ຈົ່ງພ້ອມກັນປະຕິບັດຄຳສັ່ງເລກທີ 15 , ລົງວັນທີ 21 ເມສາ ຂອງນາຍົກໃຫ້ເຂັ້ມງວດ

ໂດຍ: ລູກເມືອງພວນ
ໃນວັນທີ 21 ເມສາຜ່ານນີ້ ທ່ານ ນາຍົກລັດຖະມົນຕີ​ ພັນຄຳ ວິພາວັນ ໄດ້ອອກຄຳສັ່ງເລກທີ 15/ນຍ ວ່າດ້ວຍ: “ການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ,-19”, ມີທັງໝົດ 18 ຂໍ້ດ້ວຍກັນ. ເພື່ອເປັນແຜນຍຸດທະສາດ, ເປັນແນວທາງນະໂຍບາຍ ແລະ ທັງເປັນວິທີການປ້ອງກັນການລະບາດຂອງພະຍາດໂຄວິດ-19 ຢ່າງຮອບດ້ານທີ່ສຸດ.
ຄຳສັ່ງດັ່ງກ່າວ ຊີ້ໃຫ້ພວກເຮົາເຫັນຄວາມອັນຕະລາຍຮ້າຍແຮງຂອງພະຍາດໂຄວິດ, ຜົນກະທົບທີ່ໜັກໜ່ວງຕໍ່ເສດຖະກິດຂອງຊາດ ແລະ ຊີວິດການເປັນຢູ່ຂອງປະຊາຊົນ . ແຕ່ຖ້າທຸກຄົນຫາກບໍ່ໃຫ້ການຮ່ວມໄມ້ຮ່ວມມື, ສະໜັບສະໜູນ ດ້ວຍພຶດຕິກຳຕົວຈິງ ກໍຈະເປັນພຽງຄຳສັ່ງໃນເຈ້ຍໃນສໍຊື່ໆ.
ຜ່ານການຈັດຕັ້ງປະຕິບັດຄຳສັ່ງດັ່ງກ່າວຫລາຍກວ່າໜຶ່ງອາທິດຜ່ານມາ, ໂດຍລວມແລ້ວ ແມ່ນໄດ້ດີສົມຄວນ, ທຸກໆຄົນໃນສັງຄົມ ໄດ້ໃຫ້ການຮ່ວມມືກັບລັດຖະບານເປັນຢ່າງດີ ໂດຍສະເພາະແມ່ນການກັກຕົວຢູ່ໃນບ້ານເຮືອນຂອງໃຜຂອງລາວ, ບໍ່ຊຸມນຸມ ຫຼື ຈັດກິດຈະກຳທີ່ມີຫຼາຍຄົນເຂົ້າຮ່ວມ, ປິດຮ້ານອາຫານ, ຮ້ານບັນເທີງ, ຮ້ານບໍລິການຕ່າງໆ, ປິດດ່ານຜ່ານແດນລະຫວ່າງປະເທດໃກ້ຄຽງທີ່ມີການລະບາດຂອງພະຍາດຮ້າຍແຮງນີ້,ກຳລັງເຈົ້າໜ້າທີ່ໄດ້ເພີ່ມທະວີການກວດກາເວນຍາມຕາມຊາຍແດນຕະຫຼອດ 24 ຊົ່ວໂມງ, ປັບປຸງສະຖານທີ່ກັກກັນ ແລະ ໂຮງໝໍປິ່ນປົວໃຫ້ພຽງພໍ , ກຽມສ້າງໂຮງໝໍພາກສະໜາມ, ເພີ່ມຈຸດກວດຫາເຊື້ອໃນນະຄອນຫລວງວຽງຈັນແລະ ຫຼາຍຄົນໄດ້ຕື່ນຕົວໄປກວດຫາເຊື້ອ ເມື່ອມີການສຳຜັດໃກ້ຊິດກັບກໍລະນີຕິດເຊື້ອ, ຫລາຍຄົນຕື່ນຕົວກັກໂຕເອງຢູ່ໃນບ້ານເຮືອນ, ໃສ່ໜ້າກາກອັດປາກ – ອັດດັງ ແລະ ປະຕິບັດໄລຍະຫ່າງທາງສັງຄົມ, ພ້ອມທັງເລັ່ງສັກວັກຊີນຢ່າງເປັນຂະບວນການກວ້າງຂວາງ…
ແຕ່ເຖິງຢ່າງໃດກໍດີ, ພ້ອມດຽວກັນນັ້ນ ກໍຍັງມີບາງດ້ານບາງບັນຫາທີ່ບໍ່ທັນປະຕິບັດໄດ້ດີເທົ່າທີ່ຄວນ ຊຶ່ງຈະຕ້ອງໄດ້ປັບປຸງແກ້ໄຂໃຫ້ດີຂຶ້ນ, ເປັນຕົ້ນແມ່ນການລັກລອບ ເຂົ້າເມືອງຜິດກົດໝາຍຍັງມີເປັນປະຈຳ ຢູ່ແຕ່ລະເຂດແຂວງ, ເຈົ້າໜ້າທີ່ສາມາດຈັບກຸມໄດ້ຫລາຍກໍລະນີ, ການປະຕິບັດໄລຍະຫ່າງທາງສັງຄົມ ໂດຍສະເພາະແມ່ນຢູ່ຕາມຕະຫລາດ , ຕາມສະຖານທີ່ ສັກວັກຊີນກັນໂຄວິດ-19, ການກວດວັດອຸນຫະພູມ, ການລ້າງມືດ້ວຍເຈວ ໃນສຳນັກງານອົງການທັງພາກລັດ ແລະ ເອກະຊົນຈຳນວນໜຶ່ງ ຍັງປະຕິບັດບໍ່ທັນໄດ້ດີ, ມີບາງບຸກຄົນຍັງບໍ່ສົນໃຈກັບການໃສ່ໜ້າກາກອະນາໄມ , ການກິນຢູ່ຊຸມແຊວເປັນກຸ່ມກ້ອນຢູ່ຕາມເຮືອນຊານບ້ານຊ່ອງຍັງມີໃຫ້ເຫັນຫລາຍ.
ດັ່ງນັ້ນເພື່ອຄວາມປອດໄພຂອງຊາດຈິ່ງຂໍຮຽກຮ້ອງໃຫ້ທຸກຄົນໃນ ສັງຄົມຈົ່ງເປັນເຈົ້າການຮ່ວມໄມ້ຮ່ວມມືກັນຈັດຕັ້ງປະຕິບັດ ຄຳສັ່ງດັ່ງກ່າວໃຫ້ມີປະສິດທິຜົນ ເພື່ອຕ້ານ ແລະ ຕີຖອຍໂຄວິດ-19 ໃຫ້ໝົດໄປຈາກປະເທດລາວເຮົາ.