ຜູ້ນໍາພັກ-ລັດວາງກະຕ່າດອກໄມ້ຢູ່ອານຸສອນສະຖານປະຫວັດສາດສໍາຄັນຂອງຊາດເນື່ອງໃນໂອກາດວັນສ້າງຕັ້ງພັກຄົບຮອບ 62 ປີ

  ໃນເຊົ້າວັນທີ 22 ມີນານີ້, ຊຶ່ງເປັນວັນສ້າງຕັ້ງພັກປະຊາຊົນປະຕິວັດລາວຄົບຮອບ 62 ປີ (22 ມີນາ 1955-22 ມີນາ 2017, ບັນດາຜູ້ນໍາພັກ-ລັດ ນໍາໂດຍສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດແຫ່ງສາທາລະນະລັດ ປະຊາທິປະໄຕ ປະຊາຊົນລາວ, ສະຫາຍ ພັນຄໍາ ວິພາວັນ ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ, ສະຫາຍນາງ ປານີ ຢາທໍຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ, ສະຫາຍ ທອງລຸນ ສີສຸລິດ ກໍາມະການກົມການເມືອງສູນກາງພັກ, ນາຍົກລັດຖະມົນຕີແຫ່ງສາທາລະນະລັດ ປະຊາທິປະໄຕ ປະຊາຊົນລາວ, ພ້ອມດ້ວຍບັນດາສະຫາຍກໍາມະການກົມການເມືອງສູນກາງພັກ, ກໍາມະການສູນກາງພັກ,  ໄດ້ນໍາເອົາກະຕ່າດອກໄມ້ມາວາງຕໍ່ໜ້າຮູບປັ້ນປະທານ ໄກສອນ ພົມວິຫານ ຢູ່ຫໍພິພິທະພັນຂອງເພີ່ນທີ່ນະຄອນຫລວງວຽງຈັນ, ເພື່ອສະແດງຄວາມຄໍານັບ, ຄວາມເຄົາລົບຮັກ ແລະ ສັນລະເສີນເຖິງຄຸນງາມຄວາມດີ ແລະ ຜົນງານອັນໃຫຍ່ຫລວງຂອງເພີ່ນຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ທີ່ໄດ້ອຸທິດຕົນຕະຫລອດຊີວິດເພື່ອປະເທດຊາດ, ນໍາພາປະຊາຊົນລາວບັນດາເຜົ່າລຸກຮື້ຂຶ້ນຕໍ່ສູ້ຕ້ານພວກລ່າເມືອງຂຶ້ນທັງເກົ່າ ແລະ ໃໝ່ ອັນໄດ້ເຮັດໃຫ້ຂະບວນການຕໍ່ສູ້ດັ່ງກ່າວໄດ້ຮັບໄຊຊະນະຢ່າງສົມບູນໃນວັນທີ 2 ທັນວາ 1975 ແລະ ສືບຕໍ່ນໍາພາປະຊາຊົນລາວສ້າງສາພັດທະນາປະເທດຊາດໃຫ້ມັ່ງຄັ່ງເຂັ້ມແຂງ, ປະຊາຊົນມີຄວາມຜາສຸກ, ສັງຄົມມີຄວາມສີວິໄລ ແລະ ຍຸຕິທໍາ.