ພ້ອມກັນບຸກທະລຸຕ້ານໂຄວິດ-19 ຢ່າງຮີບດ່ວນທັນການ

ໂດຍ: ທິດກໍ່າ

ໃນເງື່ອນໄຂສະພາບການບ້ານເມືອງຂອງພວກເຮົາພວມຢູ່ໃນສະພາວະອັນເລັ່ງດ່ວນ ແລະ ຈຳເປັນເພື່ອຕ້ານ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ສາຍພັນອັງກິດດ້ວຍຄວາມເປັນເຈົ້າການຢ່າງເດັດຂາດແຂງແຮງ ເຊິ່ງທ່ານນາຍົກລັດຖະມົນຕີ ພັນຄຳ ວິພາວັນ ຕ້ອງໄດ້ອອກຄຳສັ່ງດ່ວນສະບັບເລກທີ 15/ນຍ, ລົງວັນທີ 21 ເມສາ 2021 ເຊິ່ງປະກອບໄປດ້ວຍຫລາຍເນື້ອໃນກ່ຽວກັບຂໍ້ຫ້າມ, ຂໍ້ໃຫ້ຍົກເວັ້ນ ແລະ ທັງຂໍ້ເປີດທາງໃຫ້ພວກເຮົາພ້ອມກັນບຸກທະລຸ ແລະ ເລັ່ງປະຕິບັດໃຫ້ເຂັ້ມງວດ ແລະ ເດັດຂາດຄືດັ່ງນີ້: ອັນທີໜຶ່ງ ກ່ຽວກັບຂໍ້ຫ້າມ ແມ່ນຫ້າມເດີນທາງໄປຕ່າງແຂວງ ແລະ ຕ່າງແຂວງກໍຫ້າມເຂົ້າມາໃນຂອບເຂດນະຄອນຫລວງວຽງຈັນ ນັບແຕ່ວັນທີ 22 ເມສາ ຫາ ວັນທີ 5 ພຶດສະພາ 2021. ອັນທີສອງ ໃຫ້ຢຸດການບໍລິການຂົນສົ່ງໂດຍສານ. ອັນທີສາມ ຫ້າມອອກນອກເຮືອນ, ນອກບ້ານ (ໝາຍເຖິງທຸກຄົນ, ປະຊາຊົນ ນັບທັງນັກບວດ, ພະນັກງານ, ລັດຖະກອນ, ຄູ-ອາຈານ, ນັກຮຽນ-ນັກສຶກສາທີ່ຢູ່ໃນຂອບເຂດນະຄອນຫລວງວຽງຈັນ). ສີ່ ຫ້າມສວຍໂອກາດຂຶ້ນລາຄາສິນຄ້າ ແລະ ຫ້າມເຜີຍແຜ່ຂໍ້ມູນຂ່າວສານທີ່ບໍ່ມີມູນຄວາມຈິງກ່ຽວກັບການແຜ່ລະບາດຂອງພະຍາດໂຄວິດ-19 ໃນຄັ້ງນີ້. ຫ້າ ຫ້າມຈັດງານປະຊຸມ, ຊຸມແຊວ, ກິດຈະກຳທາງສາສະໜາ, ງານປະເພນີ, ງານລ້ຽງສັງສັນທີ່ຫລາຍກວ່າ 20 ຄົນຂຶ້ນໄປ. ຫົກ ໃຫ້ສືບຕໍ່ປິດຮ້ານບັນເທີງ, ຄາຣາໂອເກະ, ຮ້ານກິນດື່ມ, ຮ້ານອິນເຕີເນັດ, ຮ້ານນວດ, ຮ້ານສະນຸກເກີ, ສູນອອກກຳລັງກາຍ ແລະ ກິລາໃນຮົ່ມ. ສ່ວນກໍລະນີໃຫ້ຍົກເວັ້ນນັ້ນ ຄືງານສົ່ງສະການ, ລົດຂົນສົ່ງສິນຄ້າ, ລົດຂົນສົ່ງຄົນເຈັບ (ຕ້ອງມີປະກັນໄພໂຄວິດ-19), ການອອກເຮືອນໄປຊື້ອາຫານ, ຊື້ຂອງກິນ, ໄປເຮັດວຽກກະສິກຳ, ໄປໂຮງໝໍ, ເຈົ້າໜ້າທີ່ທະຫານ, ຕຳຫລວດໄປເຮັດວຽກວິຊາສະເພາະຕາມການມອບໝາຍຂອງກົມກອງທ້ອງຖິ່ນ. ສ່ວນວ່າການເປີດ ຫລື ອະນຸຍາດໃຫ້ສືບຕໍ່ເຮັດໄປຕິກໆນັ້ນ ຄືກິດຈະການ ຫລື ໂຄງການໃຫຍ່ໆ, ສະຖາບັນການເງິນ, ບໍລິສັດຫລັກຊັບ, ຮ້ານຂາຍຢາ, ໂທລະຄົມມະນາຄົມ, ຕະຫລາດກະສິກຳ, ປໍ້ານໍ້າມັນ, ໂຮງຊ່າງ, ໂຮງງານ, ໂຮງໝໍ, ໜ່ວຍກູ້ໄພ, ໄຟຟ້າ, ນໍ້າປະປາ, ຮ້ານຂາຍເຄື່ອງຍ່ອຍ, ຮ້ານຂາຍຂອງກິນ, ຮ້ານກາເຟ, ທະນາຄານ, ສູນການແພດ, ກິດຈະກຳໄປສະນີ, ການບໍລິການຮັກສາຄວາມປອດໄພ, ການເກັບມ້ຽນຂີ້ເຫຍື້ອ ແລະ ຮ້ານຊຸບເປີມາເກັດ. ສຳລັບໂຮງແຮມ ແລະ ລີສອດນັ້ນແມ່ນໃຫ້ເປີດສະແຕ່ການບໍລິການ ແລະ ອາຫານທີ່ຮັບໃຊ້ແຂກຄົນທີ່ເຂົ້າໄປໃຊ້ບໍລິການ ແຕ່ຕ້ອງປະຕິບັດມາດຕະການຢ່າງເຂັ້ມງວດ.

ນີ້ຄືເນື້ອໃນຈິດໃຈລວມໂດຍສັງເຂບຂອງຄຳສັ່ງດ່ວນສະບັບເລກທີ 15/ນຍ ທີ່ໄດ້ແຈ້ງການອອກມາໃຫ້ທຸກຄົນພາຍໃນຊາດເລັ່ງປະຕິບັດຢ່າງຮີບດ່ວນ ໂດຍສະເພາະແມ່ນໃນຂອບເຂດທີ່ມີການແຜ່ລະບາດ ແລະ ຢູ່ນະຄອນຫລວງວຽງຈັນທີ່ພວມຜະເຊີນກັບບັນຫາການແຜ່ລະບາດຢ່າງວ່ອງໄວ ນັບແຕ່ຫລັງປີໃໝ່ຜ່ານມາ. ນອກຈາກຄຳສັ່ງທີ່ເປັນຕົວຫລັກນີ້ແລ້ວ ຄະນະສະເພາະກິດລະດັບຊາດກໍໄດ້ອອກຖະແຫລງການ ທັງແນະນຳໃຫ້ຊາວນະຄອນຫລວງວຽງຈັນ ກໍຄືຊາວລາວໃນທົ່ວປະເທດຈົ່ງໄດ້ໃຫ້ການຮ່ວມໄມ້ຮ່ວມມືໃນພາລະກິດອັນໃຫຍ່ຫລວງເລັ່ງດ່ວນຄັ້ງນີ້. ສິ່ງສຳຄັນນັບແຕ່ໄລຍະນີ້ເປັນຕົ້ນໄປ ຖ້າຫາກຜູ້ໃດຮູ້ສຶກວ່າຕົນເອງຢູ່ໃນຄວາມສ່ຽງ, ບໍ່ສະບາຍໃຈ ຫລື ຮັບຮູ້ວ່າຕົນເອງໄປກ່ຽວຂ້ອງເຊື່ອມໂຍງກັບກໍລະນີຜູ້ຕິດເຊື້ອລາຍທີ 59 ຫລື ລາຍອື່ນໆ ແມ່ນໃຫ້ໄປກວດດ່ວນຢູ່ສະຖານທີ່ທາງການໄດ້ກຳນົດໄວ້ເຊັ່ນ: ຢູ່ນະຄອນຫລວງວຽງຈັນແມ່ນມີ 5 ຈຸດຄື: ໂຮງໝໍມິດຕະພາບ 150 ຕຽງ, ໂຮງໝໍເສດຖາທິຣາດ, ເດີ່ນກິລາໃນຮົ່ມບຶງຂະຫຍອງ ເມືອງສີສັດຕະນາກ, ສະໜາມກິລາເຈົ້າອານຸວົງ, ມສ ສີໂຄດວຽງຈັນ-ໂຮ່ຈີມິນ ແລະ ມສ ລາວ-ຫວຽດນາມ ທີ່ບ້ານໂພນພະເນົາ. ສ່ວນຢູ່ຕ່າງແຂວງນັ້ນ ກໍແມ່ນຢູ່ຕາມໂຮງໝໍແຂວງແຕ່ລະແຫ່ງໃນທົ່ວປະເທດ.

ເຖິງຢ່າງໃດກໍດີ, ຄາດວ່າອີກບໍ່ດົນ ບັນຫາການຕ້ານໂຄວິດ-19 ທີ່ພວກຈັງໄຮໄດ້ນຳເຂົ້າມາຈາກພາຍນອກໃນຄັ້ງນີ້ ພວກເຮົາຕ້ອງຜ່ານພົ້ນ ແລະ ປາບມັນໄດ້ຢ່າງແນ່ນອນ ເພາະມາຮອດປັດຈຸບັນ ເຖິງວ່າມີຜູ້ຕິດເຊື້ອໄດ້ເພີ່ມຂຶ້ນ ແລະ ຫລຸດລົງໃນບາງມື້ ແຕ່ພວກເຮົາກໍມີຄວາມສາມາດຢັບຢັ້ງ ແລະ ປາບມັນໄດ້ ຖ້າຫາກພວກເຮົາພ້ອມໃຈກັນເປັນເຈົ້າການ ແລະ ສາມັກຄີກັນຢ່າງເປັນປຶກແຜ່ນ.

ເມື່ອຕັ້ງໂຈດກັນວ່າ ເພື່ອບໍ່ໃຫ້ໂຣກຈັງໄຮໂຄວິດ-19 ແຜ່ລາມອີກຄັ້ງຕໍ່ໆໄປ ພວກເຮົາຕ້ອງເຮັດແນວໃດ ? ຄຳຕອບໂຈດກໍຄື ອັນທີໜຶ່ງ ຢ່າເຮັດຄືນາງ ຕິນາ ພະລາຊາ ພາເພ ນຳເອົາຄວາມຈິບຫາຍວາຍວອດມາສູ່ບ້ານເມືອງ, ອັນທີສອງ ຢ່າພາກັນລັກຂ້າມຂອງນຳເອົາເຊື້ອພະຍາດຈາກໄທມາລາວເດັດຂາດ, ສ່ວນອັນທີສາມ ແມ່ນໝັ່ນອະນາໄມໃຊ້ຄວາມຫ່າງ, ລ້າງມືດ້ວຍນໍ້າຢາຂ້າເຊື້ອໃນເວລາຈັບບາຍສິ່ງຂອງທຸກຄັ້ງ, ໃຫ້ຫລີກເວັ້ນຈາກຄວາມເປິະເປື້ອນ ທັງບໍ່ໄປມົ້ວສຸມກັບສະຖານທີ່ແອອັດມີຄວາມສ່ຽງຢ່າງເດັດຂາດ. ນອກນັ້ນ ກໍຫ້າມອອກເຮືອນໄປທົ່ວທີບ, ໃຫ້ປະຕິບັດຕາມຄຳແນະນຳຈາກຄະນະສະເພາະກິດ, ແພດໝໍ. ສ່ວນອັນທີຄວນເຮັດດ່ວນທີ່ສຸດ ຄືໃຫ້ຂ້ຽວພາກັນໄປສັກຢາກັນໂຄວິດ-19 ທີ່ທາງການໄດ້ຈັດສັນໃຫ້ໄວທີ່ສຸດ, ຖ້າເຮົາປະຕິບັດໄດ້ຊໍ່ານີ້ກໍຖືວ່າເຮັດຫລ້ອນໜ້າທີ່ ແລະ ສາມາດຫລີກລ່ຽງກັບການຕິດເຊື້ອໂຄວິດ-19 ໄດ້ຢ່າງແນ່ນອນນັ້ນແລ !.