ເປັນຫຍັງຈຶ່ງລືມບໍ່ໄດ້ ? ມາເບິ່ງສາເຫດທີ່ເຮັດໃຫ້ທ່ານຍັງຕິດຕາມຄົນຮັກເກົ່າຢູ່

ຫາກຈະບອກວ່າໂລກອອນລາຍແມ່ນສ່ວນສຳຄັນຂອງຊີວິດມະນຸດກໍຄົງບໍ່ຜິດປານໃດ ນັບແຕ່ມືນຕາຕື່ນຂຶ້ນມາໄປຮອດກ່ອນນອນ ທຸກຄົນຕ້ອງເຂົ້າໄປໂພສເລົ່າຂ່າວສານ ແລະ ເລື່ອງລາວຂອງຕົນເອງຜ່ານ Facebook ຫລື IG ຍິ່ງຫາກໃຜທີ່ຫາກໍເລີກລາກັບຄົນຮັກເກົ່າ ກໍມັກຈະຕ້ອງເຂົ້າໄປສ່ອງໂລກອອນລາຍຂອງເຂົາມື້ລະຫລາຍໆຮອບ ຫລາຍຄົນຄົງຢາກຮູ້ວ່າຍ້ອນຫຍັງ ເປັນຫຍັງແມ່ຍິງເຫລົ່ານັ້ນຈຶ່ງບໍ່ສາມາດກ້າວໄປຂ້າງໜ້າໄດ້ ມາເບິ່ງເຫດຜົນພ້ອມໆກັນເລີຍ.

1. ຢາກຮູ້ຊີວິດຂອງຄົນຮັກເກົ່າ : ເຖິງວ່າຈະເລີກລາກັນໄປແລ້ວ ແຕ່ກໍບໍ່ໄດ້ໝາຍຄວາມວ່າແມ່ຍິງຈະຕັດຄັນຮັກເກົ່າອອກຈາກວົງຈອນຊີວິດໄດ້ໃນທັນທີ ພວກນາງລ້ວນແຕ່ຢາກຮູ້ວ່າເຂົານັ້ນສະບາຍດີຫລືບໍ່, ຊີວິດໃນໄລຍະນີ້ພົບພໍ້ກັບບັນຫາໃດແດ່ ແລະ ປະການສຳຄັນກໍຄື “ຕິດຕາມວ່າຄົນຮັກເກົ່າມີການໂພສຫຍັງທີ່ສື່ເຖິງຕົນເອງຫລືບໍ່” ຫລື ໃນກໍລະນີທີ່ຈົບກັນແບບບໍ່ດີ ຝ່າຍຍິງກໍລໍຖ້າເບິ່ງວ່າຝ່າຍຊາຍຊີວິດຈະຂີ້ຮ້າຍລົງຫລືບໍ່, ເສຍໃຈກັບສິ່ງທີ່ເກີດຂຶ້ນຫລືບໍ່ ເຊິ່ງການທີ່ຢາກຮູ້ຊີວິດຂອງຄົນຮັກເກົ່າບໍ່ໄດ້ໝາຍຄວາມວ່າຍັງຮັກຢູ່, ແຕ່ພຽງຢູ່ຮູ້ຄວາມເປັນໄປຕາມພາສາຄົນທີ່ເຄີຍຮັກກັນ ແລະ ເຄີຍມີໄລຍະເວລາຊີວິດດີໆນຳກັນເທົ່ານັ້ນ.
2. ຢາກເຫັນແຟນໃໝ່ຂອງຄົນຮັກເກົ່າວ່າເປັນແນວໃດ : ເມື່ອເລີກລາກັນໄປ ບໍ່ແປກທີ່ຄົນຮັກເກົ່າຂອງທ່ານຈະໄປພົບພໍ້ກັບຄົນຮັກໃໝ່ ເຊິ່ງແມ່ຍິງສ່ວນຫລາຍມັກຈະຈັບຈ້ອງວ່າແຟນໃໝ່ຂອງຄົນຮັກເກົ່ານັ້ນເປັນແນວໃດ, ງາມເທົ່າຕົນເອງຫລືບໍ່, ເຮັດວຽກຫຍັງ, ມີບຸກຄະລິກແນວໃດ ຖືເປັນການແຂ່ງຂັນເລັກໆນ້ອຍໆທີ່ມີກັນໃນສັນຊາດຕະຍານເພດຍິງທຸກຄົນ ເຊິ່ງນອກຈາກຈະໝັ່ນຕິດຕາມເບິ່ງແຟນໃໝ່ຂອງຄົນຮັກເກົ່າແລ້ວ ບາງຄົນຍັງເຖິງຂັ້ນນຳໄປສ່ອງເຟສບຸກຂອງສາວຄົນໃໝ່ນຳອີກ.
3. ຕັດໃຈບໍ່ໄດ້ : ນີ້ແມ່ນຄວາມຈິງທີ່ຫລາຍຄົນນັ້ນລ້ວນແຕ່ປະສົບພົບພໍ້ ເຖິງຈະເລີກລາກັນໄປແລ້ວ ແຕ່ຍັງມີຄວາມຮັກໃຫ້ກັບເຂົາຢູ່ ໂດຍທີ່ຮູ້ວ່າຄວາມຮັກເທື່ອນີ້ບໍ່ມີມື້ກັບຄືນມາອີກແລ້ວ ບາງຄົນຂໍພຽງແຕ່ຕິດຕາມເພື່ອເບິ່ງວ່າເຂົາຍັງສະບາຍດີຢູ່ບໍ່, ແຕ່ຫາກເຫັນວ່າເຂົາກ້າວໄປຂ້າງໜ້າໄດ້ ແລະ ມີຄົນຮັກໃໝ່ກໍເສຍໃຈ ເຊິ່ງຫາກທ່ານຍັງຕັດໃຈບໍ່ໄດ້ ແລະ ຕາມໃຈຕົນເອງໂດຍການສ່ອງເຟສບຸກຄົນຮັກເກົ່າຢູ່ແບບນີ້ ຄົງເກີດຜົນເສຍຫລາຍກ່ວາຜົນດີຢ່າງແນ່ນອນ, ປ່ອຍໃຫ້ເຂົາໄປມີຊີວິດຂອງເຂົາ. ສ່ວນທ່ານເອງກໍຫັນກັບມາເບິ່ງແຍງດູແລຕົນເອງ, ຮັກຕົນເອງ, ເລີ່ມຕົ້ນຍ່າງເທິງເສັ້ນທາງສາຍໃໝ່ຈະດີກ່ວາ.

ຫາກທ່ານເປັນຄົນໜຶ່ງທີ່ຍັງຈອບຕິດຕາມເຟສບຸກ ຫລື ໂລກອອນລາຍອື່ນໆຂອງຄົນຮັກເກົ່າ ລອງຖາມຕົນເອງວ່າເບິ່ງແລ້ວມີປະໂຫຍດແນວໃດກັບຊີວິດແດ່, ເຮັດໃຫ້ຮູ້ສຶກດີຂຶ້ນ ຫລື ຂີ້ຮ້າຍລົງແນວໃດ ຫາກບໍ່ເກີດປະໂຫຍດຫຍັງ ເບິ່ງໄປແລ້ວຮູ້ສຶກບໍ່ດີລົງກ່ວາເກົ່າ ກໍເຖິງເວລາທີ່ແລ້ວທີ່ຈະຕ້ອງຍົກເລີກການຕິດຕາມ ຫລື ຈະບລັອກໄປເລີຍກໍໄດ້ ບໍ່ດັ່ງນັ້ນທ່ານຄົງບໍ່ມີມື້ລືມເຂົາ ແລະ ກ້າວໄປຂ້າງໜ້າໄດ້.