ອາເມລິກາທຳລາຍເຄືອຂ່າຍສໍ້ໂກງ ທາງການແພດຄັ້ງໃຫຍ່ທີ່ສຸດ
ລັດຖະບານວໍຊິງຕັນດຳເນີນຄະດີກັບຜູ້ຕ້ອງຫາ 412 ຄົນ ເຊິ່ງລວມທັງແພດ ແລະ ພະຍາບານຈຳນວນຫລາຍ ຮ່ວມກັນສໍ້ໂກງໃນລະດົບສາທາລະນະສຸກຄັ້ງຍິ່ງໃຫຍ່ທີ່ສຸດ ລວມທັງການໃຫ້ຢາແກ້ປວດຄົນເຈັບຫລາຍເກີນຄວາມຈຳເປັນ ສ້າງຄວາມເສຍຫາຍຫລາຍກວ່າ 1 ພັນລ້ານໂດລາສະຫະລັດ.
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດສະຫະລັດອາເມລິກາ ໃນວັນທີ 13 ກໍລະກົດນີ້ວ່າ: ທ່ານ ເຈບ ເຊສຊັນ ລັດຖະມົນຕີກະຊວງຍຸຕິທຳອາເມລິກາ ແລະ ທ່ານ ທອມ ໄພຣ ລັດຖະມົນຕີກະຊວງສາທາລະນະສຸກອາເມລິກາ ຖະແຫລງຮ່ວມກັນໃນວັນທີ 13 ກໍລະກົດ ກ່ຽວກັບການຕັ້ງຂໍ້ຫາຜູ້ຕອງຫາ 412 ຄົນ ໃນຈຳນວນນີ້ເປັນແພດ 56 ຄົນ ແລະ ພະຍາບານ ລວມທັງການຢາອີກຫລາຍສິບຄົນ ສະຖານມີສ່ວນກ່ຽວຂ້ອງກັບການສໍ້ໂກງໃນລະບົບສາທາລະນະສຸກ ລວມທັງການໃຫ້ຢາປິ່ນປົວພະຍາດມີສ່ວນປະກອບຂອງຝິ່ນ ເຊິ່ງສ່ວນຫລາຍເປັນຢາແກ້ປວດໃຫ້ຄົນເຈັບຫລາຍເກີນຄວາມຈຳເປັນ.
ປະຕິບັດການດັ່ງກ່າວໃຊ້ເວລາສືບສວນ-ສອບສວນກວ່າ 1 ປີ ເປັນການຮ່ວມມືລະຫວ່າງລັດຖະບານວໍຊິງຕັນກັບສຳນັກງານສອບສວນກາງ (FBI) ຖືເປັນການກວາດລ້າງເຄືອຂ່າຍສໍ້ໂກງດ້ານສາທາລະນະສຸກຄັ້ງໃຫຍ່ທີ່ສຸດໃນປະຫວັດສາດຂອງອາເມລິກາ ແລະ ປະນາມບຸກຄະລາກອນດ້ານສາທາລະນະສຸກທີ່ຕົກເປັນຜູ້ຕ້ອງຫາວ່າກະທຳຄວາມຜິດຈັນຍາບັນຢ່າງຮ້າຍແຮງ, ທັງການຂົມຂູ່ບັງຄັບໃຫ້ຊື້ປະກັນສຸຂະພາບ ແລະ ການທີ່ແພດເຈດຕະນາໃຫ້ຢາຜິດ ຫລື ໃຫ້ຢາບໍ່ຈຳເປັນ ເຊິ່ງສ້າງຄວາມເສຍຫາຍໃຫ້ແກ່ລະບົບສາທາລະນະສຸກຂອງປະເທດສູງເຖິງ 1.300 ລ້ານໂດລາສະຫະລັດ ແລະ ກ່ຽວພັນກັບການເສຍຊີວິດຂອງຄົນເຈັບເກືອບ 60.000 ຄົນ ທີ່ເປັນຜົນມາຈາກໄດ້ຮັບຢາເກີນຂະໜາດໃນປີຜ່ານມາ.
