ປິດການແລ່ນເຮືອຜ່ານຄອງສຸເອສຊົ່ວຄາວ ຫລັງເຮືອສິນຄ້າໃຫຍ່ຈອດກີດຂວາງ
ຄອງສຸເອສໃນອີຢິບ ເຊິ່ງເຊື່ອມລະຫວ່າງລະຫວ່າງທະເລແດງກັບທະເລເມດິເຕເຣນຽນ ແລະ ໃຊ້ແລ່ນເຮືອສິນຄ້າມານັບຮ້ອຍປີ ອາດຖືກປິດການຈະລາຈອນທາງນ້ຳຫລາຍອາທິດ ຫລັງເຮືອຂົນສົ່ງສິນຄ້າຂະໜາດໃຫຍ່ Ever Given ຂອງບໍລິສັດ Shoei kisen Kaisha ຂອງຍີ່ປຸ່ນ ຈອດຂວາງຢູ່ ເຊິ່ງຄາດວ່າອາດໃຊ້ເວລາກູ້ຫລາຍອາທິດ ໂດຍລາຍງານລະບຸວ່າ: ການປິດຄອງສຸເອສຄັ້ງນີ້ອາດກະທົບການຂົນສົ່ງສິນຄ້າມູນຄ່າ 10.000 ລ້ານໂດລາສະຫະລັດຕໍ່ວັນ.
ເຮືອ Ever Given ເຊິ່ງປັກທຸງສັນຊາດປານາມາ ມີນ້ຳໜັກ 224.000 ໂຕນ ແລະ ມີຂະໜາດກວ້າງ 59 ແມັດ ເຊິ່ງສື່ບາງສຳນັກນຳໄປປຽບທຽບວ່າໃຫຍ່ກວ່າຕຶກເອັມໄພຣເຕດໃນນິວຢອກ ເຊິ່ງສາເຫດທີ່ເກີດເຫດການບໍ່ຄາດຝັນນີ້ຂຶ້ນນັ້ນ ທາງການອີຢິບທີ່ເບິ່ງແຍງຄອງສຸເອສເປີດເຜີຍໃນວັນທີ 24 ມີນາວ່າ: ເປັນເພາະລົມທີ່ພັດແຮງ ບວກກັບພາຍຸຂີ້ຊາຍທີ່ເຮັດໃຫ້ການແນມເຫັນຕໍ່າ.
ຜົນຈາກການປິດເສັ້ນທາງຈະລາຈອນທາງນ້ຳໃນຄອງສຸເອສ ເຮັດໃຫ້ຫລາຍບໍລິສັດພິຈາລະນາປ່ຽນເສັ້ນທາງການຂົນສົ່ງສິນຄ້າ ໂດຍອາດໃຫ້ອ້ອມປາຍສຸດຂອງແອຟຣິກາແທນ ເຊິ່ງເປັນເສັ້ນທາງທີ່ໄກກວ່າ ແລະ ກະທົບເຄືອຂ່າຍຊັບພາຍເຊັນທົ່ວໂລກ.
ສຳລັບຄອງສຸເອສມີຄວາມກວ້າງ 91,44 ແມັດ, ຍາວ 193,3 ກິໂລແມັດ ໃຊ້ເວລາຂຸດ 10 ປີ ແລະ ຂຸດສຳເລັດເມື່ອປີ 1869 ປັດຈຸບັນມີເຮືອສັນຈອນມື້ລະ 50 ກວ່າລຳ ໃຊ້ຂົນສົ່ງນ້ຳມັນ 1,9 ລ້ານບາເຣລຕໍ່ວັນ ແລະ ສິນຄ້າ 544 ລ້ານກິໂລກຣາມຕໍ່ວັນ.
ອ້າງອີງ:
https://www.channelnewsasia.com/…/suez-canal-ever-given…
https://www.foxbusiness.com/markets/suez-canal-blocked-weeks
https://edition.cnn.com/…/suez-canal…/index.html
