ສ້າງຄວາມເຂົ້າໃຈ: ສັກວັກຊີນບໍ່ໄດ້ໝາຍຄວາມວ່າ ຈະບໍ່ຕິດເຊື້ອ ຫລື ບໍ່ແຜ່ເຊື້ອ ແຕ່ຊ່ວຍຫລຸດຄວາມຮຸນແຮງ

ໝໍຍົງ ສ້າງຄວາມເຂົ້າໃຈ ສັກວັກຊີນແລ້ວບໍ່ໄດ້ໝາຍຄວາມວ່າຈະບໍ່ຕິດເຊື້ອ ຫລື ບໍ່ແຜ່ເຊື້ອ ພຽງຫລຸດອາການຂອງພະຍາດ ເຊິ່ງຊີ້ວ່າ: ສັກໃຫ້ກຸ່ມໄວແຮງງານບໍ່ຊ່ວຍຫລຸດການລະບາດຂອງພະຍາດ, ແຕ່ຕ້ອງສັກໃຫ້ກຸ່ມສ່ຽງ ເພື່ອຫລຸດການນອນໂຮງໝໍ ແລະ ຫລຸດການເສຍຊີວິດ.

ຫົວໜ້າສູນຊ່ຽວຊານສະເພາະທາງດ້ານໄວຣັສວິທະຍາຄລີນິກ ພາກວິຊາກຸມານເວດສາດ ຄະນະແພດສາດ ຈຸລາລົງກອນມະຫາວິທະຍາໄລຂອງໄທ ອະທິບາຍເຖິງການສັກວັກຊີນໂຄວິດ-19 ໃນການຖະແຫລງຂ່າວຮ່ວມກັບກະຊວງສາທາລະນະສຸກ ເມື່ອວັນທີ 20 ມັງກອນ 2021 ວ່າ: ວັກຊີນຈະຕ້ອງສັກໃຫ້ກຸ່ມໃດກ່ອນເປັນອັນດັບທຳອິດວ່າ: ວັກຊີນໂຄວິດ-19 ເປັນວັນຊີນຊະນິດໃໝ່ ເປັນການສຶກສາໃໝ່ ຈາກຜົນການສຶກສາທີ່ຜ່ານມາ ບໍ່ວ່າຈະເປັນວັກຊີນຂອງເຈົ້າໃດ ພົບວ່າຜົນທີ່ຈະແຈ້ງທີ່ສຸດ ວັກຊີນມີປະສິດທິຜົນຄືຫລຸດອາການຂອງພະຍາດ, ຫລຸດການຕາຍ ບໍ່ໄດ້ບອກວ່າ ຫລຸດການຕິດພະຍາດ ຫລື ຫລຸດການເປັນພາຫະຂອງພະຍາດ.

ຫົວໜ້າສູນ ກ່າວວ່າ: ຍົກຕົວຢ່າງວັກຊີນປ້ອງກັນຄໍຕີບ ເມື່ອສັກແລ້ວບໍ່ເປັນພະຍາດ, ແຕ່ຕິດເຊື້ອໄດ້ ແຜ່ເຊື້ອໄດ້ ລັກສະນະດຽວກັນກັບວັກຊີນຊະນິດນີ້ ຂໍ້ມູນທີ່ອອກມາປັດຈຸບັນຄືຫລຸດຄວາມຮຸນແຮງຂອງພະຍາດ, ຫລຸດການບໍ່ຕ້ອງນອນໂຮງໝໍ ແລະ ກໍຫລຸດການຕາຍ ແຕ່ບໍ່ໄດ້ບອກວ່າບໍ່ເປັນພະຍາດ, ພວກເຮົາຈະເຫັນວ່າກຸ່ມທີ່ຮັບວັກຊີນມີອາການປ່ວຍ ແຕ່ມີອາການນ້ອຍ ເມື່ອເປັນແບບນີ້ ກຸ່ມທີ່ຈະຕ້ອງໄດ້ວັກຊີນກໍຄືກຸ່ມສ່ຽງ ທີ່ເປັນແລ້ວມີໂອກາດນອນໂຮງໝໍສູງ ຫລື ໂອກາດຈະເສຍຊີວິດສູງ ແລະ ບໍ່ຕ້ອງສົງໄສວ່າເປັນຫຍັງວັກຊີນຊະນິດນີ້ຈະຕ້ອງໃຫ້ຜູ້ສູງອາຍຸ ຜູ້ທີ່ເປັນແລ້ວຈະເສຍຊີວິດ ຫລື ຜູ້ທີ່ຢູ່ດ່ານໜ້າ ສ່ຽງຕິດພະຍາດ ນັ້ນກໍເພື່ອຫລຸດການສູນເສຍຊັບພະຍາກອນ ຫລຸດການເສຍຊີວິດ.