ອາເມລິກາກຽມກັບມາສັກວັກຊີນ Johnson & Johnson ອີກ ຫລັງໂຈະການນຳໃຊ້ 11 ວັນ
ສູນຄວບຄຸມ ແລະ ປ້ອງກັນພະຍາດອາເມລິກາ (CDC) ເປີດເຜີຍວ່າ: ອາເມລິກາກຽມຈະກັບມາດຳເນີນການນຳໃຊ້ວັກຊີນປ້ອງກັນໂຄວິດ-19 ຂອງ Johnoson & Johnson ອີກ ໃນວັນທີ 23 ເມສາຜ່ານມາ ຕາມເວລາທ້ອງຖິ່ນ ຫລັງໂຈະການນຳໃຊ້ໄປຊົ່ວຄາວເປັນໄລຍະເວລາກວ່າ 11 ວັນ ຈາກບັນຫາພົບຜົນຂ້າງຄຽງ “ຫລອດເລືອດອຸດຕັນ” ໃນຜູ້ທີ່ໄດ້ຮັບວັກຊີນບາງຄົນ.
ໂດຍໃຫ້ເຫດຜົນວ່າ: ການກັບມານຳໃຊ້ວັກຊີນຂອງ Johnoson & Johnson ໃນຄັ້ງນີ້ມີ “ປະສິດທິພາບ” ໃນການນຳໃຊ້ປ້ອງກັນພະຍາດພະຍາດຫລາຍກວ່າບັນຫາຜົນຂ້າງຄຽງທີ່ພົບໄດ້ຍາກ. ນອກຈາກນີ້ ຍັງລະບຸອີກວ່າ: ວັກຊີນດັ່ງກ່າວໃຫ້ປະໂຫຍດຫລາຍກວ່າໂທດ ແລະ ຄວາມສ່ຽງ.
ຜູ້ອຳນວຍການສູນຄວບຄຸມ ແລະ ປ້ອງກັນພະຍາດອາເມລິກາ ເປີດເຜີຍຕໍ່ສື່ມວນຊົນວ່າ: ວັກຊີນ Johnoson & Johnson ໄດ້ສະແດງໃຫ້ເຫັນແລ້ວວ່າປອດໄພ ແລະ ມີປະສິດທິພາບຕໍ່ຄົນສ່ວນຫລາຍ.
ການຕັດສິນໃຈກັບມານຳໃຊ້ວັກຊີນ Johnoson & Johnson ໃນຄັ້ງນີ້ມີຂຶ້ນຫລັງຈາກ ຄະນະກຳມະການທີ່ປຶກສາວັກຊີນຂອງລັດຖະບານກາງ ແລະ CDC ໄດ້ຮ່ວມກັນລົງຄະແນນວ່າຈະກັບມານຳໃຊ້ວັກຊີນປ້ອງກັນໂຄວິດ-19 ຊະນິດດັ່ງກ່າວ ຫລື ບໍ່ ກ່ອນຜົນລົງຄະແນນຈະອອກມາເປັນ 10-4 ຫລື ໃຫ້ກັບມານຳໃຊ້ວັກຊີນ Johnoson & Johnson ໄດ້ອີກ ໂດຍຄາດວ່າການນຳໃຊ້ວັກຊີນ Johnoson & Johnson ຕໍ່ພົນລະເມືອງອາເມລິກາຈະເລີ່ມໃນທ້າຍອາທິດນີ້ທີ່ມີອາຍຸແຕ່ 18 ປີຂຶ້ນໄປ.
ນັ້ນໝາຍຄວາມວ່າ: ວັກຊີນຢ່າງໜ້ອຍ 10 ລ້ານກວ່າໂດສ ທີ່ຖືກສົ່ງຈາກໂຮງງານຂອງ Johnoson & Johnson ໃນເນເທີແລນມາອາເມລິກາຈະເລີ່ມຖືກກະຈາຍ ແລະ ຈັດສົ່ງໄປໃນແຕ່ລະລັດຂອງປະເທດເພື່ອດຳເນີນການສັກໃຫ້ປະຊາຊົນທັນທີ.
ແຕ່ຢ່າງໃດກໍດີ, ທາງ Johnoson & Johnson ແລະ ໜ່ວຍງານທີ່ກ່ຽວຂ້ອງຈະຕ້ອງອອກກາໝາຍໃນແກ້ວວັກຊີນ ແລະ ຄຳເຕືອນໃນເອກະສານຢາ ເຖິງຜົນຂ້າງຄຽງຫລອດເລືອດອຸດຕັນທີ່ອາດຈະເກີດຂຶ້ນນຳ ເພື່ອເຕືອນໃຫ້ແພດ ແລະ ຜູ້ເຂົ້າຮັບວັກຊີນຮູ້ເຖິງກໍລະນີຄວາມສ່ຽງທີ່ພວກເຂົາອາດຈະຕ້ອງຜະເຊີນ.
ທັງນີ້ ນັບແຕ່ດຳເນີນການສັກວັກຊີນຂອງ Johnoson & Johnson ໄປກວ່າ 8 ລ້ານໂດສຕໍ່ພົນລະເມືອງໃນອາເມລິກາ ພົບກໍລະນີການໄດ້ຮັບຜົນຂ້າງຄຽງຫລອດເລືອດອຸດຕັນໃນຜູ້ທີ່ສັກວັກຊີນລວມ 15 ຄົນ ທັງໝົດເປັນຜູ້ຍິງ ສ່ວນຫລາຍມີອາຍຸຕໍ່າກວ່າ 50 ປີ (ເກືອບ 12 ຄົນເປັນຜູ້ຍິງທີ່ຢູ່ໃນຊ່ວງອາຍຸ 30-39 ປີ, 7 ຄົນມີນໍ້າໜັກຫລາຍ) ໂດຍ 3 ຈາກ 15 ຄົນເສຍຊີວິດແລ້ວ, ອີກ 7 ຄົນຢູ່ລະຫວ່າງການປິ່ນປົວໃນໂຮງໝໍ. ດັ່ງນັ້ນ ໃນກໍລະນີຜົນຂ້າງຄຽງທີ່ເກີດຂຶ້ນຖືວ່າເປັນອັດຕາທີ່ຕໍ່າ ຖ້າເບິ່ງໃນແງ່ປະສິດທິພາບຂອງວັກຊີນທີ່ຊ່ວຍປ້ອງກັນພະຍາດລະບາດໄດ້.
ອ້າງອີງ:
- https://www.wsj.com/articles/johnson-and-johnson-covid-vaccine-fda-cdc-advisory-committee-meeting-11619126227
- https://www.ft.com/content/bab5ffe4-b900-4565-bee2-2d4ab25b3920
- https://www.bbc.com/news/world-us-canada-56865562
