ເຮືອສິນຄ້າກີດຂວາງຄອງສຸເອຊ ກະທົບໂລກແນວໃດ ?
ຈຸດເລີ່ມຕົ້ນວິກິດຂອງເຮືອ Ever Given
ເຫດເກີດເມື່ອວັນທີ 23 ມີນາ 2021 ເຮືອບັນທຸກນ້ຳມັນ Ever Given ກີດຂວາງຄອງສຸເອຊໃນອີຢິບ ຫລັງເດີນທາງອອກຈາກທ່າເຮືອໃນຈີນ ແລະ ກຳລັງມຸ້ງໜ້າສູ່ເນເທີແລນ.
ອົງການຄອງສຸເອຊ (SCA) ລະບຸເຖິງສາເຫດຂອງການ “ກີດຂວາງຄອງ” ຂອງ Ever Given ວ່າ: ຂະນະທີ່ເຮືອກຳລັງຂີ່ຜ່ານຄອງສຸເອຊເມື່ອວັນທີ 23 ມີນາ ເກີດພາຍຸຂີ້ຊາຍທີ່ມີຄວາມໄວລົມຫລາຍກວ່າ 74 ກິໂລແມັດຕໍ່ຊົ່ວໂມງ ແລະ ເຮັດໃຫ້ການແນມເຫັນຕໍ່າ ຈົນໃນທີ່ສຸດເຮືອໄດ້ສູນເສຍການຄວບຄຸມ ຫົວເຮືອປິ່ນເຂົ້າຝັ່ງບໍລິເວນກິໂລແມັດທີ 151 ໂດຍມີລຳເຮືອກີດຂວາງເສັ້ນທາງຂອງຄອງສຸເອຊໂດຍສົມບູນ, ສ່ວນລູກເຮືອທັງໝົດ 25 ຄົນຍັງຢູ່ໃນເຮືອນ ແລະ ປອດໄພດີ, ສ່ວນລຳເຮືອຍັງບໍ່ມີຄວາມເສຍຫາຍ.
ການກູ້ເຮືອ Ever Given ເປັນໄປຢ່າງຍາກລຳບາກ ເນື່ອງຈາກມີຄວາມຍາວກວ່າ 400 ແມັດ, ກວ້າງ 60 ແມັດ ສະເພາະລຳເຮືອມີນ້ຳໜັກເຖິງ 220.940 ໂຕນ.
ຂະນະເກີດເຫດ ເຮືອ Ever Given ບັນທຸກນ້ຳມັນດິບຫລາຍກວ່າ 870.000 ໂຕນ ແລະ ຜະລິດຕະພັນນ້ຳມັນກັ່ນສຳເລັດ 670.000 ກວ່າໂຕນ.
ທ່າມກາງການຄາດຄະເນວ່າຈະໃຊ້ເວລາເປັນອາທິດ, ປັດຈຸບັນທີມກູ້ເຮືອຈາກເນເທີແລນ ແລະ ຍີ່ປຸ່ນໄດ້ມີການເລັ່ງໃຊ້ເຮືອຂຸດຂີ້ຕົມ ແລະ ຂີ້ຊາຍ ລວມທັງເຮືອລາກຈຳນວນ 2 ລຳຕະຫລອດ 24 ຊົ່ວໂມງ ໂດຍແຜນຫລ້າສຸດຄືຈະຕ້ອງມີການຂຸດຂີ້ຊາຍໃຫ້ໄດ້ເຖິງ 20.000 ຄິວບິກແມັດ ເພື່ອເພີ່ມຄວາມເລິກຂອງຄອງສຸເອຊເປັນ 16 ແມັດ ລວມທັງຂົນສິນຄ້າລົງຈາກເຮືອເພື່ອຫລຸດນ້ຳໜັກ ເພື່ອໃຫ້ເຮືອສາມາດລອຍໄດ້ອີກ.
ຮູ້ຈັກຄອງສຸເອຊ ແຫລ່ງລາຍໄດ້ສຳຄັນຂອງອີຢິບໃນພື້ນທີ່ຂັດແຍ່ງ
ຄອງສຸເອຊຢູ່ປະເທດອີຢິບ ເປັນຄອງທີ່ຂຸດໂດຍຝີມືມະນຸດ ເພື່ອເຊື່ອມເສັ້ນທາງແລ່ນເຮືອລະຫວ່າງທະເລເມດິເຕເຣນຽນ ແລະ ມະຫາສະໝຸດອິນເດຍ, ເປີດນຳໃຊ້ຄັ້ງທຳອິດເມື່ອປີ 1869 ມີຄວາມກວ້າງ 91,44 ແມັດ, ຍາວ 193,3 ກິໂລແມັດ ໃຊ້ເວລາຂຸດເຖິງ 10 ປີ.
ນັບແຕ່ເປີດນຳໃຊ້ ຄອງສຸເອຊໄດ້ກາຍເປັນແຫລ່ງລາຍໄດ້ສຳຄັນຂອງປະເທດອີຢິບມາໂດຍຕະຫລອດ ຈາກການຕັດເສັ້ນທາງຜ່ານແຜ່ນດິນອີຢິບໂດຍກົງ. ເຮືອສິນຄ້າທີ່ຕ້ອງການເດີນທາງຈາກອາຊີໃຕ້ໄປເອີຣົບ ຈາກທີ່ຕ້ອງອ້ອມແຫລມກູ໊ດໂຮບຂອງແອຟຣິກາໃຕ້ອີກ 7.000 ກິໂລແມັດ ເຊິ່ງຈະໃຊ້ເວລາຂົນສົ່ງສິນຄ້າເພີ່ມເກືອບສອງອາທິດ ແລະ ສ່ຽງຕໍ່ການຂີ່ເຮືອຜ່ານກະແສນ້ຳທີ່ໄຫລແຮງ.
ໃນປີຜ່ານມາ ຄອງສຸເອຊສ້າງລາຍໄດ້ສູງເປັນອັນດັບ 3 ໃນປະຫວັດສາດຄື 5,61 ພັນລ້ານໂດລາສະຫະລັດ ຖືວ່າປະສົບຜົນສຳເລັດຕໍ່ເນື່ອງຈາກປີ 2019 ທີ່ສາມາດສ້າງລາຍໄດ້ເຖິງ 5,8 ພັນລ້ານໂດລາສະຫະລັດ ເຊິ່ງຖືເປັນສະຖິຕິສູງສຸດເປັນປະຫວັດສາດ.
ຄອງສຸເອຊເຄີຍຖືກປິດມາແລ້ວຫລາຍຄັ້ງ ເມື່ອວັນທີ 6 ພະຈິກ 2004 ເຄີຍມີເຫດການເຮືອບັນທຸກນ້ຳມັນ Tropical Brilliance ຂອງບໍລິສັດ Sovcomflot ຈາກຣັດເຊຍທີ່ພວງມະໄລຄວບຄຸມມີບັນຫາ ສົ່ງຜົນໃຫ້ Tropical Brilliance ກີດຂວາງການແລ່ນເຮືອໃນຄອງສຸເອຊ ກ່ອນຈະມີການຊ່ວຍເຫລືອໄດ້ສຳເລັດໃນວັນທີ 9 ພະຈິກ 2004 ດ້ວຍການໃຊ້ເຮືອລາກ ແລະ ຂົນສິນຄ້າລົງຈາກເຮືອເພື່ອລະບາຍນ້ຳໜັກ.
ນອກຈາກອຸປະຕິເຫດໃນປີ 1967 ຄອງສຸເອຊເຄີຍຖືກປິດເປັນເວລາເກືອບສິບປີໃນຊ່ວງສົງຄາມອາຣັບ ແລະ ອິສລາເອລ ໂດຍຄອງສຸເອຊທີ່ຢູ່ໃນພື້ນທີ່ແນວໜ້າຂອງການສູ້ຮົບລະຫວ່າງອິສຣາເອລ ແລະ ກອງທັບອີຢິບ ສົ່ງຜົນໃຫ້ເຮືອສິນຄ້າຈຳນວນ 14 ລຳຕ້ອງຈອດຖ້າຈົນຮອດປີ 1975 ກວ່າຄອງສຸເອຊຈະເປີດນຳໃຊ້ອີກ.
ນອກຈາກນີ້ ຍັງມີວິກິດການຄອງສຸເອຊທີ່ເກີດຂຶ້ນໃນປີ 1956 ເມື່ອອີຢິບຕໍ່ສູ້ເພື່ອສິດທິການຄອບຄອງຄອງສຸເອຊຄືນຈາກອັງກິດ ແລະ ຝຣັ່ງ ກ່ອນສະຫະປະຊາຊາດຈະມີມະຕິຕ່າງໆນຳໄປສູ່ການທີ່ອີຢິບກາຍເປັນຜູ້ຄອບຄອງສິດໃນຄອງສຸເອຊແຕ່ພຽງຜູ້ດຽວ.
ທຸກນາທີຄືຄວາມເສຍຫາຍ
ເຖິງວ່າຄອງສຸເອຊຈະມີການປິດຫລາຍຄັ້ງ ແຕ່ທຸກມື້ນີ້ຜ່ານໄປຫລາຍທົດສະວັດ ການຄ້າລະຫວ່າງເອີຣົບ ແລະ ອາຊີຂະຫຍາຍຕົວເພີ່ມຂຶ້ນ ແນ່ນອນວ່າຄວາມເສຍຫາຍທາງເສດຖະກິດຈະເພີ່ມຂຶ້ນໄປນຳ.
ປັດຈຸບັນ ຄອງສຸເອຊມີເຮືອສັນຈອນປີໜຶ່ງເປັນໝື່ນລຳ ຫລື ສະເລ່ຍມື້ລະກວ່າ 50 ລຳ ໃຊ້ຂົນສົ່ງນ້ຳມັນ 1,9 ລ້ານບາເຣລຕໍ່ວັນ ແລະ ສິນຄ້າ 6 ແສນໂຕນຕໍ່ວັນ ທຸກນາທີທີ່ຜ່ານໄປຄືຄວາມເສຍຫາຍທາງເສດຖະກິດທີ່ຄ່ອຍໆສະສົມ.
ຖ້າການກູ້ Ever Given ຍັງບໍ່ສຳເລັດໃນມໍ່ໆນີ້ ຫລາຍບໍລິສັດຕ້ອງປ່ຽນເສັ້ນທາງການຂົນສົ່ງສິນຄ້າໄປອ້ອມປາຍສຸດຂອງທະວີບແອຟຣິກາແທນ ເຊິ່ງແນ່ນອນວ່າຈະຕ້ອງກະທົບເຄືອຂ່າຍຊັບພາຍເຊັນທົ່ວໂລກ ໂດຍເວັບໄຊຂ່າວຊິບປິ້ງ Lloyd’s List ລາຍງານວ່າ: ໂດຍລວມແລ້ວການຂົນສົ່ງທີ່ຢຸດສະງັກອາດສ້າງຄວາມເສຍຫາຍປະມານ 9,6 ພັນລ້ານໂດລາຕໍ່ວັນ.
