ສະເຫລີມສະຫລອງວັນປະຊາກອນໂລກປີ 2017
ໃນວັນທີ 11 ກໍລະກົດນີ້, ກະຊວງແຜນການ ແລະ ການລົງທຶນຮ່ວມກັບກະຊວງສາທາລະນະສຸກ ແລະ ອົງການສະຫະປະຊາຊາດກອງທຶນປະຊາກອນ (UNFPA) ໄດ້ຈັດພິທີສະເຫລີມສະຫລອງວັນປະຊາກອນໂລກປະຈໍາປີ 2017 ພາຍໃຕ້ຫົວຫົວຂໍ້: “ການວາງແຜນຄອບຄົວໃນໄວໜຸ່ມແມ່ນການສ້າງຄວາມເຂັ້ມແຂງໃຫ້ແກ່ປະຊາຊົນເພື່ອການພັດທະນາປະເທດຊາດ” ຂຶ້ນທີ່ກະຊວງແຜນການ ແລະການລົງທຶນ, ໂດຍການເປັນປະທານຂອງທ່ານ ຄໍາລຽນ ພົນເສນາ ຮອງລັດຖະມົນຕີກະຊວງແຜນການ ແລະ ການລົງທຶນ, ມີຕາງໜ້າຈາກກະຊວງ, ທູຕານຸທູດ ແລະ ຄູ່ຮ່ວມພັດທະນາເຂົ້າຮ່ວມ.
ກອງທຶນດັ່ງກ່າວ ໃຫ້ຮູ້ວ່າ: ປັດຈຸບັນຈໍານວນປະຊາກອນໂລກໄດ້ເພີ່ມຂຶ້ນເຖິງ 7,6 ຕື້ຄົນ, ການເພີ່ມຂຶ້ນດັ່ງກ່າວຊີ້ໃຫ້ເຫັນວ່າປະຊາກອນໂລກ ພວມປະເຊີນກັບສິ່ງທ້າທາຍຫລາຍດ້ານ ທີ່ທຸກປະເທດ ແລະ ສາກົນຕ້ອງໄດ້ເອົາໃຈໃສ່ແກ້ໄຂຢ່າງຈິງຈັງ.
ຮອງລັດຖະມົນຕີກະຊວງແຜນການ ແລະ ການລົງທຶນ ກວ່າວ່າ: ແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII (2016-2020) ໄດ້ກໍານົດກ່ຽວກັບແຜນໂຄສະນາຂົນຂວາຍຊຸມຊົນໃຫ້ເຂົ້າໃຈເຖິງບັນຫາສໍາ ຂອງການຮັກສາສຸຂະພາບ, ຂໍ້ມູນຂ່າວສານ ແລະ ການບໍລິການສຸຂະພາບຈະເລີນພັນ ແລະ ການວາງແຜນຄອບຄົວ, ວຽກງານສຸຂະອະນາໄມ ພ້ອມທັງສະໜອງນໍ້າສະອາດໃນເຂດຕົວເມືອງ ແລະ ຊົນນະບົດ. ພ້ອມດຽວກັນນັ້ນເພື່ອໃຫ້ສອດຄ່ອງເປົ້າໝາຍການພັດທະນາແບບຢືນຢົງ SDGs ຂອງສາກົນທີ່ອົງການສະຫະປະຊາຊາດໄດ້ວາງອອກ, ສະນັ້ນ ລັດຖະບານລາວ ກໍຄືກະຊວງແຜນການ ແລະ ການລົງທຶນ ກໍໄດ້ມີການເຊື່ອມສານເອົາເປົ້າໝາຍການພັດທະນາແບບຢືນຢົງ SDG 3 ເຂົ້າໃນແຜນພັດທະນາເສດຖະກິດ-ສັງຄົມຊາດ 5 ປີ.
ຕາມການຄົ້ນຄວ້າທາງດ້ານວິຊາການເຫັນວ່າ: ຖ້າມີການວາງແຜນຄອບຄົວແຕ່ຫົວທີ ແລະ ທົ່ວເຖິງຈະຊ່ວຍປະກອບສ່ວນໃນການຫລຸດຜ່ອນອັດຕາການຕາຍຂອງແມ່ໄດ້ເຖິງ 44% ແລະ ຫລຸດຜ່ອນຄວາມສ່ຽງອັດຕາການຕາຍຂອງເດັກໄດ້ 20% ທັງສາມາດຫລຸດຜ່ອນອັດຕາການຖືພາແບບບໍ່ຕັ້ງໃຈ ແລະ ຮັກສາໄລຍະຫ່າງຂອງການຖືພາ ຫລື ການມີລູກຖີ່.
ສປປ ລາວ ແມ່ນໜຶ່ງໃນ 69 ປະເທດ ທີ່ຈັດຢູ່ໃນກຸ່ມປະເທດທີ່ກໍາລັງພັດທະນາທີ່ກໍາລັງປະເຊີນກັບບັນຫາໄວໜຸ່ມບໍ່ສາມາດປ້ອງກັນການຖືພາໄດ້ດີ ເນື່ອງຈາກການຂາດຂໍ້ມູນຂ່າວສານ ແລະ ບໍ່ສາມາດເຂົ້າເຖິງບັນດາກຸ່ມຄົນຊົນເຜົ່າ ແລະ ຊຸມຊົນຢູ່ເຂດຫ່າງໄກສອກຫລີກໄດ້.
ຮອງຫົວໜ້າກົມອະນາໄມ ແລະ ສົ່ງເສີມສຸຂະພາບກະຊວງສາທາລະນະສຸກ ກ່າວວ່າ: ວຽກງານການວາງແຜນຄອບຄົວແມ່ນເຊື່ອມໂຍງກັບຫລາຍແຜນງານ ເຊັ່ນ: ຍຸດທະສາດແຫ່ງການບໍລິຫານເຊື່ອມສານສຸຂະພາບຈະເລີນພັນແມ່ ແລະ ເດັກນ້ອຍເກີດໃຫມ່ ແລະ ເດັກ (RMNCH) ແຕ່ປີ(2016-2025) ຊຶ່ງໃນນັ້ນລວມເອົາຈຸດປະສົງສະເພາະກ່ຽວກັບການວາງແຜນຄອບຄົວ, ໂດຍເອົາໃຈໃສ່ການບໍລິການແກ່ໄວໜຸ່ມ ແລະ ຄໍາໝັ້ນສັນຍາຂອງ ສປປ ລາວ ຕໍ່ກັບການວາງແຜນຄອບຄົວ (FP 2020 ) ຊຶ່ງໄດ້ຮັບຮອງໃນປີ 2016 ຜ່ານມາ.
