ນັກວິທະຍາສາດ ມີແຜນສ້າງອຸມົງບັນຈຸ ອາສຸຈິ, ແນວພັນ ຢູ່ເທິງດວງຈັນ ເພື່ອປ້ອງກັນ ການ “ອາວະສານ” ຂອງໜ່ວຍໂລກ
ກຸ່ມນັກວິທະຍາສາດ 6 ຄົນ ຈາກມະຫາວິທະຍາໄລ Arizona ຂອງສະຫະລັດ, ໄດ້ສະເໜີແນວຄວາມຄິດ ສ້າງອຸມົງ ຢູ່ເທິງດວງຈັນ ເພື່ອບັນຈຸ ອາສຸຈິ, ແນວພັນ ເພື່ອຫຼີກລ່ຽງກໍລະນີສູນພັນ ຈາກການອາວະສານຂອງໜ່ວຍໂລກ, ໂດຍຈະມີປະມານ 6,7 ລ້ານຊະນິດພັນຈາກບົນໜ້າໂລກຂຶ້ນໄປໄວ້ໃນດວງຈັນ ດ້ວຍຍານອຳວະກາດ. ແນວພັນທັງໝົດຈະຖືກບັນຈຸໄວ້ໃນອຸມົງຢູ່ເທິງດວງຈັນ.
ກຸ່ມນັກວິທະຍາສາດຂ້າງເທິງ ອະທິບາຍວ່າ ແນວຄວາມຄິດດັ່ງກ່າວ ຈະຊ່ວຍໃຫ້ການຟື້ນຟູແນວພັນບົນໜ້າໂລກໄດ້ ໃນກໍລະນີຫາກເກີດມະຫັນຕະໄພຮ້າຍແຮງເກີດຂຶ້ນກັບໜ່ວຍໂລກເຊັ່ນ: ເກີດພະຍາດລະບາດເຮັດໃຫ້ມະນຸດ ແລະ ສັດນານາຊະນິດສູນພັນ, ພູໄຟເກີດໄໝ້ທຳລາຍຜິວໂລກ, ສົງຄາມປະລະມະນູເຜົາຜ່ານ, ໄພແຫ້ງແລ້ງ ຮ້າຍແຮງເກີດຂຶ້ນ, ໜ່ວຍໂລກອື່ນມາຕຳເອົາກັບໜ່ວຍໂລກພວກເຮົາ…
ເຖິງແມ່ນແນວຄວາມຄິດດັ່ງກ່າວເບິ່ງຄືວ່າເປັນຄວາມໄຝ່ຝັນ ແຕ່ການເອົາອາສຸຈິ, ໄຂ່, ມົດລູກ, ແກ່ນພັນ, ຊະນິດພັນຕ່າງໆ ປະມານ 6,7 ລ້ານຊະນິດນັ້ນແຊ່ແຂງ ແລ້ວນຳເອົາຂຶ້ນເມືອໄວ້ໃນດວງຈັນ ແມ່ນສາມາດເປັນໄປໄດ້ທັງນັ້ນ.
