ສະພາຕໍ່າຂອງລັດເຊຍ ຜ່ານຮ່າງກົດໝາຍ ເພື່ອຊ່ວຍໃຫ້ ປະທານາທິບໍດີ ວະລາດີເມຍ ປູຕີນ ໄດ້ຮັບການເລືອກຕັ້ງຄືນໃໝ່ ໃນສະໄໝໜ້າ
ສຳນັກຂ່າວ TASS ໃຫ້ຮູ້ວ່າ: ດູມາແຫ່ງຊາດ ຫຼື ສະພາຕໍ່າຂອງລັດເຊຍ ເມື່ອວັນທີ 24 ມີນານີ້ ໄດ້ຜ່ານຮ່າງກົດໝາຍວ່າດ້ວຍການອະນຸມັດໃຫ້ປະທານາທິບໍດີ ວະລາດີເມຍ ປູຕິນ ໄດ້ຮັບການລົງເລືອກຕັ້ງຄືນໃໝ່ ໃນສະໄໝໜ້າ.
ໂດຍອ້າງອີງຕາມການປັບປຸງບາງມາດຕາໃນລັດຖະທຳມະນູນຂອງລັດເຊຍ ສຳນັກຂ່າວ TASS ໃຫ້ຮູ້ວ່າ ໄດ້ກຳນົດວາລະດຳລົງຕຳແໜ່ງຂອງປະທານາທິບໍດີຄົນປັດຈຸບັນ ໂດຍບໍ່ມີຂອບເຂດ ຊຶ່ງບໍ່ຄິດໄລ່ຄືນສະໄໝກ່ອນໜ້ານີ້. ເມື່ອເປັນເຊັ່ນນັ້ນ ກໍເທົ່າກັບວ່າ ວະລາດີເມຍ ປູຕີນ ມີເງື່ອນໄຂພຽງພໍ ທີ່ຈະໄດ້ເປັນປະທານາທິບໍດີຕື່ມອີກ 2 ສະໄໝ.
ການປັບປຸງລັດຖະທຳມະນູນ ໄດ້ຮັບສຽງສະໜັບສະໜູນຈາກສະມາຊິກດູມາແຫ່ງຊາດ ທ່ານ Pavel Krashenninnikov ແລະ ທ່ານ Olga Sevastyanova ພ້ອມກັບສະມາຊິກສະພາແຫ່ງລັດ(ສະພາສູງ ຂອງລັດເຊຍ) ທ່ານ Andrei Klishas ນຳສະເໜີຕໍ່ສະພາຕໍ່າໃນເດືອນ ພະຈິກ 2020.
ການປັບປຸງດັ່ງກ່າວ ໄດ້ລະບຸໄວ້ຢ່າງຈະແຈ້ງວ່າ ພົນລະເມືອງລັດເຊຍ ອາຍຸແຕ່ 35 ປີຂຶ້ນເມືອ ແມ່ນມີເງື່ອນໄຂພຽງພໍລົງສະໝັກຮັບເລືອກຕັ້ງເປັນປະທານາທິບໍດີໄດ້ ແຕ່ດ້ວຍເງື່ອນໄຂວ່າ ເຂົາຕ້ອງເປັນຜູ້ທີ່ ກຳເນີດ ແລະ ດຳລົງຊີວິດຢູ່ໃນລັດເຊຍຢ່າງຕໍ່ເນື່ອງເປັນເວລາ 25 ປີ ແລະ ບໍ່ມີສັນຊາດອື່ນ ຫຼື ມີໃບອະນຸບາດໃຫ້ດຳລົງຊີວິດຢູ່ປະເທດອື່ນ.
ຄາດວ່າ ການດຳລົງຕຳແໜ່ງໃນສະໃໝນີ້ ຂອງ ປູຕິນ ຈະໝົດວາລະລົງໃນປີ 2024.
