ມື້ນີ້ ເປັນມື້ລາໜ້າທີ່ຂອງປະທານສະພາແຫ່ງຊາດຂອງຫວຽດນາມ

ອີງຕາມການລາຍງານຂອງສຳນັກຂ່າວສານຂອງຫວຽດນາມ “ຫວຽດນາມເນັດ” ໃຫ້ຮູ້ວ່າ ມື້ນີ້ວັນທີ 30 ມີນາ ເປັນມື້ທີ່ປະທານສະພາແຫ່ງຊາດຂອງຫວຽດນາມ ຫງວຽນຖິກີມເງິນ ລາອອກຈາກໜ້າທີ່ເປັນປະທານສະພາແຫ່ງຊາດຂອງຫວຽດນາມ ແລະ ຈະເລືອກຕັ້ງປະທານຄົນໃໝ່ຫຼັງຈາກນັ້ນໜຶ່ງວັນ.

ອີງຕາມຜົນຂອງກອງປະຊຸມໃຫ່ຍຄັ້ງທີ່ 13 ຂອງພັກຄອມມຸຍນິດ ຫວຽດນາມ, ປະທານສະພາແຫ່ງຊາດ ຫງວຽນຖິກີມເງິນ ພ້ອມກັບການນຳຂັ້ນສູງຄົນອື່ນໆ ຈຳນວນໜຶ່ງ ໃນຄະນະລັດບານບໍ່ໄດ້ຮັບສະໝັກເລືອກຕັ້ງຄືນໃໝ່ໃນກົມການເມືອງ, ໃນກຳມະການສູນກາງພັກ. ດັ່ງນັ້ນ ຈຶ່ງເປັນອັນວ່າ ບັນດາການນຳເຫຼົ່ານັ້ນຈຶ່ງບໍ່ໄດ້ມີໜ້າທີ່ຄວາມຮັບຜິດຊອບຫຍັງໃນ ຄະນະລັດຖະບານຊຸດໃໝ່.

ພາຍຫຼັງ ຄະນະປະຈຳສະພາແຫ່ງຊາດປະກາດການລາອອກຂອງປະທານສະພາແຫ່ງຊາດແລ້ວ, ຕອນບ່າຍຂອງມື້ນີ້ 30 ມີນາ ບັນດາຜູ້ແທນຈະຄົ້ນຄວ້າ ແລະ ລົງຄະແນນສຽງລັບຮັບຮອງການລາອອກຢ່າງເປັນທາງການຂອງປະທານສະພາແຫ່ງຊາດ ຫງວຽນຖິກີມເງິນ, ກ່ອນທີ່ຄະນະປະຈຳສະພາແຫ່ງຊາດຈະສະເໜີບຸກຄະລາກອນ ທີ່ຈະສະໝັກຮັບເລືອກຕັ້ງເປັນປະທານສະພາຄົນໃໝ່.