ຮອງນາຍົກລັດຖະມົນຕີ ວູດຶກດາມ ຂອງຫວຽດນາມ ທົດລອງສັກວັກຊີນ ຂອງຫວຽດນາມຜະລິດເອງ

ສຳນັກຂ່າວສານ ຫວຽດນາມເນັດ ລາຍງານວັນທີ 26 ມີນານີ້ ວ່າ : ຢູ່ທີ່ໂຮງໝໍທະຫານຂອງຫວຽດນາມ ທ່ານຮອງນາຍົກລັດຖະມົນຕີ ວູດຶກດາມ ໄດ້ສັກວັກຊີນ Nanocovax ຂອງຫວຽດນາມຜະລິດເອງ ເປັນເຂັມທີ 2 ແລ້ວ, ພ້ອມກັນນັ້ນທ່ານຍັງໄດ້ໄປຖາມຂ່າວຄາວບັນດາອາສາສະໝັກອີກດ້ວຍ.

ຕອນເຊົ້າ 26 ມີນາ  ມີປະມານ 30 ພັນຄົນອາສາສະໝັກສືບຕໍ່ສັກທົດລອງວັກຊີນ Nanocovax ຂັ້ນຄລີນິກ ໄລຍະ 2 ເປັນເຂັມທີ 2. ຜູ້ທີ່ເຂົ້າຮ່ວມສັກທົດລອງ ແມ່ນມີຫຼາກຫຼາຍສໍ່າອາຍຸທີ່ແຕກຕ່າງກັນ, ໃນນັ້ນຜູ້ອາຍຸສູງທີ່ສຸດແມ່ນ 70 ປີ.

ທ່ານຮອງນາຍົກລັດຖະມົນຕີ ວູດຶກດາມ ໄດ້ສັກເປັນເຂັມທີ 2 ໄລຍະທີ 2 ຂອງການທົດລອງວັກຊີນ Nanocovax ຊຶ່ງກ່ອນໜ້ານັ້ນຄືວັນທີ 26 ກຸມພາ ທ່ານໄດ້ສັກເຂັມທຳອິດ ຂອງວັກຊີນດັ່ງກ່າວ.

ພາຍຫຼັງສັກແລ້ວ, ທ່ານໄດ້ໄປຖາມຂ່າວຄາວ ແລະ ລະດົມໃຫ້ກຳລັງໃຈຕໍ່ອາສາສະໝມັກ ຊື່ງທ່ານໄດ້ສະແດງຄວາມພາກພູມໃຈທີ່ໄດ້ປະກອບສ່ວນອາສາສະໝັກສັກທົດລອງ ເພື່ອຄົ້ນຄວ້າວັກຊີນໂຄວິດ-19 ຂອງຫວຽດນາມ.

ມີຄຳເຫັນຕໍ່ບັ້ນສັກທົດລອງເຂັມທີ 2  ໄລຍະທີ 2  ນີ້ ພົນໂທ ສາດສະດາຈານ ດອກເຕີ  ໂດກຽດ ຜູ້ອຳນວຍການໂຮງໝໍ ທະຫານ ໃຫ້ຮູ້ວ່າ ໃນເດືອນກັນຍາທີ່ຈະມາເຖິງນີ້ ອາດຈະມີວັກຊີນ ດັ່ງກ່າວຂາຍເປັນສິນຄ້າໄດ້.

ດ້ວຍຈັ່ງຫວະການຄົ້ນຄວ້າທີ່ທັນສະໃໝຄືແນວນີ້ ຄາດວ່າ ເດືອນເມສາ ຈະສຳເລັດການສັກທົດລອງເຂັມທີ 2 ໄລຍະທີ 2 ຂອງວັກຊີນດັ່ງກ່າວ, ເມື່ອເຖິງເດືອນ ມີຖຸນາ ຈະມີບົດລາຍງານກ່ຽວກັບຜົນຂອງການຄົ້ນຄວ້າຕໍ່ສະພາຄຸນສົມບັດຂອງກະຊວງສາທາລະນະສຸກ ເພື່ອສືບຕໍ່ທົດລອງໄລຍະທີ 3 ຕໍ່ໄປ.

ໄລຍະທີ 3 ຄາດວ່າຈະມີອາສາສະໝມັກສັກທົດລອງວັກຊີນ Nanocovax ປະມານ 10.000 ຄົນ. ທ່ານຜູ້ອຳນວຍການໂຮງໝໍທະຫານກ່າວເນັ້ນວ່າ “ຖ້າຫາກມີທ່າອ່ຽງທີ່ດີຄືປັດຈຸບັນ, ຂ້າພະເຈົ້າຄິດວ່າ ເມື່ອຮອດເດືອນກັນຍາທີ່ຈະມາເຖິງ ພວກເຮົາຈະມີຜະລິດຕະພັນວັກຊີນເປັນສິນຄ້າໄດ້, ພວກເຮົາມີຄວາມໝັ້ນໃຈວ່າຈະມີຜົນສຳເລັດຢ່າງແນ່ນອນ.”.