ອິນໂດເນເຊຍຢືນຢັນແລ້ວ ລູກເຮືອ 53 ຊີວິດໃນເຮືອດຳນໍ້າ KRI Nanggala-402 ທີ່ສູນຫາຍ “ເສຍຊີວິດທັງໝົດ”
ກອງທັບອິນໂດເນເຊຍອອກມາຢືນຢັນແລ້ວວ່າ: ລູກເຮືອ 53 ຊີວິດໃນເຮືອດຳນໍ້າ KRI Nanggala-402 ທີ່ສູນຫາຍ ແລະ ຂາດການຕິດຕໍ່ແຕ່ວັນທີ 21 ເມສາຜ່ານມາ ຖືກພົບວ່າເສຍຊີວິດທັງໝົດແລ້ວ ຫລັງຈາກວັນທີ 25 ເມສາຜ່ານມາ ກອງທັບໄດ້ພົບຊິ້ນສ່ວນຈາກເຮືອດຳນໍ້ານີ້ທີ່ສູນຫາຍລອຍຢູ່ໃນທະເລບາຫລີ.
ຫົວໜ້າເຈົ້າໜ້າທີ່ກອງທັບເຮືອອິນໂດເນເຊຍ ລະບຸວ່າ: ຊິ້ນສ່ວນຂອງເຮືອດຳນໍ້າ KRI Nanggala-402 ໄດ້ຖືກພົບວ່າແຕກເປັນສາມສ່ວນ, ຂະນະທີ່ຫົວໜ້າກອງທັບອິນໂດເນເຊຍ ໃຫ້ຂໍ້ມູນຕໍ່ນັກຂ່າວ ຢືນຢັນການເສຍຊີວິດຂອງລູກເຮືອທຸກຄົນທີ່ຢູ່ໃນເຮືອດຳນໍ້າດັ່ງກ່າວ.
ທັງນີ້ ເຈົ້າໜ້າທີ່ລະບຸວ່າ: ພວກເຂົາໄດ້ຮັບສັນຍານຈາກບໍລິເວນພື້ນທີ່ຢູ່ຫ່າງອອກໄປປະມານ 800 ແມັດ ໃນຕອນເຊົ້າວັນທີ 25 ເມສາ ກ່ອນຈະດຳເນີນການໃຊ້ເຮືອດຳນໍ້າຄົ້ນຫາທີ່ໄດ້ຮັບການສະໜັບສະໜູນຈາກສິງກະໂປ ເພື່ອຢືນຢັນພິກັດຕຳແໜ່ງທີ່ຕັ້ງ ກ່ອນຈະພົບເຮືອດຳນໍ້າ KRI Nanggala-402 ທີ່ສູນຫາຍໄປ.
ກາຍຫາຍໄປຢ່າງໄຮ້ຮ່ອງຮອຍຂອງເຮືອດຳນໍ້າ KRI Nanggala-402 ເກີດຂຶ້ນແຕ່ວັນທີ 21 ເມສາຜ່ານມາ ໃນລະຫວ່າງເຈົ້າໜ້າທີ່ທະຫານທັງ 53 ຄົນເຂົ້າຮ່ວມການຝຶກຊ້ອມພິເສດ.
ອ້າງອີງ:
