ອີຢິບກຽມຮຽກຮ້ອງຄ່າເສຍຫາຍ ຈາກເຫດເຮືອຂວາງຄອງສຸເອຊ
ໜ່ວຍງານເບິ່ງແຍງຄອງສຸເອຊອາດຮຽກຮ້ອຄ່າເສຍຫາຍປະມານ 1 ພັນລ້ານໂດລາ ແຕ່ຍັງບໍ່ລະບຸວ່າຮຽກຮ້ອງຈາກໃຜ.
ວັນທີ 1 ເມສາ 2021, ສຳນັກຂ່າວ Bloomberg ລາຍງານຄຳໃຫ້ສຳພາດຂອງທ່ານ ໂອຊາມາ ຣາບີ CEO ຂອງໜ່ວຍງານບໍລິການແກ້ໄຂຄອງສຸເອຊ ທີ່ອອກມາເປີດເຜີຍວ່າ: ທາງໜ່ວຍງານອາດມີການຮຽກຮ້ອງຄ່າເສຍຫາຍ ຈາກເຫດການເຮືອຍັກ Ever Given ກີດຂວາງຄອງສຸເອຊຈົນເຮັດໃຫ້ເຮືອລຳອື່ນບໍ່ສາມາດສັນຈອນຜ່ານໄດ້.
ຕາມລາຍງານລະບຸວ່າ: ຄ່າເສຍຫາຍທີ່ຈະຮຽກຮ້ອງນັ້ນປະມານ 1 ພັນລ້ານໂດລາສະຫະລັດ ເຊິ່ງເປັນຕົວເລກປະມານຈາກຄ່າຜ່ານທາງ, ຄວາມເສຍຫາຍທີ່ເກີດຂຶ້ນຈາກການຂຸດຄອງ ແລະ ກູ້ເຮືອ, ຄ່າອຸປະກອນ ແລະ ຄ່າແຮງງານ.
ທ່ານ ຣາບີ ໃຫ້ສຳພາດວ່າ: ການຮຽກຮ້ອງຄ່າເສຍຫາຍນີ້ເປັນສິດຂອງປະເທດອີຢິບ. ເຫດການນີ້ເຮັດໃຫ້ປະເທດເສື່ອມເສຍຊື່ສຽງ ແລະ ຄວນໄດ້ຮັບການຊົດເຊີຍ. ເຖິງຢ່າງໃດກໍດີ ຍັງບໍ່ມີການລະບຸວ່າທາງໜ່ວຍງານຈະຮຽກຮ້ອງຄ່າເສຍຫາຍຈາກຜູ້ໃດ.
ດ້ານ Evergreen Marine Corp ບໍລິສັດແລ່ນເຮືອສັນຊາດໄຕ້ຫວັນທີ່ເປັນຜູ້ໃຫ້ບໍລິການເຮືອ Ever Given ເປີດເຜີຍວ່າ: ບໍລິສັດບໍ່ຕ້ອງຮັບຜິດຊອບຕໍ່ຄວາມຊັກຊ້າທີ່ເກີດຂຶ້ນຕໍ່ລູກຄ້າ ເນື່ອງຈາກໃນສັນຍາບໍ່ໄດ້ຮັບປະກັນວ່າຈະຕ້ອງສົ່ງສິນຄ້າໃນເມື່ອໃດ ແລະ ກໍລະນີທີ່ມີຄວາມເສຍຫາຍເກີດຂຶ້ນ ບໍລິສັດປະກັນໄພຈະເປັນຜູ້ຮັບຜິດຊອບໃນສ່ວນດັ່ງກ່າວ.
ປັດຈຸບັນ ເຮືອ Ever Given ຍັງຢູ່ໃນພື້ນທີ່ທີ່ເອີ້ນວ່າ: Great Bitter Lake ທີ່ຢູ່ເລິກເຂົ້າໄປໃນຄອງສຸເອຊປະມານເຄິ່ງທາງ. ໃນທາງທິດສະດີແລ້ວ ອີຢິບສາມາດສັ່ງຫ້າມບໍ່ໃຫ້ເຮືອອອກນອກປະເທດໄດ້ກໍລະນີທີ່ມີການຟ້ອງຮ້ອງໃນສານ, ແຕ່ທ່ານ ຣາບີ ຍອມຮັບວ່າ: ໂອກາດເກີດຂຶ້ນໜ້ອຍ ເນື່ອງຈາກອີຢິບມີການພົວພັນທີ່ດີມາຍາວນານກັບເຈົ້າຂອງເຮືອ.
ອ້າງອີງ:
https://www.bloomberg.com/…/egypt-may-seek-1-billion-in…
