ນາງ ຈິນນາລີ ນໍລະສິງ ຄວ້າຕຳແໜ່ງມີສແກຣນລາວຄົນທຳອິດ
ການແຂ່ງຂັນງານປະກວດ ມີສແກຣນ ລາວ 2017, ຊຶ່ງຈັດຂຶ້ນເປັນຄັ້ງທຳອິດໃນຄໍ່າຄືນຂອງວັນທີ 15 ກໍລະກົດນີ້, ທີ່ສູນການຄ້າລາວ-ໄອເຕັກ ນະຄອນຫລວງວຽງຈັນ ແລະ ຜູ້ຊະນະເລີດຄອງຕຳແໜ່ງດັ່ງກ່າວແມ່ນນາງ ຈິນນາລີ ນໍລະສິງ (ຟ້າໃສ) ໝາຍເລກ MG19 ໄດ້ຮັບມົງກຸດເພັດມູນຄ່າ 50 ລ້ານກີບ, ສາຍສະພາຍໄໝເງິນ, ເງິນສົດ 100 ລ້ານກີບ, ທຶນການສຶກສາ 100 ລ້ານກີບ, ຄອມພິວເຕີໂນດບຸກ 1 ເຄື່ອງ, ຮອງອັນດັບທີ 1 ແມ່ນນາງ ພູນຊັບ ພົນໂຍທາ (ມິມີ່) ໝາຍເລກ MG13 ໄດ້ຮັບສາຍສະພາຍໄໝເງິນ, ເງິນສົດ 30 ລ້ານກີບ ແລະ ຮອງອັນດັບທີ 2 ແມ່ນນາງ ຈິດສະດາ ວົງໄຊສະຫວາດ (ມຸກ) ໝາຍເລກ MG16 ໄດ້ຮັບສາຍສະພາຍໄໝເງິນ, ພ້ອມເງິນສົດ 20 ລ້ານກີບ, ຮອງອັນດັບທີ 3 ແມ່ນນາງ ນິດາກອນ ຈັນດາລາສານ (ແອນນີ້) ໄດ້ຮັບສາຍສະພາຍໄໝເງິນ, ພ້ອມເງິນສົດ 10 ລ້ານກີບ, ຮອງອັນດັບທີ 4 ແມ່ນນາງ ແສງສະຫວັນ ສີຫາລາດ (ມູມີ່) ໄດ້ຮັບສາຍສະພາຍໄໝເງິນ, ພ້ອມເງິນສົດ 8 ລ້ານກີບ.
ງານດັ່ງກ່າວຈັດຂຶ້ນເພື່ອເປັນການຄົ້ນຫາຕົວແທນຊາວໜຸ່ມຍິງທີ່ມີຄຸນສົມບັດ ແລະ ຄວາມງາມ, ຄວາມຮູ້ຄວາມສາມາດ ແລະ ການປະພຶດຕົນທີ່ດີໃນສັງຄົມ ເພື່ອເປັນຕົວແທນຂອງແມ່ຍິງລາວໄປປະກວດໃນເວທີລະດັບສາກົນ ກໍຄືມີສແກຣນ ອິນເຕີເນເຊິນເນລ ໃນທ້າຍເດືອນຕຸລານີ້, ທີ່ປະເທດຫວຽດນາມ, ໂດຍໜ້າທີ່ຂອງມີສແກຣນ ແມ່ນຈະໄດ້ຮັບຜິດຊອບວຽກງານທາງດ້ານສັງຄົມ, ພ້ອມທັງກ້າວເຂົ້າສູ່ວົງການບັນເທິງໃນອະນາຄົດນຳອີກ.
ເຂົ້າຮ່ວມງານປະກວດດັ່ງກ່າວມີທ່ານ ອາລຸນໄຊ ສູນນະລາດ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ, ທ່ານ ສະຫວັນຄອນ ຣາຊ ມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ມີທ່ານ ຫົງຄຳ ສຸວັນນະວົງ ເລຂາທິການຊາວໜຸ່ມປະຊາຊົນ ປະຕິວັດລາວ, ປະທານບໍລິສັດ ທີວີລາວ, ທັງເປັນປະທານໂຄງການປະກວດມີສແກຣນ ລາວ 2017, ມີທ່ານ ນະວັດ ອິນສະລະໄກສິນ ປະທານອົງກອນມີສແກຣນ ອິນເຕີເນເຊີນເນລ ແລະ ມວນຊົນເຂົ້າຮ່ວມເປັນຈຳນວນຫລາຍ.
