WHO ກັງວົນໂຄວິດຈະຢູ່ອີກດົນ ເຫດຫລາຍປະເທດການຮັບມືຫລຸດລົງ
ຈາກກໍລະນີທີ່ຫລາຍປະເທດເລັ່ງເປີດປະເທດ-ເປີດເສດຖະກິດອີກ ເຮັດໃຫ້ການຕັ້ງຮັບ-ຄວບຄຸມເລີ່ມຫລຸດລົງ ເຮັດໃຫ້ອົງການອະນາໄມໂລກ (WHO) ແນມເຫັນທ່າອ່ຽງວ່າ: ໂຄວິດ-19 ອາດຢູ່ກັບພວກເຮົາຕໍ່ໄປດົນກວ່າທີ່ຄິດ.
ທ່ານ ທີໂດສ ອັດຮານອມ ກີບຣີເຢຊຸສ ຜູ້ອຳນວຍການໃຫຍ່ຂອງອົງການອະນາໄມໂລກ (WHO) ກ່າວໃນວັນທີ 12 ເມສາວ່າ: ກໍລະນີທີ່ຫລາຍປະເທດມີຄວາມສັບສົນ ແລະ ເລີ່ມຫລຸດລົງໃນການຮັບມືການລະບາດຂອງໄວຣັສໂຄວິດ-19 ໄດ້ເຮັດໃຫ້ການແຜ່ລະບາດກິນເວລາຍາວນານຕໍ່ໄປ.
ເຖິງຢ່າງໃດກໍດີ, ທ່ານເບິ່ງວ່າ: ການແຜ່ລະບາດໂຄວິດ-19 ຈະສາມາດຄວບຄຸມໄດ້ໃນເວລາອີກບໍ່ເທົ່າໃດເດືອນຕໍ່ໜ້າ ຖ້າມີການໃຊ້ມາດຕະການດ້ານສາທາລະນະສຸກຢ່າງເຂັ້ມງວດ.
ສ່ວນທ່ານໝໍ ມາເຣຍ ແວນ ເຄີໂຄບ ຫົວໜ້າພະແນກພະຍາດໂຄວິດ-19 ຂອງ WHO ກ່າວວ່າ: ໂຄວິດ-19 ກຳລັງມີການແຜ່ລະບາດແບບທະວີຄູນ ໂດຍຈຳນວນຜູ້ຕິດເຊື້ອເພີ່ມຂຶ້ນ 9% ໃນອາທິດຜ່ານມາ ແລະ ເພີ່ມຂຶ້ນເປັນອາທິດທີ 7 ຕິດຕໍ່ກັນ. ຂະນະທີ່ຈຳນວນຜູ້ເສຍຊີວິດເພີ່ມຂຶ້ນ 5%.
