ຟີລິບປິນເປີດທາງເອກະຊົນຊື້ວັກຊີນ ຫວັງສັກໃຫ້ປະຊາຊົນຈຳນວນຫລາຍ
ຟີລິບປິນອະນຸຍາດໃຫ້ເອກະຊົນນຳເຂົ້າວັກຊີນໂຄວິດ-19 ເພື່ອໃຫ້ປະຊາຊົນສາມາດເຂົ້າເຖິງວັກຊີນໄດ້ງ່າຍຂຶ້ນ ແລະ ຊ່ວຍເລັ່ງຄວາມໄວໃນການເປີດເສດຖະກິດ.
ວັນທີ 2 ເມສາ 2021, ທ່ານ ໂຣດຣິໂກ ດູເຕີເຕ ປະທານາທິບໍດີຟີລິບປິນ ອອກມາເປີດເຜີຍໃນລະຫວ່າງການຖະແຫລງຂ່າວທາງໂທລະພາບວ່າ: ຟີລິບປິນຈະເປີດທາງໃຫ້ບໍລິສັດເອກະຊົນສາມາດນຳເຂົ້າວັກຊີນຕ້ານພະຍາດໂຄວິດ-19 ໄດ້ຕາມຕ້ອງການ.
ທ່ານ ດູເຕີເຕ ກ່າວວ່າ: “ຂະແໜງທຸລະກິດສາມາດຕິດຕໍ່ແຫລ່ງຜະລິດ ແລະ ນຳເຂົ້າວັກຊີນໂຄວິດ-19 ໄດ້ເອງ ແລະ ນຳມາສັກໃຫ້ພະນັກງານຂອງພວກເຂົາ ເພື່ອໃຫ້ປະເທດສາມາດກັບມາເປີດເສດຖະກິດໄດ້ອີກ”.
ການເຄື່ອນໄຫວຫລ້າສຸດນີ້ເກີດຂຶ້ນທ່າມກາງຄວາມຄາດຫວັງທີ່ວ່າ: ການສັກວັກຊີນໃຫ້ປະຊາຊົນຈຳນວນຫລາຍຈະຊ່ວຍກະຕຸ້ນໃຫ້ເສດຖະກິດຟື້ນຕົວ, ຂະນະທີ່ຟີລິບປິນກຳລັງຜະເຊີນສະພາບເສດຖະກິດຫລຸດຖອຍ ເຊິ່ງຍືດເຍື້ອມາຍາວນານ ລວມທັງການແຜ່ລະບາດຮອບໃໝ່ທີ່ເກີດຂຶ້ນໃນພື້ນທີ່ເສດຖະກິດສຳຄັນຂອງປະເທດ. ອີກທັງໂຄງການວັກຊີນຍັງຕາມຫລັງປະເທດໃກ້ຄຽງໃນອາຊີຕາເວັນອອກສຽງໃຕ້.
