EU ຟ້ອງຮ້ອງ AstraZeneca ຫລັງເຮັດຜິດສັນຍາ ຈັດສົ່ງວັກຊີນໂຄວິດ-19 ຊັກຊ້າ
ຄະນະກຳມາທິການເອີຣົບ ເຊິ່ງເປັນອົງການຝ່າຍບໍລິຫານຂອງສະຫະພາບເອີຣົບ (EU) ຕັດສິນໃຈດຳເນີນຄະດີກັບ AstraZeneca ໜຶ່ງໃນຜູ້ຜະລິດວັກຊີນໂຄວິດ-19 ລາຍໃຫຍ່ ຈາກກໍລະນີຈັດສົ່ງວັກຊີນຊັກຊ້າກວ່າກຳນົດ ເຊິ່ງການຟ້ອງຮ້ອງດັ່ງກ່າວໄດ້ຮັບຄວາມເຫັນພ້ອມຈາກລັດສະມາຊິກທັງ 27 ປະເທດ.
ຄະນະກຳມາທິການເອີຣົບ ລະບຸວ່າ: ໄດ້ຍື່ນຟ້ອງບໍລິສັດ AstraZeneca ແລ້ວໃນວັນທີ 23 ເມສາຜ່ານມາ ຈາກກໍລະນີທີ່ບໍລິສັດບໍ່ປະຕິບັດຕາມເງື່ອນໄຂຂອງສັນຍາໃນການຈັດຫາວັກຊີນໃຫ້ປະເທດໃນສະຫະພາບເອີຣົບ. ນອກຈາກນີ້ ຍັງກ່າວຫາວ່າ: AstraZeneca ບໍ່ມີແຜນທີ່ “ເຊື່ອຖືໄດ້” ເພື່ອເຮັດໃຫ້ EU ແນ່ໃຈວ່າບໍລິສັດຈະສົ່ງມອບວັກຊີນທັນເວລາ.
ສ່ວນ AstraZeneca ລະບຸວ່າ: ຈະຕໍ່ສູ້ທາງກົດໝາຍໃນຊັ້ນສານ ເຊິ່ງການເຄື່ອນໄຫວດັ່ງກ່າວຍິ່ງເພີ່ມຄວາມຂັດແຍ່ງລະຫວ່າງ EU ກັບ AstraZeneca ຫລາຍຂຶ້ນ ໂດຍກ່ອນໜ້ານີ້ບາງປະເທດໃນ EU ກ່າວຫາວ່າ: AstraZeneca ໄດ້ຈັດຫາວັກຊີນໃຫ້ອັງກິດກ່ອນເປັນກໍລະນີພິເສດ ເຊິ່ງບໍລິສັດໄດ້ອອກມາປະຕິເສດຂໍ້ກ່າວຫານີ້.
ທັງນີ້ ຂໍ້ຕົກລົງທີ່ສອງຝ່າຍລົງນາມກັນເມື່ອເດືອນສິງຫາປີຜ່ານມານັ້ນ EU ຈະຈັດຊື້ວັກຊີນ Oxford-AstraZeneca ຈຳນວນ 300 ລ້ານໂດສ ພ້ອມຂໍ້ສະເໜີທີ່ຈະຈັດຊື້ເພີ່ມອີກ 100 ລ້ານໂດສ.
ແຕ່ເມື່ອຕົ້ນປີຜ່ານມາ AstraZeneca ລະບຸວ່າ: ສາມາດຈັດສົ່ງວັກຊີນໄດ້ໜ້ອຍລົງ ເພາະປະສົບບັນຫາໃນການຜະລິດ ໂດຍຊຸດທຳອິດທີ່ຕົກລົງກັນໄວ້ຄືຈັດສົ່ງວັກຊີນຈຳນວນ 80 ລ້ານໂດສພາຍໃນໄຕມາດທຳອິດປີ 2021 ແຕ່ໃນຄວາມເປັນຈິງ ບໍລິສັດຈັດສົ່ງວັກຊີນໃຫ້ພຽງ 30 ລ້ານໂດສເທົ່ານັ້ນ.
ຄະນະກຳມາທິການເອີຣົບຍັງລະບຸອີກວ່າ: ບໍລິສັດ AstraZeneca ກຽມຈັດສົ່ງວັກຊີນໃຫ້ 70 ລ້ານໂດສໃນໄຕມາດທີ 2 ຈາກ 180 ລ້ານໂດສ ທີ່ກຳນົດໄວ້ໃນຕອນທຳອິດ.
ອ້າງອີງ:
https://www.bbc.com/news/world-europe-56891326
