ລົມໂທລະສັບຍາມຂັບຂີ່ ຈະໄດ້ເປັນໝູ່ກັບຜີ

ໂດຍ: ມຶກບໍ່ແຫ້ງ

ເຊື່ອວ່າ ທ່ານຜູ້ອ່ານເຄີຍປະສົບພົບພໍ້ ຜູ້ຄົນຈຳນວນຫຼາຍທີ່ ລົມໂທລະສັບ ໃນຂະນະຂັບຂີ່ຕາມທ້ອງຖະໜົນ ເຊິ່ງເປັນອັນຕະລາຍຕໍ່ ຜູ້ອື່ນແລະຕົນເອງ.

ອັດຕາການເກີດປຸບັດຕິເຫດຢູ່ ປະເທດເຮົານັ້ນ ນັບມື້ນັບຫຼາຍຂຶ້ນ ເຊິ່ງສ້າງຄວາມເສຍຫາຍຕໍ່ຊີວິດ ແລະ ຊັບສິນບໍ່ໜ້ອຍໃນແຕ່ລະປີ, ໂດຍສະເລ່ຍແລ້ວ ຄົນລາວເສຍຊີວິດຈາກການເກີດອຸບັດຕິເຫດມື້ລະ 3 ຄົນ ແລະ ບາດເຈັບຈຳນວນຫຼວງຫຼາຍ.

ໃນນັ້ນ ທີ່ພວກເຮົາເຫັນວ່າ ມີຄວາມສ່ຽງຫຼາຍ ຕໍ່ການເກີດ ອຸບັດຕິເຫດ ກໍແມ່ນຄວາມປະມາດ, ມັກງ່າຍ ເຊິ່ງ ມີຫຼາຍຄົນລະເຫຼີງ ຄືການລົມໂທລະສັບ ໃນເວລາຂັບຂີ່. ໜ້າເປັນຫ່ວງຫຼາຍທີ່ສຸດ ເມື່ອເຫັນຜູ້ຄົນ ໂດຍສະເພາະ ໄວໜຸ່ມທີ່ມີອະນາຄົດຍາວໄກນັ້ນ ຫຼິ້ນໂທລະສັບ ໃນຂະນະຂັບຂີ່ລົດຈັກ, ມືໜຶ່ງ ຈັບເຂົາລົດ ອີກມືໜຶ່ງ ເຄ່ຍໂທລະສັບ ຫຼື ລົມໂທລະສັບ ເຊິ່ງເພີ່ມຄວາມສ່ຽງ ຕໍ່ການເກີດອຸບັດຕິເຫດຕໍ່ຕົນເອງ ແລະ ຜູ້ອື່ນຢ່າງຍິ່ງ.

ກໍລະນີ ດັ່ງກ່າວ ແມ່ນກຳລັງ ເຫັນຫຼາຍທີ່ສຸດ. ພ້ອມນັ້ນ ກໍມີ ຜູ້ຂັບຂີ່ລົດໃຫຍ່ ທີ່ເກີດອຸບັດຕິເຫດ ຍ້ອນການ ໃຊ້ໂທລະສັບ ຍາມຂັບຂີ່ ຫຼາຍກໍລະນີມາແລ້ວ ແຕ່ປານນັ້ນ ກໍບໍ່ສາມາດ ສ້າງສະຕິໃຫ້ແກ່ ຜູ້ຄົນຈຳນວນໜຶ່ງ ທີ່ບໍ່ເອົາຫົວໃສ່ໃຈຊາ ຕໍ່ຄວາມປອດໄພເທີງທ້ອງຖະໜົນນີ້.

ເມື່ອສາເຫດການເກີດອຸບັດຕິເຫດທີ່ມີຫຼາຍຢູ່ແລ້ວ ເຊັ່ນ ການຂັບຂີ່ລົດໄວເກີດຂອບເຂດ, ການດື່ນສິ່ງມືນເມົາ, ການລະເມີດລະບຽບການຈາຈະຈອນຕ່າງໆ  ບວກໃສ່ການ ລົມໂທລະສັບ ໃນຂະນະຂັບຂີ່ນັ້ນ ກໍຍິ່ງ ເຮັດໃຫ້ ການຂັບຂີ່ເທີງທ້ອງຖະໜົນພວກເຮົາມີໄພອັນຕະລາຍເພີ່ມຕື່ມ.

ເພາະສະນັ້ນ, ການລົມໂທລະສັບ ຍາມຂັບຂີ່ ຄວນໄດ້ຮັບການຄວບຄຸມ ແລະ ໃສ່ລະບຽບ ເມື່ອພົບເຫັນ ເພາະສິ່ງດັ່ງກ່າວ ເພີ່ມຄວາມສ່ຽງຕໍ່ການເກີດອຸບັດຕິເຫດ ຕໍ່ຕົນເອງ ແລະ ຜູ້ອື່ນ.

ຫຼາຍປະເທດທີ່ ຈະເລີນໄດ້ນຳເອົາການຫຼຸດຜ່ອນການນຳໃຊ້ ໂທລະສັບ ໃນເວລາຂັບຂີ່ ເຂົ້າໃນຫຼັກສູດການຮຽນ-ການສອນ ເພື່ອສ້າງຈິດສຳນຶກໃຫ້ນັກຂັບຂີ່ມີສະຕິລະວັງຕົວຫຼາຍຂຶ້ນ, ຮັບປະກັນ ການຂັບຂີ່ປອດໄພ ເຊັ່ນ ປະເທດສະວີເດັນ, ແລະ ທັງດຳເນີນການທາງກົດໝາຍ ຫາກຜູ້ໃດ ຂັບຂີ່ ທີ່ຂາດຄວາມລະມັດລະວັງ ຫຼື ເຮັດໃຫ້ ຕົນເອງ ແລະ ຜູ້ອື່ນຕົກໃນຄວາມສ່ຽງ ຕໍ່ອຸບັດຕິເຫດ.

ແລະ ມາຮອດປັດຈຸບັນ ຫຼາຍບໍລິສັດເອກະຊົນ ຢູ່ຫຼາຍປະເທດ ໄດ້ພັດທະນາ ເທັກໂນໂລຊີ ໂດຍສະເພາະ ແອບພຣີເຄເຊີນ (application) ຂອງໂທລະສັບ ທີ່ປ້ອງກັນບໍ່ໃຫ້ ຜູ້ຂັບຂີ່ ສາມາດນຳໃຊ້ ໂທລະສັບ ຂອງຕົນໄດ້ໃນເວລາຂັບຂີ່ ເພື່ອຮັບປະກັນຄວາມປອດໄພ ແຕ່ ເທັກໂນໂລຊີ ດັ່ງກ່າວ ຍັງຢູ່ໃນຊ່ວງການທົດລອງນຳໃຊ້.

ເມື່ອ 15 ປີກ່ອນ (2005) ທີ່ຜູ້ຂຽນໄດ້ ມີໂອກາດ ໄປທັດສະນະສຶກສາ ຢູ່ປະເທດຍີ່ປຸ່ນ ເຊິ່ງຕອນນັ້ນ ຢູ່ ສປປລາວເຮົາ ກໍຄືຫຼາຍປະເທດ ການນຳໃຊ້ ໂທລະສັບ ມືຖື ໂດຍສະເພາະ ສະມາດໂຟນ ຍັງບໍ່ຫຼາຍເທື່ອ ແຕ່ ຢູ່ ຍີ່ປຸ່ນການນຳໃຊ້ໂທລະສັບມືຖື ໃນເວລານັ້ນ ແມ່ນເປັນທີ່ແຜ່ຫຼາຍແລ້ວ, ສິ່ງໜຶ່ງທີ່ຕິດໃນມະໂນພາບ ຂອງຜູ້ຂຽນບໍ່ລືມກໍຄື ໃນເວລາ ພວກເຮົາຄົນລາວ 6 ຄົນ ຂີ່ລົດໂດຍສານ ຂະໜາດ 10 ບ່ອນນັ່ງນັ້ນ, ກໍໄດ້ຍິນສຽງໂທລະສັບ ຂອງຊູເຟີລົດນັ້ນ ດັ່ງຂຶ້ນ ເຊິ່ງພວກເຮົາ ກໍໃຫ້ສັນຍານລາວວ່າ ມີຄົນໂທເຂົ້າໂທລະສັບຂອງລາວ ແຕ່ ຊູເຟີຄົນ ດັ່ງກ່າວ ປະຕິເສດທັນທີ ເຊິ່ງເຮັດໃຫ້ພວກເຮົາຮູ້ວ່າ ການນັບຖືລະບຽບ ແລະໃຫ້ຄວາມປອດໄພ ຕໍ່ຜູ້ໂດຍສານ ແລະຕົນເອງນັ້ນ ຖືເປັນ ບູລິມະສິດ ອັນດັບໜຶ່ງ ເຖິງວ່າຈະມີເລື່ອງດ່ວນປານໃດກໍຕາມ ອັນນີ້ ຍັງມີໜ້ອຍຢູ່ ປະເທດເຮົາ.

ສະນັ້ນ, ຄຳແນະນຳ ທີ່ດີ ຈາກ ເຄືອຂ່າຍໂທລະສັບ ຍັກໃຫຍ່ ຈີເອັມເສ (GMS) ກໍມີວ່າ: 1- ປະຕິບັດ ລະບຽບກົດໝາຍ ເພາະບາງປະເທດ ຫ້າມເດັດຂາດ ບໍ່ໃຫ້ຜູ້ຂັບຂີ່ໃຊ້ໂທລະສັບ ຍາມຂັບຂີ່, 2- ຂັບຂີ່ປອດໄພ- ຫ້າມໃຊ້ ໂທລະສັບ ໂດຍສະເພາະ ໃນເວລາການ ສັນຈອນຕິດຄັດ ຫຼື ມີຄວາມຫຍຸ້ງຍາກ, 3- ຫ້າມພີມ ຫຼື ອ່ານຂໍ້ຄວາມ ຈາກໂທລະສັບ ແລະອຸປະກອນໃດໆໃນຍາມຂັບຂີ່ ແລະ 4- ຫຼີກລ່ຽງການລົມສາຍ ທີ່ດົນນານ ແລະມີເນື້ອໃນທີ່ມີຄວາມຮູ້ສຶກ ກະທົບຈິດໃຈ ທີ່ເຮັດໃຫ້ ຜູ້ຂັບຂີ່ ຂາດສະຕິໄດ້.

ເພາະສະນັ້ນ, ຫວັງວ່າ ພວກເຮົາຈະເຫັນມາດຕະການ ເດັດໆ ຢູ່ປະເທດເຮົາ ເພື່ອຄວບຄຸມຜູ້ກ້າ ທ້າຄວາມອັນຕະລາຍ ທັງຫຼາຍ ຈາກການນຳໃຊ້ໂທລະສັບ ຍາມຂັບຂີ່ໃນໄວໆນີ້.