WHO ກຽມເປີດລາຍງານຜົນສືບຕົ້ນຕໍໂຄວິດ-19 ຊີ້ໄວຣັສມີທ່າອ່ຽງແຜ່ຈາກສັດສູ່ຄົນ ບໍ່ໄດ້ຫລຸດຈາກຫ້ອງທົດລອງ
ອົງການອະນາໄມໂລກ (WHO) ກຽມເປີດເຜີຍລາຍງານສະຫລຸບຜົນການສືບສວນທີ່ມາຂອງການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່ 2019 (SARS-CoV-2) ເຊິ່ງເປັນສາເຫດຂອງພະຍາດໂຄວິດ-19 ໃນວັນທີ 30 ມີນາ ຫລັງຈາກສົ່ງທີມສືບສວນເດີນທາງໄປກວດສອບຕົ້ນຕໍການລະບາດຢູ່ເມືອງອູ່ຮັ່ນ ມົນທົນຫູເປີຍຂອງຈີນ ເປັນເວລາ 28 ວັນ ນັບແຕ່ວັນທີ 14 ມັງກອນ – 10 ກຸມພາຜ່ານມາ.
ໂດຍສຳນັກຂ່າວ CNN ເຜີຍແຜ່ຂໍ້ມູນເບື້ອງຕົ້ນຂອງລາຍງານສະບັບຮ່າງຈາກ WHO ທີ່ໄດ້ຮັບມາ ພົບວ່າ: ເຊື້ອໂຄວິດ-19 ອາດເລີ່ມແຜ່ລະບາດຈາກສັດສູ່ຄົນ ໂດຍເລີ່ມຕົ້ນການແຜ່ລະບາດບໍ່ເກີນຊ່ວງ 1-2 ເດືອນກ່ອນຈະມີລາຍງານກໍລະນີລະບາດຄັ້ງທຳອິດໄລຍະເດືອນທັນວາ 2019.
ຮ່າງລາຍງານດັ່ງກ່າວລະບຸວ່າ: ພົບ 4 ແຫລ່ງທີ່ມາການລະບາດຂອງໄວຣັສທີ່ເປັນໄປໄດ້ ເຊິ່ງກໍລະນີທີ່ມີຄວາມເປັນໄປໄດ້ຫລາຍທີ່ສຸດຄື ໄວຣັສແຜ່ລະບາດຜ່ານສັດພາຫະຕົວກາງ ເຊິ່ງເປັນໄປໄດ້ວ່າອາດເປັນສັດປ່າທີ່ຖືກມະນຸດຈັບ ແລະ ນຳມາລ້ຽງໃນຟາມ.
ສຳລັບແຫລ່ງຕົ້ນກຳເນີດຂອງໄວຣັສ SARS-CoV-2 ທີ່ເປັນໄວຣັສໃນຕະກູນໂຄໂຣນານັ້ນມາຈາກເຈຍ, ແຕ່ຈາກການສືບສວນບໍ່ພົບວ່າສັດຫຍັງທີ່ຕິດເຊື້ອໄວຣັສຊະນິດນີ້ ແລະ ກາຍເປັນພາຫະຕົວກາງກ່ອນແຜ່ລະບາດສູ່ຄົນ.
ກໍລະນີທີ່ເປັນໄປໄດ້ຮອງລົງມາຄື ການແຜ່ລະບາດທາງກົງ ຈາກສັດທີ່ເປັນຕົ້ນຕໍໄວຣັສຊະນິດນີ້ຄືເຈຍ ຫລື ຫລິ່ນສູ່ຄົນ ແລະ ອີກກໍລະນີຄື ຈາກອາຫານແຊ່ແຂງ. ສ່ວນກໍລະນີທີ່ເປັນໄປໄດ້ໜ້ອຍທີ່ສຸດຄື ອຸປະຕິເຫດໃນຫ້ອງປະຕິບັດການທີ່ເຮັດໃຫ້ເຊື້ອໄວຣັສຫລຸດອອກມາ.
ທັງນີ້, ຜ່ານມາ ດຣ. ໂຣເບີດ ເຣດຟິລ ອະດີດຜູ້ອຳນວຍການສູນຄວບຄຸມ ແລະ ປ້ອງກັນພະຍາດລະບາດຂອງອາເມລິກາ (CDC) ໃຫ້ຄວາມເຫັນໂດຍເຊື່ອວ່າ: ໄວຣັສທີ່ເປັນຕົ້ນຕໍຂອງໂຄວິດ-19 ນັ້ນອາດຈະຖືກປ່ອຍອອກມາຈາກຫ້ອງປະຕິບັດການ.
ຂະນະທີ່ຂໍ້ມູນໃນລາຍງານລະບຸຈະແຈ້ງວ່າ: “ບໍ່ອາດເປັນໄປໄດ້” ເພາະບໍ່ມີບັນທຶກຂອງໄວຣັສທີ່ກ່ຽວຂ້ອງຢ່າງໃກ້ຊິດ ຫລື ມີຂໍ້ມູນພັນທຸກຳທີ່ກົງກັບ SARS-CoV-2 ໃນຫ້ອງປະຕິບັດການໃດໆກ່ອນຊ່ວງເດືອນທັນວາ 2019.
ສຳລັບຕະຫລາດອາຫານທະເລຫົວໜານໃນອູ່ຮັ່ນ ທີ່ເຄີຍຖືກສົງໄສວ່າເປັນຕົ້ນຕໍການລະບາດ ພົບວ່າຍັງບໍ່ມີຄວາມຈະແຈ້ງ ແລະ ເປັນໄປໄດ້ວ່າອາດບໍ່ແມ່ນແຫລ່ງຕົ້ນກຳເນີດຂອງການລະບາດ, ແຕ່ຈາກຝູງຊົນຈຳນວນຫລາຍທີ່ຢູ່ພາຍໃນຕະຫລາດ ບວກກັບຫລັງຄາ ແລະ ທໍ່ລະບາຍນ້ຳໃນຕະຫລາດແບບເປີດ ອາດມີສ່ວນໃຫ້ການແຜ່ລະບາດຂະຫຍາຍວົງກວ້າງຂຶ້ນ.
ຂະນະທີ່ກຸ່ມກວດຕົວຢ່າງໄວຣັສໃຊ້ການເກັບໄວຣັສທີ່ຕິດຢູ່ພື້ນຜິວບໍ່ແມ່ນຈາກຕົວຢ່າງສັດ ຫລື ອາຫານທີ່ຂາຍໃນຕະຫລາດ. ນອກຈາກນີ້ ຍັງມີຫລັກຖານວ່າວົງຈອນການລະບາດຂອງໄວຣັສນັ້ນເກີດຂຶ້ນກ່ອນການລະບາດຢູ່ຕະຫລາດຫົວໜານ ລວມທັງຕະຫລາດອື່ນໆໃນອູ່ຮັ່ນ.
ລາຍງານສືບສວນສະບັບນີ້ຂຽນໂດຍທີມສືບສວນຮ່ວມລະຫວ່າງປະເທດ ປະກອບມີຜູ້ຊ່ຽວຊານຈີນ 17 ຄົນ ແລະ ຜູ້ຊ່ຽວຊານອີກ 17 ຄົນຈາກປະເທດອື່ນໆ, WHO ເຄືອຂ່າຍແຈ້ງເຕືອນ ແລະ ຮັບມືການແຜ່ລະບາດທົ່ວໂລກ (GOARN), ອົງການພະຍາດລະບາດສັດສາກົນ (OIE), ສ່ວນອົງການອາຫານ ແລະ ກະສິກຳແຫ່ງສະຫະປະຊາຊາດ (FAO) ສົ່ງເຈົ້າໜ້າທີ່ເຂົ້າຮ່ວມສັງເກດການ.
ອ້າງອີງ:
https://edition.cnn.com/…/who-coronavirus…/index.html…
