ມອບ-ຮັບ ເປັນທາງການແລ້ວ! ໂຄງການແສງສະຫວ່າງ ໃຈກາງນະຄອນຫລວງວຽງຈັນ

ພິທີມອບ-ຮັບໂຄງການແສງສະຫວ່າງເຂດເທສະບານໃຈກາງນະຄອນ ຫລວງວຽງຈັນ ດ້ວຍທຶນຊ່ວຍເຫລືອລ້າ ຈາກລັດຖະບານ ສປ ຈີນ ໄດ້ມີຂຶ້ນໃນວັນທີ 26 ມີນານີ້ ທີ່ສວນປະຕູໄຊ ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ, ທ່ານ ຈ່ຽງຈ້າຍຕົງ ເອກອັກຄະລັດຖະທູດຜູ້ມີອໍານາດເຕັມແຫ່ງ ສປ ຈີນ ປະຈໍາ ສປປ ລາວ.

ໃນພິທີ, ທ່ານ ຊົງເລົ່າ ຢົງນູ ຫົວໜ້າຄະນະຮັບຜິດຊອບໂຄງການຝ່າຍລາວໃຫ້ຮູ້ວ່າ: ໂຄງການຍົກລະດັບລະບົບໄຟຟ້າໃນນະຄອນຫລວງວຽງຈັນ ແມ່ນໂຄງການຫນຶ່ງທີ່ນອນຢູ່ໃນກອບສັນຍາວ່າດ້ວຍການຮ່ວມມືດ້ານເສດຖະ ກິດ ແລະ ເຕັກນິກ ລະຫວ່າງ ລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສປຈີນ ປະກອບມີ 3 ໜ້າວຽກຫລັກຄື: ຍົກລະດັບລະບົບໄຟຟ້າເຂດເທດສະບານ ແລະ ຊານເມືອງ ໃນນະຄອນຫລວງວຽງຈັນ ດ້ວຍການຍົກລະດັບ ລະບົບຕາຂ່າຍໄຟຟ້າແຮງດັນກາງ 22 ກິໂລວັດ, ແລະ ໝໍ້ແປງໄຟຟ້າ 22/0.4 ກິໂລວັດ; ປັບປຸງລະບົບນ້ຳພຸສວນປະຕູໄຊ; ແລະ ຍົກລະດັບໄຟຟ້າແສງສະຫວ່າງໄຟເຍືອງທາງ 7 ເສັ້ນທາງໃນເຂດເທດສະບານໃຈກາງຕົວເມືອງນະຄອນຫລວງວຽງຈັນ.

ສໍາລັບການປັບປຸງລະບົບນ້ຳພຸສວນປະຕູໄຊ ແລະ ປັບປຸງລະບົບແສງສະຫວ່າງໄຟເຍືອງທາງ 7 ເສັ້ນ ຢູ່ໃນເຂດໃຈກາງຕົວເມືອງນະຄອນຫລວງ ເລີ່ມລົງມືປະຕິບັດຕົວຈິງ ມາຕັ້ງແຕ່ວັນທີ 12 ກັນຍາ ເຖິງ ວັນທີ 27 ພະຈິກ 2020 ໃຊ້ເວລາພຽງ 2 ເດືອນ ກັບ 15 ວັນ ໄດ້ສໍາເລັດໂດຍພື້ນຖານດ້ານການກໍ່ສ້າງ-ຕິດຕັ້ງ ແລະ ສາມາດເປີດນຳໃຊ້ໄດ້ທັນຕາມກຳນົດເວລາທີ່ສອງພັກສອງລັດໄດ້ກໍານົດເອົາໂຄງການນີ້ເປັນຂອງຂວັນຈາກລັດຖະບານ ແລະ ປະຊາຊົນຈີນ ມອບໃຫ້ແກ່ລັດຖະບານ ແລະ ປະຊາຊົນລາວ ເພື່ອຂໍ່ານັບຊົມເຊີຍວັນຊາດທີ 2 ທັນວາ ວັນສະຖາປານາ ສປປລາວ ຄົບຮອບ 45 ປີ ແລະ ຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ.

ຈາກນັ້ນ, ທີມງານໄດ້ສືບຕໍ່ຈັດຕັ້ງປະຕິບັດໜ້າວຽກຈໍານວນໜຶ່ງທີ່ຍັງບໍ່ທັນສໍາເລັດ ເປັນຕົ້ນ: ການຟື້ນຟູ ທາງຍ່າງ, ການຕິດຕັ້ງລະບົບກ້ອງວົງຈອນປິດ ແລະ ຫ້ອງຄວບຄຸມລວມທັງລະບົບສັນຍານສົ່ງຂໍ້ມູນ, ໄດ້ສໍາເລັດ100% ບັນດາໜ້າວຽກທີ່ໄດ້ຈັດຕັ້ງປະຕິບັດລະອຽດມີດັ່ງນີ້: ການປັບປຸງລະບົບນ້ຳພຸຢູ່ສວນປະຕູໄຊ; ປ່ຽນລະບົບຫົວສີດນ້ຳພຸໃໝ່, ປໍ້ານໍ້າໃໝ່, ປ່ຽນກະໂລຂອບອ່າງໃໝ່ ແລະ ຍົກຂອບອ່າງໃຫ້ສູງຂຶ້ນຕື່ມທັງສອງອ່າງ; ຕິດຕັ້ງລະບົບຄວບຄຸມຫົວສີດນ້ຳພຸໃໝ່ທັງສອງອ່າງ; ໄດ້ອອກແບບລະບົບສີດນ້ຳພຸໃໝ່ທັງໝົດທີ່ປະກອບມີຫຼາຍຮູບແບບ ແລະ ຫຼາຍສີສັນນໍ້າບິນ ແລະ ນ້ຳເຕັ້ນທີ່ສວຍງາມປະສານກັບສຽງເພງ; ປ່ຽນລະບົບໄຟເຍືອງສວນ ແລະ ລະບົບຫົດນໍ້າສວນຫຍ້າຄືນໃໝ່.