ພາຍຸຊາຍປົກຄຸມນະຄອນຫຼວງ ປັກກິງ ຄັ້ງທີ 2 ສ້າງມົນລະພິດຢ່າງຮ້າຍແຮງ
ສຳນັກຂ່າວຕ່າງປະເທດ ລາຍງານວັນທີ 28 ມີນານີ້ ໃຫ້ຮູ້ວ່າ ທ້ອງຟ້າໃນນະຄອນຫຼວງປັກກິງ ຖືກປົກຄຸມໄປດ້ວຍຝຸ່ນຊາຍ ກະທົບຕໍ່ສຸຂະພາບຂອງປະຊາຊົນ.
ລັດຖະບານປັກກິງ ໃຫ້ຮູ້ວ່າ ພາຍຸຝຸ່ນຊາຍ ຖືກເຄື່ອນຍ້າຍມາຈາກ ປະເທດ ມົງໂກລເລຍ ຊຶ່ງເກີດຂຶ້ນຈາກພາວະອາກາດອົບອຸ່ນຂອງລະດູບານໃໝ່ ແຕ່ບໍ່ມີຝົນໂຮຍຮຳລົງມາ ຈຶ່ງເຮັດໃຫ້ພາຍຸຊາຍເກີດຂຶ້ນ ປົກຄຸມນັບທັງ ມົງໂກລເລຍ, ປັກກິງ ແລະ ບັນດາແຂວງ ໃກ້ຄຽງ.
ວິໄສທັດໃນການເບິ່ງເຫັນຢູ່ບາງຈຸດໃນນະຄອນຫຼວງ ປັກກິງມີພຽງແຕ່ 1.000 ມ ເທົ່ານັ້ນ, ບັນດາຕຶກສູງ ກໍລ້ວນແຕ່ຖືກປົກຄຸມໄປດ້ວຍ ຝຸ່ນຊາຍ. ຜູ້ຄົນເດີນຕາມຖະໜົນຕ້ອງປິດໃບໜ້າໃບຕາ ແລະ ຮ່າງກາຍ. ຄຸນນະພາບອາກາດໃນ ນະຄອນຫຼວງ ປັກກິງ ເກີດມົນລະພິດກາຍຂີດ 500 ຊຶ່ງເປັນມົນລະພິດທີ່ສູງທີ່ສຸດ. ສ່ວນຝຸ່ນລະອອງຂະໜາດນ້ອຍ PM 2.5 ເກີນຂີດ 300, ເກີນລະດັບມາດຕະຖານ 35 ເທົ່າ ຊຶ່ງມີຄວາມເປັນອັນຕະລາຍເຖິງສຸຂະພາບ, ສ່ວນລະອອງຝຸ່ນ PM 10 ທີ່ລອຍຢູ່ກາງອາກາດເກີນຂີດ 2.000 micrograms ໃນແຕ່ລະ m3 ໃນອາກາດ.
ຝຸ່ນ PM10 ແລະ PM 2.5 ເປັນສາເຫດພາໃຫ້ເກີດພະຍາດເສັ້ນເລືອດຫົວໃຈ, ພະຍາດປອດ,…
ເຈົ້າໜ້າທີ່ກ່ຽວຂ້ອງ ຮຽກຮ້ອງໃຫ້ປະຊາຊົນຢູ່ໃນເຮືອນ ອັດປະຕູ ປ່ອງຢ້ຽມໃຫ້ແຈບ. ນີ້ເປັນຄັ້ງທີ 2 ທີ່ປັກກິງ ປະເຊີນກັບບັນຫາພາຍຸຊາຍໃນຮອບ 2 ອາທິດທີ່ຜ່ານມາ.
