ເຊກອງ ປະຕິບັດວິໄນສະມາຊິກພັກ 88 ຄົນ ຖານລະເມີດລະບຽບພັກ
ໃນ 5 ປີຜ່ານມາ ແຂວງເຊກອງໄດ້ປະຕິບັດວິໄນຕໍ່ສະມາຊິກພັກທີ່ເຮັດຜິດລະບຽບການຂອງພັກ ແລະ ກົດໝາຍຂອງລັດທັງໝົດ 88 ສະຫາຍ, ຍິງ 11 ສະຫາຍ, ໃນນັ້ນວິໄນຂັ້ນກ່າວເຕືອນ 16 ສະຫາຍ; ຂັ້ນປົດຕໍາແໜ່ງ 7 ສະຫາຍ; ຂັ້ນໂຈະການຮ່ວມຊີວິດພັກ 17 ສະຫາຍ ແລະ ຂັ້ນເອົາອອກຈາກພັກ 37 ສະຫາຍ.
ວັນທີ 6 ເມສານີ້, ແຂວງເຊກອງໄດ້ຈັດກອງປະຊຸມສະຫລຸບຕີລາຄາການເຄື່ອນໄຫວວຽກງານກວດກາ 5 ປີ (2016-2020) ພາຍໃຕ້ການເປັນປະທານຂອງທ່ານ ສົມນິດ ສີລິບຸນລ້ຽງ ປະທານກວດກາພັກແຂວງ ພ້ອມພາກສ່ວນກ່ຽວຂ້ອງເຂົ້າຮ່ວມ.
ໃນກອງປະຊຸມ ທ່ານ ອ່ອນມະນີວັນ ຈັນດາວົງ ຮອງປະທານກວດກາພັກແຂວງ ໃຫ້ຮູ້ວ່າ: ທົ່ວແຂວງມີ 7 ອົງຄະນະພັກ, 56 ຄະນະພັກຮາກຖານ ແລະ 463 ໜ່ວຍພັກ, ໃນນີ້ມີໜ່ວຍພັກສໍານັກງານ 228 ໜ່ວຍພັກ, ໜ່ວຍພັກຮາກຖານບ້ານ 235 ໜ່ວຍ, ມີສະມາຊິກພັກທັງໝົດ 33.543 ສະຫາຍ. ໃນ 5 ປີຜ່ານມາ ແຂວງໄດ້ປະຕິບັດວິໄນຕໍ່ການຈັດຕັ້ງພັກ ແລະສະມາຊິກພັກທີ່ມີການລະເມີດກົດລະບຽບພັກ ແລະກົດໝາຍຂອງລັດຄື: ໄດ້ປະຕິບັດວິໄນຕໍ່ການຈັດຕັ້ງພັກ 1 ໜ່ວຍພັກຮາກຖານ (ທສກ ເມືອງທ່າແຕງ), ປະຕິບັດວິໄນຕໍ່ຄະນະພັກ ແລະ ສະມາຊິກມີ 88 ສະຫາຍ, ຍິງ 11 ສະຫາຍ. ໃນນີ້ໄດ້ໄລ່ອອກຈາກພັກ 37 ສະຫາຍ, ຍິງ 5 ສະຫາຍ, ປົດຕໍາແໜ່ງ 7 ສະຫາຍ, ຍິງ 1 ສະຫາຍ, ກ່າວເຕືອນ 16 ສະຫາຍ, ຍິງ 4 ສະຫາຍ, ໂຈະຮ່ວມຊີວິດພັກ 17 ສະຫາຍ, ຍິງ 5 ສະຫາຍ.
ສໍາລັບທິດທາງແຜນການ ແລະ ມາດຕະການໃນການປະຕິບັດໃນຕໍ່ໜ້າ ຈະໄດ້ສືບຕໍ່ຕິດຕາມ, ກວດກາ, ຊຸກຍູ້ການຈັດຕັ້ງປະຕິບັດກົດລະບຽບພັກ ເປັນຕົ້ນການດຳເນີນຊີວິດການເມືອງພາຍໃນພັກ, ການປະຕິບັດລະບອບສ່ອງແສງລາຍງານຂອງບັນດາຮາກຖານພັກອ້ອມຂ້າງແຂວງໃຫ້ເຂົ້າສູ່ລວງເລິກ, ເປັນປົກກະຕິ ແລະ ເຂັ້ມງວດກວ່າເກົ່າ; ສຸມໃສ່ຕິດຕາມ, ຊຸກຍູ້ການປະຕິບັດສິກໜ້າທີ່, ແບບແຜນນໍາພາວິທີເຮັດວຽກ, ການປັບປຸງ-ກໍ່ສ້າງ ແລະ ຂະຫຍາຍພັກ, ການປະຕິບັດວິໄນຂອງພັກ, ການເງິນຂອງພັກ ແລະ ການຍ້ອງຍໍຂອງບັນດາຮາກຖານພັກອ້ອມຂ້າງແຂວງ ແລະ 4 ຕົວເມືອງ ໃຫ້ໄດ້ຢ່າງໜ້ອຍ 10 ເປົ້າໝາຍຂຶ້ນໄປໃນແຕ່ລະປີ.
