ການເຈລະຈາສັນຕິພາບຊີຣີຮອບທີ 7 ຫລົ້ມເຫລວອີກ
ການເຈລະຈາສັນຕິພາບເພື່ອຫາແນວທາງຢຸດຕິສົງຄາມກາງເມືອງຊີຣີ ທີ່ຍືດເຍື້ອມາ 6 ປີ ຮອບທີ 7 ຢູ່ນະຄອນເຈນີວາ ອັດລົງໃນວັນທີ 14 ກໍລະກົດ ໂດຍບໍ່ມີຄວາມຄືບໜ້າ.
ສຳນັກຂ່າວຕ່າງປະເທດລາຍງານຈາກນະຄອນເຈນີວາ ປະເທດສະວິດ ໃນວັນທີ 15 ກໍລະກົດນີ້ວ່າ: ການເຈລະຈາສັນຕິພາບຊີຣີ ທີ່ອົງການສະຫະປະຊາຊາດ (UN) ເປັນເຈົ້າພາບ ຮອບທີ 7 ຢູ່ນະຄອນເຈນີວາ ສິ້ນສຸດລົງໃນວັນທີ 14 ກໍລະກົດ ໂດຍບໍ່ມີຄວາມຄືບໜ້າທີ່ເປັນຮູບປະທຳ ໂດຍທ່ານ ສະເຕບຟານ ເດິ ມິສຕູຣາ ຜູ້ແທນພິເສດຂອງສະຫະປະຊາຊາດເພື່ອສັນຕິພາບຊີຣີ ກ່າວວ່າ: ລັດຖະບານຊີຣີຍັງບໍ່ຫລຸດຜ່ອນຈຸດຢືນ ທີ່ຈະບໍ່ມີການເຈລະຈາເລື່ອງການຖ່າຍໂອນອຳນາດທາງການເມືອງ ແລະ ຄະນະຜູ້ແທນເຈລະຈາຂອງປະທານາທິບໍດີ ບາຊາ ອານ ອັດຊັດ ຢືນຢັນຈະເດີນໜ້າຕໍ່ສູ້ກຸ່ມກໍ່ການຮ້າຍໃນປະເທດຕໍ່ໄປ.
ການຖ່າຍໂອນອຳນາດທາງການເມືອງຢູ່ຊີຣີ ຕາມທີ່ຮຽກຮ້ອງໂດຍມະຕິຂອງສະພາຄວາມໝັ້ນຄົງແຫ່ງສະຫະປະຊາຊາດ (UNHC) ໃນເດືອນທັນວາ 2015 ຖືເປັນຫົວໃຈສຳຄັນຂອງແຜນດຳເນີນງານຂອງມິສຕູຣາ, ແຕ່ທ່ານ ບາຊາ ອັດ ຈາອາຟາຣີ ເອກອັກຄະລາຖະທູດຊີຣີປະຈຳ UN ໃນຖານະຫົວໜ້າຄະນະຜູ້ແທນເຈລະຈາຂອງລັດຖະບານຊີຣີ ປະກາດເນັ້ນວ່າ: ຊະຕາກຳຂອງປະທານາທິບໍດີ ອັດຊາດ ຫ້າມແຕະຕ້ອງໂດຍເດັດຂາດ.
