Kate Wang ສ້າງຕັ້ງທຸລະກິດຫຍັງ ? ມູນຄ່າ 4 ແສນລ້ານໃນ 3 ປີ

ເມື່ອບໍ່ດົນມານີ້ ປະເທດຈີນໄດ້ມີມະຫາເສດຖີຄົນໃໝ່ທີ່ຊື່ວ່າ Kate Wang ນັກທຸລະກິດສາວຊາວຈີນ ທີ່ໄດ້ສ້າງຕັ້ງບໍລິສັດທີ່ມີມູນຄ່າ 4,6 ແສນລ້ານບາດຂຶ້ນມາ ໂດຍໃຊ້ໄລຍະເວລາໃນການສ້າງຕັ້ງບໍລິສັດພຽງ 3 ປີ.

ບໍລິສັດດັ່ງກ່າວສົ່ງຜົນໃຫ້ Kate Wang ທີ່ເປັນທັງຜູ້ສ້າງຕັ້ງ ແລະ ຜູ້ຖືຫຸ້ນໃຫຍ່ຂອງບໍລິສັດ ກາຍມາເປັນໜຶ່ງໃນມະຫາເສດຖີທີ່ມີອາຍຸນ້ອຍທີ່ສຸດໃນປະເທດຈີນ ທີ່ສ້າງຕັ້ງທຸລະກິດຂຶ້ນມາດ້ວຍຕົນເອງ.

ປັດຈຸບັນ ນາງມີຊັບສິນ 9 ໝື່ນລ້ານບາດ ແລ້ວ Kate Wang ສ້າງຕັ້ງບໍລິສັດຫຍັງ ?

ຄວາມຈິງແລ້ວ ນາງ Kate Wang ຖືເປັນໜຶ່ງໃນນັກທຸລະກິດສາວຈີນບໍ່ເທົ່າໃດຄົນທີ່ກ້າວຂຶ້ນມາເປັນຜູ້ສ້າງຕັ້ງອົງກອນໃນປະເທດຈີນໄດ້ສຳເລັດ ເຊິ່ງປັດຈຸບັນນາງມີອາຍຸພຽງ 39 ປີ ໂດຍຫລັງຈາກນາງຮຽນຈົບປະລິນຍາຕີ ສາຂາການເງິນ ຢູ່ Xi’an Jiaotong University ໃນປະເທດຈີນ, ນາງໄດ້ໄປສຶກສາຕໍ່ຂະແໜງບໍລິຫານທຸລະກິດ ຢູ່ Columbia University ປະເທດອາເມລິກາ. ຫລັງຈາກນັ້ນ ກໍໄດ້ເຂົ້າມາຮ່ວມງານກັບບໍລິສັດຍັກໃຫຍ່ຈຳນວນຫລາຍເຊັ່ນ: ບໍລິສັດ Bain & Company ປະເທດອາເມລິກາ, ບໍລິສັດ Uber China ທີ່ປະເທດຈີນ ໃນຕຳແໜ່ງ General Manager ແລະ ບໍລິສັດ Didi Chuxing Technology ໃນຕຳແໜ່ງຜູ້ບໍລິຫານ ກ່ອນທ້າຍທີ່ສຸດນາງຈະລາອອກມາສ້າງຕັ້ງທຸລະກິດເປັນຂອງຕົນເອງ.

ແມ່ນຫຍັງທີ່ເຮັດໃຫ້ນາງ Kate Wang ຕັດສິນໃຈບອກລາຕຳແໜ່ງ ຜູ້ບໍລິຫານໃນບໍລິສັດທີ່ໝັ້ນຄົງ ແລະ ຫັນມາເລີ່ມສ້າງຕັ້ງບໍລິສັດຂອງນາງເອງ ?

ເລື່ອງດັ່ງກ່າວ ນາງໄດ້ແນວຄິດມາຈາກພໍ່ຂອງນາງ ທີ່ປະສົບບັນຫາສູບຢາຢ່າງໜັກ ສະເລ່ຍວັນລະ 2 ຊອງຕໍ່ວັນ ແລະ ສູບຢາມາຍາວນານກວ່າ 40 ປີ. ຂະນະດຽວກັນ ໃນໄລຍະທີ່ນາງຍັງເຮັດວຽກຢູ່ ພໍ່ຂອງເພື່ອນຮ່ວມງານນາງກໍໄດ້ເສຍຊີວິດຈາກພະຍາດມະເຮັງປອດ ເຊິ່ງມີສາເຫດມາຈາກການສູບຢາ.

ນາງຈຶ່ງໄດ້ລອງນຳເອົາແນວຄິດ E-Cigarettes ຫລື ຢາສູບໄຟຟ້າ ທີ່ຈະເປັນການໃຊ້ໄຟຟ້າໃຫ້ເກີດຄວາມຮ້ອນ ແລະ ອາຍນໍ້າແທນການເຜົາໄໝ້ຂອງຢາສູບກອກ ເຊິ່ງເປັນສາເຫດສຳຄັນຂອງສານເຄມີສ້າງມະເຮັງຫລາຍຊະນິດເຊັ່ນ: ທາ ແລະ ກາກບອນມອນອົກໄຊ ໄປນຳສະເໜີໃນແພກຟອມ Crowdfunding ຂອງ JD.com ເພື່ອຮວບຮວມເງິນລະດົມທຶນຈາກຜູ້ທີ່ສົນໃຈໃນສິນຄ້າ ແລະ ນັກລົງທຶນ.

ຜົນປາກົດວ່າ: ແນວຄິດຂອງນາງໄດ້ຮັບກະແສຕອບຮັບທີ່ດີ ເຊິ່ງລະດັບເງິນລະດົມທຶນທີ່ນາງ Kate Wang ໄດ້ຮັບມີມູນຄ່າສູງເຖິງ 182 ລ້ານບາດ ຄິດເປັນ 10 ເທົ່າຈາກທີ່ນາງໄດ້ປະກາດຕັ້ງເປົ້າໝາຍໄວ້.

ຫລັງຈາກນັ້ນ ນາງໄດ້ເອົາເງິນລະດົມທຶນທີ່ໄດ້ຮັບມາໄປສ້າງຕັ້ງບໍລິສັດຊື່ວ່າ RELX Technology ແລະ ໂຮງງານວິໄຈ ແລະ ພັດທະນາ ມູນຄ່າປະມານ 96 ລ້ານບາດ ໃນປີ 2018 ເພື່ອພັດທະນາຄວາມສາມາດໃນການແຂ່ງຂັນກັບຜູ້ຫລິ້ນຄົນອື່ນໃນກຸ່ມທຸລະກິດດຽວກັນ ທີ່ກຳລັງເພີ່ມສູງຂຶ້ນໃນປັດຈຸບັນ.

ເບິ່ງຄືວ່າຜະລິດຕະພັນຂອງ RELX ຈະກາຍມາເປັນທີ່ນິຍົມຢ່າງວ່ອງໄວ ຈົນບໍລິສັດເຕີບໃຫຍ່ແບບກ້າວກະໂດດ ແລະ ສາມາດຈົດທະບຽນເຂົ້າຕະຫລາດຫລັກຊັບອາເມລິກາໄດ້ ຫລັງຈາກສ້າງຕັ້ງທຸລະກິດໄດ້ພຽງ 3 ປີ.

ເຮົາມາເບິ່ງຜົນປະກອບການ ບໍລິສັດ RELX Technology: ປີ 2018 ລາຍໄດ້ 636 ລ້ານບາດ, ປີ 2019 ລາຍໄດ້ 7.431 ລ້ານບາດ, ປີ 2020 ລາຍໄດ້ 18.321 ລ້ານບາດ ຄິດເປັນການເຕີບໃຫຍ່ສະເລ່ຍ 437% ຕໍ່ປີ.

ຂະນະທີ່ປັດຈຸບັນ ບໍລິສັດ RELX Technology ມີມູນຄ່າບໍລິສັດ 4,6 ແສນລ້ານບາດ ເຮັດໃຫ້ນາງ Kate Wang ທີ່ເປັນຜູ້ສ້າງຕັ້ງ ແລະ ຜູ້ຖືຫຸ້ນໃຫຍ່ ມີຊັບສິນປະມານ 9 ໝື່ນລ້ານບາດ ຈົນກາຍມາເປັນໜຶ່ງໃນມະຫາເສດຖີທີ່ມີອາຍຸນ້ອຍທີ່ສຸດໃນປະເທດຈີນ.

ເຖິງວ່າຕອນນີ້ຍັງມີຂໍ້ຖົກຖຽງກັນວ່າ E-Cigarettes ສົ່ງຜົນກະທົບຕໍ່ສຸຂະພາບ ຫລື ບໍ່ ເພາະໃນໄລຍະບໍ່ເທົ່າໃດປີຜ່ານມາ ບໍລິສັດທີ່ເຮັດທຸລະກິດຄືກັນເຊັ່ນ: JUUL ໃນອາເມລິກາ ຍັງຜະເຊີນຄວາມກົດດັນເລື່ອງການສົ່ງຜົນກະທົບຕໍ່ຮ່າງກາຍ ແລະ ມີທ່າອ່ຽງເຮັດໃຫ້ປອດຊື່ນ ເຊິ່ງເລື່ອງດັ່ງກ່າວຖືເປັນບັນຫາທີ່ຍັງບໍ່ໄດ້ຂໍ້ສະຫລຸບ.

ແຕ່ໃນອີກມຸມໜຶ່ງທີ່ນາງ Kate Wang ສ້າງຕັ້ງທຸລະກິດຂຶ້ນມາຈາກການຫລິ່ງເຫັນເຖິງບັນຫາທີ່ເກີດຂຶ້ນກັບຄົນໃນຄອບຄົວ ຈົນກາຍມາເປັນຜູ້ທີ່ສ້າງຕັ້ງບໍລິສັດ ມູນຄ່າລະດັບ 4,6 ແສນລ້ານບາດ ໃນ 3 ປີ ຖືເປັນແນວຄິດທີ່ເບິ່ງຂ້າມບໍ່ໄດ້ເຊັ່ນກັນ.

ອ້າງອີງ:

–https://www.scmp.com/magazines/style/news-trends/article/3119727/who-millennial-billionaire-wang-ying-rlx-technology-ceo

–https://www.forbes.com/sites/russellflannery/2021/01/22/china-mints-e-cigarette-billionaires-as-rlx-soars-on-nyse-debut/?sh=71d45aec3b35

–https://www.thewirechina.com/2021/02/14/vaping-madness/

–https://vape.hk/relxbrandstory/

–https://www.forbes.com/sites/rachelsandler/2021/04/08/nike-settles-lawsuit-with-company-behind-lil-nas-x-satan-shoes/?sh=66973655575d

–https://www.forbes.com/sites/russellflannery/2020/07/11/china-gets-its-first-vaping-industry-billionaires/?sh=5fcd430d5202