ເກີດເຫດໄຟໄໝ້ລົດທົວ 2 ຊັ້ນ ອຸດອນທານີ-ບາງກອກ ຜູ້ໂດຍສານເສຍຊີວິດ 5 ຄົນ
ເມື່ອເວລາ 23:30 ໂມງ ວັນທີ 12 ເມສາ ເກີດເຫດໄຟໄໝ້ລົດທົວ 2 ຊັ້ນ ໃນຖະໜົນມິດຕະພາບ ບ້ານໜອງຂາມ ແຂວງຂອນແກ່ນ ໂດຍໄຟໄດ້ລຸກໄໝ້ລົດທົວຈົນເສຍຫາຍໝົດຄັນ.
ເຈົ້າໜ້າທີ່ມອດໄຟໃຊ້ເວລາປະມານ 30 ນາທີ ຈຶ່ງສາມາດຄວບຄຸມໄຟໄວ້ໄດ້, ເຈົ້າໜ້າທີ່ໜ່ວຍກູ້ໄພ ແລະ ກູ້ຊີບໄດ້ເອົາຜູ້ໄດ້ຮັບບາດເຈັບຈຳນວນຫລາຍ ສົ່ງໂຮງໝໍສິຣິນທອນ ແລະ ໂຮງໝໍຂອນແກ່ນ.
ພາຍຫລັງໄຟຢຸດລົງ ເຈົ້າໜ້າທີ່ກູ້ໄພໄດ້ເຂົ້າໄປກວດສອບພາຍໃນຊາກລົດ ພົບຮ່າງຜູ້ເສຍຊີວິດ 5 ຄົນ (ຜູ້ໃຫຍ່ 3 ຄົນ, ເດັກນ້ອຍ 2 ຄົນ) ຈາກການກວດສອບພົບວ່າ: ລົດທົວທີ່ເກີດເຫດເປັນຂອງບໍລິສັດ 407 ພັດທະນາທົວ ເດີນທາງອອກມາຈາກສະຖານີຂົນສົ່ງຜູ້ໂດຍສານແຂວງອຸດອນທານີ ຂອງໄທ ມຸ່ງໜ້າປາຍທາງສະຖານີຂົນສົ່ງຜູ້ໂດຍສານໝໍຊິດ ນະຄອນຫລວງບາງກອກ ມີຜູ້ໂດຍສານລວມພະນັກງານ 34 ຄົນ.
ເມື່ອມາເຖິງຈຸດເກີດເຫດ ຕີນລົດທົວດ້ານຫລັງແຕກ ແລະ ເກີດປະກາຍໄຟຂຶ້ນ ຈາກນັ້ນໄຟໄດ້ລຸກໄໝ້ເຄື່ອງຈັກທີ່ຢູ່ທາງຫລັງ ກ່ອນຈະລຸກລາມຢ່າງວ່ອງໄວຈົນໄຟໄໝ້ລົດໝົດຄັນ ເປັນເຫດເຮັດໃຫ້ມີຜູ້ເສຍຊີວິດ.
ອ້າງອີງ: https://thestandard.co
