ມາເລເຊຍຈັບຕ່າງປະເທດ 77 ຄົນ ຈາກການກວາດລ້າງແຮງງານເຖື່ອນ
ເຈົ້າໜ້າທີ່ມາເລເຊຍບຸກວດຄົ້ນສະຖານທີ່ກໍ່ສ້າງແຫ່ງໜຶ່ງ ແລະ ຄວບຄຸມຕົວຄົນຕ່າງປະເທດ 77 ຄົນ ຕາມພາລະກິດປາບປາມແຮງງານຜິດກົດໝາຍ.
ເຈົ້າໜ້າທີ່ກວດຄົນເຂົ້າເມືອງມາເລເຊຍ ກ່າວວ່າ: ຄົນຕ່າງປະເທດກວ່າ 3.000 ຄົນ ແລະ ພະນັກງານ 63 ຄົນທີ່ຈ້າງແຮງງານເຖື່ອນຖືກຄວບຄຸມໄວ້ນັບແຕ່ເລີ່ມປະຕິບັດການກວາດລ້າງແຮງງານຜິດກົດໝາຍມາແຕ່ວັນທີ 1 ກໍລະກົດ ໂດຍມີເປົ້າໝາຍແມ່ນແຮງງານຕ່າງປະເທດທີ່ເຂົ້າມາປະເທດໂດຍຜິດກົດໝາຍ ເພື່ອມາຫາເຮັດວຽກງານທຳໃນອາຊີບທີ່ມີຄ່າຕອບແທນຕໍ່າຕາມສະຖານທີ່ກໍ່ສ້າງ, ເຮັດສວນ ແລະ ຂະແໜງບໍລິການຂອງມາເລເຊຍ. ມາເລເຊຍເປັນໜຶ່ງໃນປະເທດຮັ່ງມີຂອງອາຊີຕາເວັນອອກສຽງໃຕ້ ຈຶ່ງເປັນແຫລ່ງດຶງດູດແຮງງານຈາກອິນໂດເນເຊຍ, ຟີລິບປິນ, ບັງກະລາເທດ ແລະ ອິນເດຍ. ເຈົ້າໜ້າທີ່ກວດຄົນເຂົ້າເມືອງ ເຊິ່ງອອກປະຕິບັດການກວາດລ້າງແຮງງານເຖື່ອນໃນວັນທີ 11 ແລະ 12 ກໍລະກົດ ຢູ່ສະຖານທີ່ກໍ່ສ້າງໃນລັດເນກຣີເຊມບີລັນ ທາງພາກເໜືອພົບວ່າ: ແຮງງານ 77 ຄົນຈາກຈຳນວນ 85 ຄົນໃນບ່ອນກໍ່ສ້າງ ບໍ່ມີເອກະສານຮັບຮອງການເຮັດວຽກຕາມກົດໝາຍ ແລະ ສ່ວນຫລາຍເປັນຄົນອິນໂດເນເຊຍ.
