ຄວາມລັບ ວັກຊີນໂຄວິດ-19 ຂອງ ລັດເຊຍ ແລະ ຈີນ
ໜັງສືພິມ South China Morning Post, ໃຫ້ຮູ້ວ່າ ຈົນເຖິງຂະນະນີ້, ຈີນໄດ້ຊ່ວຍເຫຼືອວັກຊີນ ໃຫ້ກັບ 69 ປະເທດ ແລະ ສົ່ງອອກໄປຍັງ 28 ປະເທດ. ເຖິງແມ່ນວ່າ ພວກເອີຣົບຈະບໍ່ຮັບຮູ້ວັກຊີນ ຊີໂນຟາມ ແລະ ຊີໂນແວັກ ຂອງຈີນກໍຕາມ ອັນເນື່ອງຈາກວ່າ ຈີນບໍ່ໄດ້ເປີດເຜີຍຜົນການທົດລອງຂັ້ນຄລີນິກທີ 3 ແຕ່ກໍມີຫຼາຍປະເທດໃນເຂດຕາເວັນອອກ ແລະ ກາງຂອງເອີຣົບນຳໃຊ້ວັກຊີນຂອງຈີນ ອັນເນື່ອງມາຈາກການສະໜອງວັກຊີນຂອງບໍລິສັດການຢາ ຂອງພວກຕາເວັນຕົກຕອບສະໜອງໃຫ້ບໍ່ທ່ວງທັນ.
ນັກຂ່າວຈາກສຳນັກ Berlingske ຂອງເດນມາກປະຈຳຢູ່ລັດເຊຍ ແລະ ຈີນໃຫ້ຮູ້ວ່າ ເຖິງແມ່ນວ່າ 2 ປະເທດນີ້ ຈະສົ່ງອອກວັກຊີນເປັນຈຳນວນຫຼວງຫຼາຍໃຫ້ຕ່າງປະເທດກໍຕາມ ແຕ່ ອັດສ່ວນຂອງປະຊາຊົນໃນສອງປະເທດນີ້ໄດ້ຮັບການສັກວັກຊີນ ຊໍ້າພັດຕໍ່າກວ່າປະເທດອື່ນທີ່ຮັບວັກຊີນວັກຈາກປະພວກເຂົາ.
ຂໍ້ມູນເປີດເຜີຍໃນທ້າຍເດືອນກຸມພາທີ່ຜ່ານມາ ໃຫ້ຮູ້ວ່າ ລັດເຊຍໄດ້ສົ່ງວັກຊີນ ສປຸດນິກ V, 4 ລ້ານໂດສໃຫ້ກັບ 17 ປະເທດໃນໂລກ ແລະ ຮັກສາໄວ້ພຽງແຕ່ 6 ລ້ານໂດສ. ແຜນຂອງ ມອສໂກ ຄາດວ່າໃນຕົ້ນປີນີ້ ຈະສັກວັກຊີນໂຄວິດ-19 ໃຫ້ປະຊາຊົນໃນໄຕມາດທີໜຶ່ງ ແລະ ເມື່ອເຖິງທ້າຍເດືອນ ມີຖຸນາ 2021 ນີ້ ຈະໃຫ້ໄດ້ 60% ຂອງຜູ້ໃຫ່ຍຊາວລັດເຊຍ(65 ລ້ານຄົນ). ແຕ່ຜູ້ຊ່ຽວຊານໃຫ້ການສັງເກດວ່າ ຖ້າຫາກຍັງຢູ່ໃນລະດັບປັດຈຸບັນ ລັດເຊຍຈະປະຕິບັດຄາດໝາຍດັ່ງກ່າວນັ້ນໄດ້ໃນທ້າຍປີ 2022.
ສ່ວນຈີນວາງຄາດໝາຍວ່າ ຈະສັກວັກຊີນໃຫ້ໄດ້ 40% ຂອງພົນລະເມືອງ 1,4 ຕື້ຄົນ ເມື່ອຮອດເດືອນມີຖູນາ. ວິທະຍຸໂທລະທັດ CGTN ຂອງຈີນໃຫ້ຮູ້ວ່າ ປັກກິງຈະສົ່ງອອກວັກຊີນໄປຕ່າງປະເທດໃຫ້ໄດ້ 463 ລ້ານໂດສ ແລະ ຫຼາຍກວ່າ 46 ລ້ານໂດສ ທີ່ສົ່ງອອກໄປແລ້ວ.
ຄາດວ່າ ຈີນ ມີກຳລັງການຜະລິດທັງໝົດ 3,6 ຕື້ ໂດສ ໃນທ້າຍປີນີ້ ແຕ່ບໍ່ຮູ້ວ່າຈີນຈະສາມາດຕອບສະໜອງໄດ້ບໍ ເພາະໃນຂະນະນີ້ບຣາຊີລ, ແລະ ຕວກກີ ກ່າວວ່າ ຈີນສົ່ງວັກຊີນບໍ່ໄດ້ຕາມແຜນ.
