ປະເທດເອີຣົບຈຳກັດການໃຊ້ ວັກຊີນແອສຕຣາເຊນເນກາ
ຫລາຍປະເທດໃນເອີຣົບອອກຂໍ້ຈຳກັດການນຳໃຊ້ວັກຊີນແອສຕຣາເຊນເນກາ ກັງວົນຜົນຂ້າງຄຽງ ຫລັງ EMA ຢືນຢັນມີສ່ວນເຮັດໃຫ້ເກີດຫລອດເລືອດອຸດຕັນ.
ວັນທີ 8 ເມສາ 2021, ປະເທດຕ່າງໆໃນເອີຣົບສະແດງຄວາມກັງວົນ ຫລັງຈາກອົງການຢາແຫ່ງສະຫະພາບເອີຣົບ (EMA) ໄດ້ອອກມາເປີດເຜີຍວ່າ: ມີຄວາມເປັນໄປໄດ້ທີ່ວັກຊີນປ້ອງກັນພະຍາດໂຄວິດ-19 ເຊິ່ງພັດທະນາໂດຍບໍລິສັດແອສຕຣາເຊນເນກາ ແລະ ມະຫາວິທະຍາໄລອອກຟອດ ມີສ່ວນເຮັດໃຫ້ເກີດອາການຫລອດເລືອດອຸດຕັນ ໂດຍຫລາຍປະເທດໄດ້ອອກຂໍ້ຈຳກັດໃຫ້ໃຊ້ວັກຊີນດັ່ງກ່າວສຳລັບປະຊາຊົນໃນຊ່ວງອາຍຸທີ່ກຳນົດໄວ້ເທົ່ານັ້ນ.
ພາຍຫລັງການເປີດເຜີຍຂອງ EMA ໜ່ວຍງານທີ່ປຶກສາດ້ານວັກຊີນຂອງອັງກິດ ໄດ້ອອກມາແນະນຳໃຫ້ຜູ້ທີ່ມີອາຍຸຕໍ່າກວ່າ 30 ປີ ຫລີກລ່ຽງໄປໃຊ້ວັກຊີນຊະນິດອື່ນ. ຂະນະດຽວກັນ ຝຣັ່ງ ແລະ ເບລຢ້ຽມ ໄດ້ມີການກຳນົດໃຫ້ສັກວັກຊີນຂອງແອສຕຣາເຊນເນກາໃຫ້ຜູ້ທີ່ມີອາຍຸ 55 ປີຂຶ້ນໄປ.
ສ່ວນປະເທດອື່ນໆເຊັ່ນ: ອິຕາລີ, ເຢຍລະມັນ, ສະເປນ, ເອສໂຕເນຍ ແລະ ເນເທີແລນ ມີການກຳນົດໃຫ້ຜູ້ທີ່ໄດ້ຮັບວັກຊີນແອສຕຣາເຊນເນກາຈະຕ້ອງມີອາຍຸຫລາຍກວ່າ 60 ປີຂຶ້ນໄປ.
ສ່ວນສະວີເດັນຈະສັກວັກຊີນດັ່ງກ່າວໃຫ້ຜູ້ທີ່ມີອາຍຸ 65 ປີຂຶ້ນໄປ ແລະ ໄອແລນໄດ້ກຳນົດອາຍຸຂອງຜູ້ທີ່ຈະໄດ້ຮັບການສັກວັກຊີນຂອງແອສຕຣາເຊນເນກາໄວ້ວ່າຈະຕ້ອງບໍ່ຕໍ່າກວ່າ 70 ປີ.
ຂະນະທີ່ເດນມາກ ແລະ ນໍເວຍັງຢຸດການສັກວັກຊີນຂອງແອສຕຣາເຊນເນກາໄວ້ຊົ່ວຄາວ.
ເຖິງຢ່າງໃດກໍຕາມ, EMA ຍັງຢືນຢັນວ່າ: ການສັກວັກຊີນປ້ອງກັນໂຄວິດ-19 ຂອງແອສຕຣາເຊນເນການັ້ນມີປະໂຫຍດຫລາຍກວ່າຄວາມສ່ຽງຈາກອາການຂ້າງຄຽງບໍ່ເພິ່ງປະສົງທີ່ອາດຈະເກີດຂຶ້ນ.
