ອີກ 1 ເດືອນ ລາວຈະສົ່ງອອກງົວ 3.000 ໂຕໃຫ້ຈີນ
ວັນທີ 26 ມີນາ 2021 ແຂວງຫລວງນໍ້າທາ ໄດ້ມີພິທີເອົາງົວພັນຊີ້ນ 3.000 ໂຕ ເຂົ້າສູນກັກກັນປອດພະຍາດ 30 ວັນ ເພື່ອກຽມສົ່ງອອກໃຫ້ຈີນ.
ທ່ານ ຈັນພິພັກ ກອງຈໍາປາ ເຈົ້າເມືອງສິງ ໃຫ້ຮູ້ວ່າ: ຖ້າບໍ່ມີອັນປ່ຽນແປງ ຫລື ເກີດມີບັນຫາຫຍັງເກີດຂຶ້ນ ງົວຈຳນວນດັ່ງກ່າວຕ້ອງຖືກສົ່ງອອກໄປຈີນຢ່າງເປັນທາງການ. ໂຄງການສົ່ງເສີມການລ້ຽງງົວພັນຊີ້ນສົ່ງອອກໄປຈີນແມ່ນໂຄງການຮ່ວມມືຂອງຂວັນພິເສດທີ່ທ່ານ ສີ ຈິນຜິ້ງ ເລຂາທິການໃຫຍ່ ປະທານ ປະເທດຈີນ ແລະ ທ່ານ ບຸນຍັງ ວໍລະຈິດ ອະດີດເລຂາທິການໃຫຍ່ ປະທານປະເທດລາວ ໄດ້ຄົ້ນຄວ້າຄັດເລືອກເອົາເມືອງສິງເປັນບ່ອນຈັດຕັ້ງປະຕິບັດໂຄງການ, ມາຮອດວັນທີ 26 ມີນາ ລາວເຮົາໄດ້ນໍາເອົາງົວປະມານ 3.000 ໂຕເຂົ້າສູນກັກກັນຂອດສຸດທ້າຍ ນັບຖອຍຫຼັງອີກ 30 ວັນ, ຄາດວ່າໃນວັນທີ 27 ຫຼື 28 ເມສານີ້ ຈະສາມາດສົ່ງງົວອອກຈຳນວນດັ່ງກ່າວໄປຈີນ, ຈາກນັ້ນໃນແຕ່ລະປີລາວເຮົາຈະສົ່ງອອກງົວໃຫ້ຈີນປີລະ 500.000 ໂຕ ໂດຍອີງຕາມທ່າແຮງ ແລະ ຄວາມອາດສາມາດຂອງລາວ.
