍ ສສ ຫວຽດນາມຈຳນວນ 35 ທ່ານ, ພ້ອມອຸປະກອນການແພດຈຳນວນຫລາຍເຊັ່ນ: ເຄື່ອງຊ່ວຍຫາຍໃຈ 200 ເຄື່ອງ, ທາດຂ້າເຊື້ອພະຍາດ ຈຳນວນ 10 ໂຕນ, ຜ້າອັດປາກ-ດັງ 2 ລ້ານອັນ ແລະ ເງິນສົດ ຈຳນວນ 5 ແສນ ໂດລາສະຫະລັດ, ມາຊ່ວຍລາວເພີ່ມຄວາມເຂັ້ມແຂງໃນ ຕ້ານການ ລະບາດຂອງພະຍາດໂຄວິດ-19 ໄດ້ມີຂຶ້ນໃນວັນທີ 4 ພຶດສະພານີ້ ທີ່ສະຫນາມບິນ ສາກົນວັດໄຕ,ນະຄອນຫລວງວຽງຈັນ , ໂດຍການເຂົ້າຮ່ວມຂອງ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ໂຕແອັງຢຸງ ຮອງລັດຖະມົນຕີ ກະຊວງການຕ່າງປະເທດ ສສ ຫວຽດນາມ.
ໃນໂອກາດດັ່ງກ່າວ, ທ່ານ ຮອງນາຍົກລັດຖະມົນຕີ ກິແກ້ວ ໄຂຄໍາພິທູນ ໄດ້ຕາງໜ້າໃຫ້ ພັກ, ລັດຖະບານ ແລະ ປະ ຊາຊົນລາວ ສະແດງຄວາມຂອບໃຈເປັນຢ່າງສູງ ໄປຍັງພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງ ທີ່ຍາມໃດກໍມີຄວາມ ເປັນຫ່ວງເປັນໄຍ ແລະ ໃຫ້ການຊ່ວຍເຫລືອອັນລ້ຳຄ່າແກ່ ພັກ, ລັດຖະບານ ແລະ ປະຊາຊົນລາວ ຕະຫລອດມາ.
ການຊ່ວຍເຫລືອໃນຄັ້ງນີ້, ໄດ້ ສ້າງຂວັນກໍາລັງໃຈອັນ ໃຫຍ່ຫລວງ ແລະ ເພີ່ມກໍາລັງແຮງ ໃຫ້ແກ່ບັນດາແພດໝໍຂອງລາວ ທີ່ມີຈຳນວນຈຳກັດ ຊຶ່ງພວມລັງເຮັດວຽກ ດ້ວຍ ຄວາມມານະອົດທົນ ເບິ່ງແຍງປິ່ນປົວຜູ້ຕິດເຊື້ອ ທີ່ມີຈຳນວນເພີ່ມຂຶ້ນໃນທຸກມື້. ພ້ອມເປັນຂວັນ ກໍາລັງໃຈອັນປະເສີດ ໃຫ້ແກ່ຄົນເຈັບທີ່ກຳລັງປິ່ນປົວຢູ່ໃນໂຮງໝໍຕ່າງໆ ໃນຂອບເຂດທົ່ວປະເທດ. ສິ່ງເຫລົ່ານີ້,ສະແດງໃຫ້ເຫັນເຖິງນໍ້າໃຈເອື້ອເຟື້ອເພື່ອແຜ່ ຂອງສະຫາຍຫວຽດນາມອ້າຍນ້ອງທີ່ມີ ຕໍ່ລາວບົນຈິດໃຈສາຍພົວພັນມິດຕະ ພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມື ຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຫວຽດນາມ ໃຫ້ນັບມື້ນັບແຕກດອກອອກຜົນຫງອກງາມຍິ່ງໆຂຶ້ນ.
ກ່ອນໜ້ານີ້, ໃນປີ 2020 ສປປ ລາວ ກໍໄດ້ຮັບການຊ່ວຍເຫລືອຈາກ ຫວຽດນາມ ມາແລ້ວ ເຊິ່ງເປັນການຊ່ວຍເຫລືອທີ່ທັນການ ແລະ ມີປະສິດທິຜົນທີ່ສຸດ ຊ່ວຍໃຫ້ ສປປ ລາວ ສາມາດຄວບຄຸມການແຜ່ລະບາດຂອງເຊື້ອພະຍາດໂຄວິດ-19 ໄດ້ເປັນຢ່າງດີ.