EU ກຽມເປີດປະຕູຮັບນັກທ່ອງທ່ຽວອາເມລິກາ ທີ່ສັກວັກຊີນຄົບໂດສແລ້ວໃນຊ່ວງລະດູຮ້ອນນີ້
ທ່ານ ນາງ ວູຊູລາ ຟອນ ແດ ເລເຢນ ປະທານຄະນະກຳມາທິການເອີຣົບ ເປີດເຜີຍຕໍ່ New York Times ໃນວັນທີ 25 ເມສາວ່າ: ນັກທ່ອງທ່ຽວຊາວອາເມລິກາທີ່ໄດ້ຮັບວັກຊີນຕ້ານໂຄວິດ-19 ຄົບໂດສແລ້ວ ອາດຈະສາມາດເດີນທາງໄປປະເທດໃນກຸ່ມສະຫະພາບເອີຣົບ ຫລື EU ໄດ້ໃນຊ່ວງລະດູຮ້ອນນີ້. ເຖິງຢ່າງໃດກໍຕາມ, ນາງບໍ່ລະບຸຊ່ວງເວລາທີ່ແນ່ນອນ.
ການປ່ຽນແປງດັ່ງກ່າວຈະເປັນການຢຸດມາດຕະການ ຫ້າມນັກເດີນທາງຈາກອາເມລິກາເດີນທາງເຂົ້າສູ່ EU ຖ້າບໍ່ມີຄວາມຈຳເປັນທີ່ບັງຄັບໃຊ້ມາກວ່າ 1 ປີ ໂດຍເລີ່ມແຕ່ເດືອນມີນາປີຜ່ານມາ ເພື່ອປ້ອງກັນການລະບາດຂອງພະຍາດໂຄວິດ-19.
ທ່າທີຂອງ EU ມີຂຶ້ນຫລັງຈາກອາເມລິກາມີຄວາມກ້າວໜ້າໃນການສັກວັກຊີນໃຫ້ປະຊາຊົນ, ຂະນະທີ່ການຫາລືຂອງທັງສອງຝ່າຍເລື່ອງການພິສູດພູມຄຸ້ມກັນຂອງນັກເດີນທາງທີ່ຜ່ານການສັກວັກຊີນມີຄວາມຄືບໜ້າດ້ວຍດີ ເຮັດໃຫ້ມີການສະເໜີປ່ຽນແປງນະໂຍບາຍຈຳກັດນັກເດີນທາງເຂົ້າສູ່ EU.
ທັງນີ້ເຖິງວ່າ EU ຈະສະເໜີໃຫ້ຍົກເລີກການຫ້າມນັກເດີນທາງຈາກອາເມລິກາ, ແຕ່ປະເທດສະມາຊິກ EU ຈະຍັງສາມາດບັງຄັບໃຊ້ມາດຕະການຈຳກັດນັກເດີນທາງເຂົ້າປະເທດຕໍ່ໄປໄດ້ ເຊິ່ງອາດລວມທັງມາດຕະການກັກຕົວກ່ອນເຂົ້າປະເທດ.
ຂະນະທີ່ປັດຈຸບັນໜ່ວຍງານເບິ່ງແຍງວັກຊີນຂອງ EU ອະນຸຍາດໃຫ້ມີການນຳໃຊ້ວັກຊີນ 3 ຊະນິດ ຈາກອາເມລິກາ ໄດ້ແກ່ Pfizer, Moderna ແລະ Johnson & Johnson.
ຈາກຂໍ້ມູນຂອງສູນປ້ອງກັນ ແລະ ຄວບຄຸມພະຍາດລະບາດ (CDC) ຂອງອາເມລິກາ ພົບວ່າມີປະຊາກອນອາເມລິກາປະມານ 28,5% ຫລື ຫລາຍກວ່າ 94 ລ້ານຄົນທີ່ໄດ້ຮັບການສັກວັກຊີນຄົບ 2 ໂດສແລ້ວ, ຂະນະທີ່ປະຊາກອນອີກປະມານ 42,2% ຫລື ເກືອບ 140 ລ້ານຄົນ ຫາກໍໄດ້ຮັບການສັກວັກຊີນໂດສທຳອິດ ແລະ ມີຊາວອາເມລິກາອີກປະມານ 5 ລ້ານຄົນທີ່ພາດການສັກໂດສທີ 2 ເຊິ່ງນັກລະບາດວິທະຍາແນະນຳປະຊາຊົນໃຫ້ສັກວັກຊີນຄົບໂດສ ເນື່ອງຈາກສາມາດປ້ອງກັນການຕິດເຊື້ອໄດ້ຍາວນານກວ່າ.
ອ້າງອີງ:
- https://www.dw.com/en/coronavirus-eu-set-to-allow-vaccinated-us-tourists-this-summer-report/a-57331605
- https://www.bloomberg.com/news/articles/2021-04-25/eu-set-to-allow-vaccinated-u-s-tourists-visit-this-summer-nyt?fbclid=IwAR0BCo4MVC0p4F2FdqHEhBwaO8pMpTGmJEacF-_C_r3G9zGYVWdVczOAvXw
