ຄີມຈອງອູນ ຜູ້ນຳເກົາຫຼີເໜືອ ຈະສ້າງຫ້ອງພັກສຳລັບຄົວເຮືອນໃຫ້ກັບປະຊາຊົນໃຫ້ໄດ້ 50.000 ຫ້ອງ
ສຳນັກຂ່າວຕ່າງປະເທດ ລາຍງານເມື່ອວັນທີ 26 ມີນານີ້ ວ່າ ວັນທີ 23 ມີນາ ຜ່ານມາ ທ່ານ ປະທານ ຄີມຈອງອູນ ຂອງເກົາຫຼີເໜືອ ໄດ້ເຂົ້າຮ່ວມພິທີເປີດໂຄງການກໍ່ສ້າງທີ່ໃຫ່ຍທີ່ສຸດຂອງປະເທດ ໃນຮອບຫຼາຍປີທີ່ຜ່ານມາ.
ໂຄງການດັ່ງກ່າວເປັນໂຄງການທີ່ທັນສະໄໝ, ຄາດວ່າຈະມີເຖິງ 50.000 ຫ້ອງຄົວເຮືອນ ໃຫ້ກັບປະຊາຊົນໃນນະຄອນຫຼວງ ພຽງຢາງ. ຊຶ່ງນັ້ນມັນຄືພັນທະໜ້າທີ່ ແລະ ແຜນການສ້າງສາພັດທະນານະຄອນຫຼວງ ທີ່ມະຕິກອງປະຊຸມໃຫ່ຍຄັ້ງທີ 8 ຂອງພັກແຮງງານຂອງເກົາຫຼີເໜືອວາງອອກ ຫວ່າງບໍ່ດົນມານີ້.
ການກໍ່ສ້າງທີ່ຢູ່ອາໄສໃຫ້ກັບປະຊາຊົນນັ້ນ ມັນສະແດງໃຫ້ເຫັນກຳລັງແຮງສັງລວມຂອງຊາດ, ມັນແມ່ນໜ້າທີ່ທີ່ສຳຄັນຂອງຄະນະພັກ ແລະ ອົງການປົກຄອງຂັ້ນຕ່າງໆ.
ໃນປີນີ້, ພຽງຢາງວາງເປົ້າໄວ້ວ່າ ຈະໃຫ້ສຳເລັດ 10.000 ຫ້ອງຄົວເຮືອນໃຫ້ປະຊາຊົນໃນນະຄອນຫຼວງພຽງຢາງ ພ້ອມກັບໂຄງການອື່ນໆອີກ ໃນທົ່ວເກົາຫຼີເໜືອ. ໂຄງການດັ່ງກ່າວ ແມ່ນກອງທັບເປັນຜູ້ຮັບຜິດຊອບໃນການຈັດຕັ້ງປະຕິບັດ.
ໃນພິທີດັ່ງກ່າວ ທ່ານ ຄີມຈອງອູນ ຮຽກຮ້ອງໃຫ້ຜູ້ທີ່ເຂົ້າຮ່ວມ ໂຄງການກໍ່ສ້າງດັ່ງກ່າວ ນັບຕັ້ງແຕ່ນັກວິສາວະກອນ, ນາຍທະຫານ, ກຳມະກອນກໍ່ສ້າງ…ຈົ່ງເຮັດວຽກດ້ວຍຄວາມທຸ່ມເທ ແລະ ມີຄວາມຮັບຜິດຊອບ ເພື່ອເຮັດໃຫ້ຄຳໝັ້ນສັນຍາຂອງພັກຕໍ່ປະຊາຊົນປະກົດຜົນເປັນຈິງ.
