ຍາມບ້ານເມືອງຖືກວິກິດຈຶ່ງເຫັນເພື່ອນມິດທີ່ແທ້ຈິງ

ໂດຍ:ທິດກໍ່າ

ສະພາບການແຜ່ລະບາຮອບໃໝ່ຂອງໂຄວິດ-19 ນັບແຕ່ຫລັງປີໃໝ່ເປັນຕົ້ນມາ ໄດ້ເຮັດໃຫ້ປະເທດຊາດບ້ານເມືອງຂອງພວກເຮົາຕົກຢູ່ໃນຂັ້ນວິກິດຫລາຍພໍສົມຄວນ ຖ້າທຽບໃສ່ໄລຍະປີ 2019 ແລະ 2020. ອັນສາເຫດກໍຍ້ອນວ່າໃນຊ່ວງໄລຍະສອງປີຜ່ານມານັ້ນ ເຖິງວ່າມີຄົນຕິດເຊື້ອກໍພຽງເດືອນໜຶ່ງສອງເດືອນຈຶ່ງປາກົດມີລາຍໜຶ່ງສອງລາຍທີ່ໄດ້ຕິດໂຄວິດ-19 ໃນທົ່ວປະເທດ. ດັ່ງຕົວເລກໄດ້ຢັ້ງຢືນກ່ອນປີໃໝ່ລາວ ນັບແຕ່ວັນທີ 10 ເມສາ 2021 ຄືນຫລັງຕົວເລກສະສົມຄົນຕິດເຊື້ອໂຄວິດ-19 ພຽງ 60 ຄົນເທົ່ານັ້ນ. ອັນທີ່ພິເສດທີ່ສຸດໃນໄລຍະສອງປີກວ່າຜ່ານມານັ້ນ ແມ່ນຍັງບໍ່ທັນມີຄົນໃດເສຍຊີວິດຍ້ອນ. ນີ້ມັນກໍສະແດງໃຫ້ເຫັນວ່າ ພວກເຮົາຄຸ້ມກັນໃນການປິ່ນປົວໄດ້ດີ ມັນເປັນເລື່ອງວິເສດ ແລະ ໂຊກດີອີ່ຫລີສຳລັບ ສປປ ລາວ ພວກເຮົາ.
ແຕ່ສິ່ງທີ່ບໍ່ຄາດຝັນນັ້ນ ພໍໃກ້ຈະມາຮອດປີໃໝ່ລາວ ໄດ້ມີບັນຫາເກີດຂຶ້ນຕໍ່ບ້ານເມືອງຈົນເປັນເຫດໃຫ້ເຂົ້າສູ່ວິກິດຢ່າງໃຫຍ່ຫລວງ ຖ້າທຽບໃສ່ປີ 2019 ແລະ 2020 ທີ່ຜ່ານມາ ອັນສາເຫດຕົ້ນຕໍເນື່ອງມາຈາກເກີດມີບັນຫາຄົນເຂົ້າ-ອອກຕາມຊາຍແດນລະຫວ່າງປະເທດລາວກັບປະເທດໄທ ໂດຍສະເພາະແມ່ນພວກທີ່ດື້ດ້ານຈັງໄຮໄດ້ນຳເອົາເຊື້ອໂຄວິດ-19 ມາແຜ່ລະບາດຢູ່ລາວຢ່າງຊິ້ນຄິດ ແລະ ໄຮ້ຄວາມປານີ. ໃນໄລຍະຜ່ານມາ ເຖິງວ່າມີການປິດຊາຍແດນເຂົ້າ-ອອກລາວ-ໄທ ແຕ່ກໍຍັງມີແຮງງານລາວຢູ່ໄທໄດ້ກັບຄືນປະເທດຢ່າງຫລວງຫລາຍ ແລະ ລຽນຕິດເຂົ້າໆ-ອອກໆ ທັງຖືກກົດໝາຍ ແລະ ຜິດກົດໝາຍ, ແຕ່ໂຕທີ່ອັນຕະລາຍໜັກໜ່ວງກວ່າໝູ່ກໍແມ່ນຍັງມີບຸກຄົນ, ກຸ່ມຄົນຈຳນວນໜຶ່ງໄດ້ພາກັນວ່າຈ້າງເຮືອນ້ອຍລັກຂ້າມຂອງ ໂດຍບໍ່ຜ່ານການຄັດກອງຈາກເຈົ້າໜ້າທີ່ກ່ຽວຂ້ອງ ຈຶ່ງເປັນເຫດໃຫ້ເກີດມີບັນຫາບານປາຍຂອງການນຳເອົາເຊື້ອພະຍາດໂຄວິດ-19 ເຂົ້າມາແຜ່ລະບາດຢູ່ລາວຢ່າງກວ້າງຂວາງ ແລະ ໜັກໜ່ວງ. ດັ່ງກໍລະນີເອື້ອຍຮັກຂອງນາງ ຕິນ່າ ກັບຄົນໄທສອງຄົນທີ່ໄດ້ລັກລອບເຂົ້າມາລາວແບບຜິດກົດໝາຍ ແລ້ວພ້ອມກັບນາງ ຕິນ່າ ທີ່ຢູ່ວຽງຈັນ ໄດ້ພາພວກກ່ຽວທ່ຽວເລາະໃນຫລາຍຈຸດຢູ່ນະຄອນຫລວງວຽງຈັນໃນຊ່ວງປີໃໝ່ ອັນເປັນເຫດໃຫ້ໂຄວິດ-19 ໄດ້ແຜ່ລາມໄປໃນທົ່ວປະເທດຢ່າງໄວວາ. ຕໍ່ພຶດຕິກຳດັ່ງກ່າວ ພວກເຮົາເຫັນວ່າມັນເປັນການກະທຳທີ່ຝືນຕໍ່ກົດໝາຍບ້ານເມືອງ ແລະ ທັງເປັນການສ້າງຄວາມເສຍຫາຍໃຫ້ແກ່ປະເທດຊາດຢ່າງໃຫຍ່ຫລວງ.
ແນວໃດກໍດີ, ສິ່ງທີ່ມັນເກີດຂຶ້ນນັ້ນມັນກໍໄດ້ເກີດຂຶ້ນແລ້ວ ແລະ ເປັນໄປແລ້ວ, ໃນຂັ້ນຕໍ່ໄປມີແຕ່ພວກເຮົາຕ້ອງຫັນມາສາມັກຄີກັນຕ້ານ, ຄວບຄຸມ ແລະ ຫາວິທີແກ້ໄຂການແຜ່ລະບາດຄັ້ງນີ້ໃຫ້ຫລຸດໜ້ອຍຖອຍລົງ ແລະ ກ້າວໄປເຖິງໃຫ້ໝົດໄປດ້ວຍວິທີຈຳກັດຂອບເຂດການແຜ່ລະບາດດ້ວຍການກັກກັນຕົນເອງຢູ່ບ້ານຢູ່ເຮືອນ, ປະຕິບັດຕາມຄຳສັ່ງເລກທີ 15/ນຍ ຂອງນາຍົກລັດຖະມົນຕີກ່ຽວກັບການປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດໂຄວິດ-19 ນັບທັງປະຕິບັດບັນດາມາດຕະການຕ່າງໆຂອງຄະນະສະເພາະກິດວາງອອກໃຫ້ເຂັ້ມງວດ. ນອກຈາກນັ້ນ ກໍໃຫ້ຂຸ້ນຂ້ຽວໄປສັກຢາວັກຊີນຕາມທີ່ທາງການເພິ່ນໄດ້ຈັດສັນຢູ່ແຕ່ລະບ່ອນໃຫ້ທົ່ວເຖິງ ແລະ ຄົບຖ້ວນ.
ເຖິງຢ່າງໃດກໍດີ, ຜ່ານການລະບາດຂອງພະຍາດໂຄວິດຄັ້ງນີ້ ສິ່ງທີ່ເຮົາເຫັນພາບດີໆທີ່ຄວນຈົດຈຳຕະຫລອດໄປນັ້ນ ແມ່ນນໍ້າໃຈຊ່ວຍເຫລືອອຸປະຖຳຄໍ້າຊູຂອງພີ່ນ້ອງຄົນລາວເຮົາໃນຊາດ ນັບທັງເພື່ອນມິດທັງພາຍໃນ ແລະ ຕ່າງປະເທດ ເປັນຕົ້ນຢູ່ພາຍໃນປະເທດກໍມີຫລາຍບໍລິສັດຫ້າງຮ້ານ ນັບທັງພາກລັດ ແລະ ເອກະຊົນ, ບຸກຄົນ, ນິຕິບຸກຄົນ ຕະຫລອດທັງຄູບາອາຈານໄດ້ເປັນຈິດໜຶ່ງໃຈດຽວກັນປະກອບສ່ວນວັດຖຸເງິນຄຳຕາມສັດທາ ແລະ ຄວາມສາມາດໃນຫລາຍຮູບການ, ຫລາຍວິທີການຊ່ວຍເຫລືອດ້ວຍຄວາມບໍລິສຸດຈິງໃຈ ດັ່ງພວກເຮົາເຫັນໃນແຫລ່ງຂ່າວແຕ່ລະວັນ. ສ່ວນເພື່ອນມິດອ້ອມຂ້າງ ແລະ ສາກົນນັ້ນ ກໍຄົງແມ່ນສະຫາຍ ສປ ຈີນ ອັນເປັນເພື່ອນມິດຮ່ວມຊາຕາກຳອັນດຽວກັນ ແລະ ສະຫາຍຫວຽດນາມ ທີ່ເປັນເພື່ອນມິດຍຸດທະສາດຮອບດ້ານໃນອຸດົມການຕະຫລອດໄປ. ນອກຈາກນັ້ນ ກໍຍັງມີເພື່ອນມິດສາກົນ ແລະ ອົງການຈັດຕັ້ງສາກົນອື່ນໆ ທີ່ໄດ້ຊ່ວຍວັດຖຸເງິນຄຳ, ຍຸກຢາທານັງ ນັບທັງອຸປະກອນຕ່າງໆໃນການຕ້ານໂຄວິດໃນຄັ້ງນີ້ດ້ວຍຄວາມເອົາໃຈໃສ່. ອັນນີ້ລະເພິ່ນວ່າ: ຍາມບ້ານເມືອງເກີດວິກິດກໍຍິ່ງເຫັນເພື່ອນມິດ ແລະ ຍາດມິດສະຫາຍທີ່ແທ້ຈິງ.