ເຊື້ອໄວຣັສໂຄວິດ-19 ກາຍພັນ ສາຍພັນອິນເດຍ ແຜ່ລະບາດຕໍ່ເນື່ອງ ມາເລເຊຍພົບຜູ້ຕິດເຊື້ອຄົນທຳອິດແລ້ວ
ວັນທີ 3 ພຶດສະພາ 2021, ສະຖານະການການແຜ່ລະບາດຂອງໂຄວິດ-19 ພາຍໃນອິນເດຍ ສົ່ງຜົນໃຫ້ເກີດການກາຍພັນຂອງເຊື້ອໄວຣັສ ເກີດເປັນສາຍພັນອິນເດຍ (B.1.617) ໂດຍຜົນການສຶກສາເບື້ອງຕົ້ນລະບຸວ່າ: ສາມາດແຜ່ກະຈາຍເຊື້ອໄດ້ງ່າຍຍິ່ງຂຶ້ນ, ແອນຕິບໍດີກວດຈັບ ແລະ ຕ້ານເຊື້ອໄວຣັສໄດ້ຍາກຍິ່ງຂຶ້ນກວ່າເຊື້ອໄວຣັສສາຍພັນດັ້ງເດີມ. ຫລ້າສຸດແຜ່ລະບາດຕໍ່ເນື່ອງ ພົບຜູ້ຕິດເຊື້ອແລ້ວຢ່າງໜ້ອຍໃນ 26 ປະເທດທົ່ວໂລກ.
ໂດຍ Adham Baba ລັດຖະມົນຕີສາທາລະນະສຸກມາເລເຊຍ ເປີດເຜີຍວ່າ: ມາເລເຊຍພົບຜູ້ຕິດເຊື້ອໂຄວິດ-19 ກາຍພັນ ສາຍພັນອິນເດຍຄົນທຳອິດຂອງປະເທດແລ້ວ ເປັນຊາວອິນເດຍທີ່ຫາກໍເດີນທາງກັບຈາກປະເທດຕົ້ນທາງ ກວດພົບຢູ່ຈຸດຄັດກອງ ໃນສະໜາມບິນນາໆຊາດນະຄອນຫລວງກົວລາລຳເປີຂອງມາເລເຊຍ ຫລັງປະກາດຫ້າມຖ້ຽວບິນຈາກປະເທດອິນເດຍ.
ຈາກການຕິດຕາມສະຖານະການການແຜ່ລະບາດຂອງເຊື້ອໂຄວິດ-19 ກາຍພັນຂອງ GISAID ລາຍງານວ່າ: ລາຍງານຜູ້ຕິດເຊື້ອ B.1.617 ສູງເຖິງ 833 ຄົນໃນອິນເດຍ, ຮອງລົງມາແມ່ນອັງກິດ 523 ຄົນ ແລະ ອາເມລິກາ 208 ຄົນ. ຂະນະທີ່ອາຊຽນມີພຽງກຳປູເຈຍ ແລະ ມາເລເຊຍທີ່ພົບຜູ້ຕິດເຊື້ອຄົນທຳອິດແລ້ວ ມີຜູ້ຕິດເຊື້ອສາຍພັນອິນເດຍສະສົມປະເທດລະ 1 ຄົນ.
ອ້າງອີງ:
- https://www.reuters.com/world/india/malaysia-reports-first-case-indian-covid-19-variant-2021-05-02/
- https://www.gisaid.org/
- https://www.thestar.com.my/aseanplus/aseanplus-news/2021/05/02/cambodia-bans-frozen-meat-imports-from-india-over-covid-19
- https://www.cgtn.com/special/Latest-on-COVID-19-pandemic.html
