ເຮືອດຳນໍ້າຂອງອິນໂດເນເຊຍສູນຫາຍ ພ້ອມທະຫານເຮືອ 53 ຊີວິດ
ພົນເອກ ຮາດິ ທະຍາຍັນໂຕ ຜູ້ບັນຊາການທະຫານສູງສຸດຂອງອິນໂດເນເຊຍ ຖະແຫລງວ່າ: ເຮືອດຳນໍ້າ ເຄອາຣໄອ ນັງກາລາ 402 ພ້ອມທະຫານໃນເຮືອ 53 ຄົນ ເຊິ່ງກຳລັງເຂົ້າຮ່ວມການຝຶກຊ້ອມທາງຍຸດທະວິທີ ໃນທະເລນອກຝັ່ງເກາະບາຫລີ ເກີດຂາດການຕິດຕໍ່ກັບສູນບັນຊາການ ແລະ ເຊື່ອວ່າເຮືອຫາຍໄປໃຕ້ທະເລ ປະມານ 60 ກິໂລແມັດ ນອກຝັ່ງທາງເໜືອ ຂອງເກາະບາຫລີ.
ຖະແຫລງການລະບຸອີກວ່າ: ຫລັງຈາກຮູ້ເລື່ອງ ກອງທັບເຮືອໄດ້ສົ່ງເຮືອຫລາຍລຳ ພ້ອມທະຫານອອກຄົ້ນຫາໃນນ່ານນໍ້າບໍລິເວນດັ່ງກ່າວ ພ້ອມຮ້ອງຂໍການຊ່ວຍເຫລືອໄປຫາກອງທັບເຮືອສິງກະໂປ ແລະ ກອງທັບເຮືອອົດສະຕຣາລີ ທີ່ມີເຮືອກູ້ໄພເຮືອດຳນໍ້າໃຫ້ຊ່ວຍຕາມຫາເຮືອດຳນໍ້າຂອງຕົນນຳ.
ຂະນະທີ່ ສື່ທ້ອງຖິ່ນຂອງອິນໂດເນເຊຍ ລາຍງານວ່າ: ກອງທັບເຮືອອິນໂດເນເຊຍເຊື່ອວ່າ: ເຮືອນັງກາລາ 402 ຈົມລົງສູ່ຮ່ອງນໍ້າໃຕ້ທະເລ ໃນລະດັບຄວາມເລິກ 700 ແມັດຈາກຜິວນໍ້າ ແຕ່ເບື້ອງຕົ້ນຍັງບໍ່ມີຂໍ້ມູນວ່າເຮືອຫາຍໄປດ້ວຍສາເຫດໃດ.
ລາຍງານລະບຸອີກວ່າ: ເຮືອນັງກາລາ 402 ສ້າງໃນເຢຍລະມັນ ນຳເຂົ້າປະຈຳການໃນກອງທັບເຮືອອິນໂດເນເຊຍ ນັບແຕ່ຕົ້ນປີ 1980 ໂດຍເຮືອກຳລັງກຽມຝຶກຊ້ອມຍິງລູກສອນໄຟ ໃນວັນທີ 23 ເມສານີ້ ເຊິ່ງຜູ້ບັນຊາການທະຫານສູງສຸດ ແລະ ຄະນະຂອງກອງທັບ ມີກຳນົດຈະເດີນທາງໄປທ່ຽວຊົມນຳອີກ.
