ສະເປນພົບເດັກເກີດໃໝ່ຄົນທຳອິດ ມີພູມຄຸ້ມກັນໂຄວິດ-19
ສະເປນພົບເດັກເກີດໃໝ່ມີພູມຄຸ້ມກັນໂຄວິດ-19 ຈາກແມ່ທີ່ໄດ້ຮັບວັກຊີນໃນລະຫວ່າງຖືພາ.
ວັນທີ 5 ເມສາ 2021, ເດັກເກີດໃໝ່ເພດຊາຍຄົນໜຶ່ງ ເຊິ່ງເກີດຢູ່ເກາະອິບິຊາ (Ibiza) ຂອງສະເປນ ໃນອາທິດຜ່ານມາ ໄດ້ກາຍມາເປັນເດັກເກີດໃໝ່ຄົນທຳອິດຂອງປະເທດທີ່ມີແອນຕິບໍດີປ້ອງກັນພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ຫລັງຈາກແມ່ຂອງລາວໄດ້ຮັບວັກຊີນປ້ອງກັນພະຍາດໂຄວິດ-19 ໃນຊ່ວງສາມເດືອນສຸດທ້າຍຂອງການຖືພາ.
ໜັງສືພິມ ABC ຂອງສະເປນ ລາຍງານວ່າ: ຜູ້ຊ່ຽວຊານໄດ້ເກັບຕົວຢ່າງຈາກສາຍສະບືຂອງເດັກໄປວິເຄາະຢູ່ໂຮງໝໍ ຊອນເອສປາເຊສ (Hospital Son Espases) ໃນເກາະມາຢໍກາ ແລະ ຜົນອອກມາສາມາດຢືນຢັນໄດ້ວ່າ: ເດັກນ້ອຍຄົນດັ່ງກ່າວມີແອນຕິບໍດີຕໍ່ຕ້ານໂຄວິດ-19 ໃນຮ່າງກາຍ.
ມານູເອລ ແກຣນດັດ ມາຣຕິນ ຮອງຜູ້ອຳນວຍການຂອງຄະນະກຳມະການໂຮງໝໍມາດຣິດ ກ່າວກັບນັກຂ່າວວ່າ: ເດັກນ້ອຍຄົນນີ້ມີພູມຄຸ້ມກັນທຽບເທົ່າຜູ້ທີ່ໄດ້ຮັບວັກຊີນປ້ອງກັນພະຍາດໂຄວິດ-19.
ອ້າງອີງ: https://www.xinhuathai.com/high/190843_20210404
