IMF ເຕືອນທົ່ວໂລກໃຊ້ມາດຕະການ ກະຕຸ້ນເສດຖະກິດຢ່າງລະມັດລະວັງ
Geoffrey Okamoto ຮອງກຳມະການຜູ້ຈັດການອັນດັບໜຶ່ງຂອງກອງທຶນການເງິນສາກົນ ຫລື IMF ເຕືອນເຖິງສະຖານະການເສດຖະກິດໂລກໃນປັດຈຸບັນທີ່ກຳລັງຢູ່ລະຫວ່າງການຟື້ນຕົວຈາກຜົນກະທົບຂອງວິກິດໂຄວິດ-19 ທີ່ລະບາດໄປທົ່ວໂລກ ໂດຍລະບຸວ່າ: ລັດຖະບານ ແລະ ທະນາຄານກາງທົ່ວໂລກຈຳເປັນຕ້ອງພິຈາລະນາຄັດເລືອກມາດຕະການທີ່ຈະນຳມາໃຊ້ກະຕຸ້ນເສດຖະກິດປະເທດຢ່າງລະມັດລະວັງ ເພື່ອຫລີກລ່ຽງຜົນກະທົບຕໍ່ການເຕີບໃຫຍ່ຂອງເສດຖະກິດໃນໄລຍະປານກາງ ແລະ ໄລຍະຍາວຕໍ່ໄປ.
ສຳລັບບັນຫາທີ່ຕ້ອງລະມັດລະວັງໃນການເລືອກໃຊ້ມາດຕະການກະຕຸ້ນ ຄືລະດັບໜີ້ ແລະ ຄວາມບອບບາງໃນຂະແໜງການເງິນ ໂດຍສະຖານີໂທລະພາບ CNBC ລາຍງານວ່າ: ຄຳເຕືອນດັ່ງກ່າວສະທ້ອນຄວາມພະຍາຍາມຂອງ IMF ທີ່ຕ້ອງການຈະຮັກສາສົມດູນລະຫວ່າງຕົວເລກການເຕີບໃຫຍ່ທາງເສດຖະກິດໂລກ ກັບຄຸນນະພາບການເຕີບໃຫຍ່ຂອງເສດຖະກິດໂລກໃຫ້ເປັນໄປຢ່າງຍືນຍົງ.
ທັງນີ້, ກ່ອນໜ້ານີ້ IMF ຈະຍ້ອງຍໍຄວາມພະຍາຍາມຂອງລັດຖະບານອາເມລິກາໃນການຊຸກຍູ້ມາດຕະການກະຕຸ້ນເສດຖະກິດຊຸດໃຫຍ່ ເພື່ອຫວັງໃຫ້ເສດຖະກິດອາເມລິກາ ລວມທັງເສດຖະກິດໂລກສາມາດຟື້ນຕົວກັບມາໄດ້ຢ່າງວ່ອງໄວ, ແຕ່ IMF ຍັງໄດ້ອອກມາເຕືອນເຖິງຄວາມສ່ຽງຂອງມາດຕະການດັ່ງກ່າວທີ່ຈະຄຸກຄາມໂຄງສ້າງເສດຖະກິດໂລກໃນໄລຍະຍາວ.
Okamoto ກ່າວວ່າ: ມາດຕະການກະຕຸ້ນເສດຖະກິດເປັນປະໂຫຍດແນ່ນອນແບບບໍ່ມີຂໍ້ຕິ ແລະ ປະເທດຕ່າງໆມີສິດໃຊ້ເງິນງົບປະມານໃນການແກ້ໄຂເສດຖະກິດຂອງປະເທດ ຈົນກວ່າພົນລະເມືອງທຸກຄົນຈະສາມາດກັບມາຢືນໃນຊ່ວງທີ່ເສດຖະກິດເປີດອີກ.
ຂະນະດຽວກັນ, ເມື່ອຖາມວ່າມາດຕະການທີ່ໃຊ້ກັນຢູ່ຂອງທະນາຄານກາງໃນປັດຈຸບນເປັນຄວາມສ່ຽງທີ່ເຮັດໃຫ້ເກີດການເກັງກຳໄລຫລາຍເກີນໄປ ຫລື ບໍ່, Okamoto ຕອບວ່າ: ນະໂຍບາຍການເງິນທີ່ຫລຸດຜ່ອນນີ້ ຖ້າໃຊ້ໄປດົນໆຈະເຮັດໃຫ້ເກີດຄວາມສ່ຽງຕໍ່ຂະແໜງການເງິນທີ່ບໍ່ອາດຫລີກລ່ຽງໄດ້ ແລະ ລາຍງານສະຖຽນລະພາບການເງິນໂລກ ຫລື Global Financial Stability Report ລະບຸຈະແຈ້ງວ່າ: ລັດຖະບານຈຳເປັນຕ້ອງຄຳນຶງເຖິງຄວາມສ່ຽງດັ່ງກ່າວນຳ.
ຄຳເຕືອນຄັ້ງນີ້ມີຂຶ້ນຫລັງຈາກ IMF ຫາກໍຈະອອກມາປັບເພີ່ມຄາດຄະເນການເຕີບໃຫຍ່ຂອງເສດຖະກິດໂລກປີນີ້ວ່າຈະຢູ່ລະດັບ 6% ໂດຍເປັນອານິສົງຈາກການສັກວັກຊີນ ແລະ ແຜນກະຕຸ້ນເສດຖະກິດຂອງລັດຖະບານບັນດາປະເທດ ໂດຍສະເພາະອາເມລິກາ.
