ການພົບປະທີ່ຈະເປັນການມ້າງ ພູເຂົານໍ້າແຂງ ລະຫວ່າງສະຫະລັດ ແລະ ຈີນ

ລາຍງານຂ່າວຕ່າງປະເທດ ເມື່ອວັນທີ 19 ມີນານີ້ ໃຫ້ຮູ້ວ່າ ເຈົ້າໜ້າທີ່ລະດັບສູງຂອງສະຫະລັດ ແລະ ຂອງຈີນ ຈະພົບປະກັນໂດຍກົງແບບເຊິ່ງໜ້າໃນທ້າຍອາທິດນີ້ ຢູ່ທີ່ເມືອງ Anchorage ນັບຕັ້ງແຕ່ ໄບເດັນເຂົ້າຮັບຕຳແໜ່ງປະທານາທິບໍດີ ແຕ່ເດືອນມັງກອນເປັນຕົ້ນມາ.

ທ່ານ ເຢືອງຄຽດຈີ(Duong Khiet Tri) ຫົວໜ້າຫ້ອງການພົວພັນຕ່າງປະເທດຂອງສູນກາງພັກ ແລະ ທ່ານ ຫວັງອີ້ ລັດຖະມົນຕີການຕ່າງປະເທດຈີນ ຈະຕາງໜ້າໃຫ້ຄະນະຜູ້ແທນຝ່າຍຈີນ. ສ່ວນຝ່າຍ ສະຫະລັດ ແມ່ນທ່ານລັດຖະມົນຕີການຕ່າງປະເທດ Antony Blinken ແລະ ທີ່ປຶກສາດ້ານຄວາມໝັ້ນຄົງແຫ່ງຊາດ Jake Sullivan.

ນີ້ຖືໄດ້ວ່າເປັນການພົບປະຄັ້ງທຳອິດແບບ 2+2 ນັບແຕ່ມື້ ທ່ານ ເຢືອງຄຽດຈີ ພົບປະກັບລັດຖະມົນຕີການຕ່າງປະເທດສະໃໝຂອງອະດີດປະທານາທິບໍດີ ໂດນັລທຣຳ  Mike Pompeo ຢູ່ທີ ຮາວາຍ ໃນເດືອນມີຖຸນາ 2020. ການພົບປະຄັ້ງນັ້ນແກ່ຍາວເປັນເວລາ 7 ຊົ່ວໂມງ ແຕ່ໃນທີ່ສຸດກໍກາຍເປັນສູນເປົ່າ ເພາະທັງສອງຝ່າຍບໍ່ໂລ່ງລອຍກັນກັບຫຼາຍບັນຫາ ໃນນັ້ນມີບັນຫາການລະບາດຂອງພະຍາດໂຄວິດ-19 , ບັນຫາຂອງ ຮົງກົງ, ບັນຫາເສດຖະກິດ ແລະ ການຄ້າ.