ຄະນະກຳມະການຮ່ວມມືລາວ-ຈີນ ຫາລືແຜນທິດທາງຮ່ວມມື ຢູ່ແຂວງອຸດົມໄຊ

ເພື່ອຊຸກຍູ້ການຜັນຂະຫຍາຍ ຜົນສໍາເລັດ “ກອງປະຊຸມ ຄັ້ງທີ X ຂອງຄະນະກໍາມະການຮ່ວມມືເສດຖະກິດ, ການຄ້າ ແລະ ເຕັກນິກລາວ-ຈີນ, ຈີນ-ລາວ” ແລະ “ກອງປະຊຸມ ຄັ້ງທີ XI ຂອງຄະນະປະສານງານພາກເໜືອຂອງລາວ ກັບ ແຂວງຢຸນນານ ສປ ຈີນ”, ໃນວັນທີ 25 ມີນາຜ່ານມາ ຄະນະກໍາມະການຮ່ວມມືລາວ-ຈີນ ໄດ້ຈັດກອງປະຊຸມເຜີຍແຜ່ ແລະ ຜັນຂະຫຍາຍຜົນສໍາເລັດ ຂອງກອງປະຊຸມດັ່ງກ່າວ ຂຶ້ນທີ່ແຂວງ ອຸດົມໄຊ, ໂດຍການເຂົ້າຮ່ວມຂອງ ທ່ານ ແຄນທອງ ສີສຸວົງ ຮອງປະທານຄະນະກໍາມະການຮ່ວມມືລາວ-ຈີນ ແລະ ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງໆ ອຸດົມໄຊ.

ໃນກອງປະຊຸມ ໄດ້ພ້ອມກັນສະຫລຸບຕີລາຄາ ການຈັດຕັ້ງປະຕິບັດວຽກງານການຮ່ວມມືດ້ານເສດຖະກິດ, ເຕັກນິກ ແລະ ການຄ້າ ລະຫວ່າງ ລາວ-ຈີນ, ກົນໄກການຮ່ວມມື ລະຫວ່າງ ແຂວງພາກເໜືອຂອງລາວ ກັບ ແຂວງ ຢຸນນານ ຂອງຈີນ ໃນໄລຍະທີ່ຜ່ານມາ, ພ້ອມທັງປຶກສາຫາລື ແລະ ສະເໜີທິດທາງແຜນການຮ່ວມມືໃນປີຕໍ່ໜ້າ; ນອກນັ້ນ ໄດ້ອະທິບາຍໃຫ້ບັນດາຂະແໜງການຂັ້ນສູນກາງ ແລະ ພະແນກການຂັ້ນທ້ອງຖິ່ນ ຮັບຮູ້ ແລະ ເຂົ້າໃຈ ກ່ຽວກັບລັກສະນະຈຸດພິເສດ, ຂັ້ນຕອນ ແລະ ເງື່ອນໄຂ ການສະເໜີຂໍການຊ່ວຍເຫລືອຈາກ ສປ ຈີນ, ແນໃສ່ປະກອບສ່ວນເສີມຂະຫຍາຍການພົວພັນ ຮ່ວມມືເສດຖະກິດ ການຄ້າ ແລະ ເຕັກນິກຂອງລາວ-ຈີນ ໃຫ້ເຕີບຂະຫຍາຍຕົວ ແລະ ມີປະສິດທິຜົນນັບມື້ນັບສູງຂຶ້ນ.

ໄລຍະຜ່ານມາ, ໂດຍປະຕິບັດຕາມເນື້ອໃນຈິດໃຈການຕົກລົງເປັນເອກະພາບ ຂອງການນຳສູງສຸດຂອງສອງປະເທດ ທີ່ພ້ອມກັນກຳນົດວ່າ ສາຍພົວພັນຂອງສອງປະເທດ ແມ່ນສາຍພົວພັນແບບຄູ່ຮ່ວມມືຍຸດທະສາດຮອບດ້ານ, ບົນພື້ນຖານເປັນເພື່ອນບ້ານໃກ້ຄຽງທີ່ດີ, ເພື່ອນສະຫາຍທີ່ດີ ແລະ ຄູ່ຮ່ວມມືທີດີ, ສອງປະເທດພວມຈັດຕັ້ງປະຕິບັດແຜນແມ່ບົດການສ້າງຄູ່ຮ່ວມຊາຕາກໍາ ລາວ-ຈີນ ແລະ ປີ 2021 ໄດ້ກໍານົດເປັນປີມິດຕະພາບລາວ-ຈີນ. ຄະນະກຳມະການຮ່ວມມືລາວ-ຈີນ ໃນນາມເປັນເສນາທິການໃຫ້ແກ່ພັກ ແລະ ລັດຖະບານ, ໄດ້ຄົ້ນຄ້ວາ ແລະ ຜັນຂະຫຍາຍນະໂຍບາຍການຮ່ວມມື ລະຫວ່າງ ສອງຝ່າຍ, ເສີມສ້າງການພົວພັນຮ່ວມມືລະຫວ່າງສອງຝ່າຍ, ເສີມສ້າງການພົວພັນຮ່ວມມືທາງດ້ານເສດຖະກິດ, ການຄ້າ ແລະ ເຕັກນິກ ລະຫວ່າງ ສອງປະເທດ ລາວ ແລະ ຈີນ ອັນໄດ້ເຮັດໃຫ້ສາຍພົວພັນມິດຕະພາບ ແລະ ການຮ່ວມມືຂອງສອງປະເທດ ນັບມື້ໄດ້ຂະຫຍາຍຕົວກ້າວເຂົ້າສູ່ລວງເລິກ, ເຊິ່ງສາມາດເຫັນໄດ້ ຈາກຕົວເລກການຊ່ວຍເຫລືອລ້າ ໃຫ້ແກ່ລັດຖະບານລາວ ເຂົ້າໃນການປະຕິບັດໂຄງການຕ່າງໆ, ກໍຄືການກໍ່ສ້າງ ແລະ ຝຶກອົບຮົມຊັບພະຍາ ກອນມະນຸດ ນັບມື້ເພີ່ມຂຶ້ນ. ນອກນັ້ນ ການຄ້າລາວ-ຈີນ ກໍຈັດຢູ່ໃນອັນດັບ 2 ຂອງຄູ່ຄ່າຕ່າງປະເທດຂອງລາວ, ການລົງທຶນຖືວ່າຈີນເປັນຜູ້ລົງທຶນອັນດັບໃຫຍ່ທີໜຶ່ງຂອງລາວອີກດ້ວຍ.