10 ບ້ານຂອງເມືອງທ່າປາງທອງ ໄດ້ຮັບເຄື່ອງຊ່ວຍເຫລືອຈາກອົງການກາແດງລາວ

ໃນວັນນທີ 26-29 ມີນານີ້, ອົງການກາແດງລາວໄດ້ນຳເອົາເຄື່ອງຊ່ວຍເຫລືອບັນເທົາທຸກປະກອບມີ: ເຂົ້າສານອາຫານແຫ້ງ, ເຄື່ອງສຸຂະອະນາໄມ, ຢາ ທີ່ຈຳເປັນ ແລະ ນ້ຳດື່ມ ຈຳນວນ 612 ຊຸດ ລວມມູນຄ່າຫລາຍກວ່າ 193ລ້ານກີບ ໃຫ້ປະຊາຊົນຜູ້ທີ່ໄດ້ຮັບຜົນກະທົບຈາກໄພພິບັດໃນປີຜ່ານມາເພື່ອບັນເທົາທຸກ 10 ບ້ານທີ່ຂຶ້ນກັບເມືອງທ່າປາງທອງ ແຂວງສະຫວັນນະເຂດ ຄື: ເຊປ່ອງ, ລະວາງໃຫຍ່, ໂນສີວິໄລ, ຫີນຕັ້ງກາງ, ຜືວຽງຄຳ, ນາຈັນທາງ, ແກ້ງສັງກູ, ນາທະມານ, ນາພະນຽດ ແລະ ບ້ານ ທ່າພີ ມີ 612 ຄອບຄົວ, ພົນລະເມືອງທັງໝົດ 4.346 ຄົນ. ເຄື່ອງດັ່ງກ່າວໂດຍໄດ້ຮັບການສະໜັບສະໜູນຈາກ ສະພາກາແດງ ສາທາລະນະລັດເກົາຫລີ.

ໂອກາດນີ້, ທ່ານປະທານອົງການກາແດງລາວ ໄດ້ເນັ້ນໃຫ້ປະຊາຊົນບຸກບືນຫ້າວຫັນໃນການທຳມາຫາກິນ, ທຳການຜະລິດຢ່າງຕໍ່ເນື່ອງ, ມີຄວາມສາມັກຄີປອງດອງ ຊ່ວຍເຫລືອເຊິ່ງກັນ ແລະ ກັນ ແລະ ຈົ່ງພ້ອມກັນໃຊ້ສອຍເຄື່ອງຂອງທີ່ໄດ້ຮັບໃນຄັ້ງນີ້ຢ່າງປະຍັດ.