ປີ 2021 ປກສ ນະຄອນຫລວງສຸມໃສ່ 7 ໜ້າວຽກເພື່ອແກ້ໄຂບັນຫາຕ່າງໆໃນສັງຄົມ

ທ່ານ ທ່ານ ພັອ ສຸກພະຈັນ ບຸດດາຄຳ ຫົວໜ້າກອງບັນຊາການ ປກສ ນວ ເນັ້ນໜັກຕໍ່ກອງປະຊຸມສະຫຼຸບວຽກງານປະຈຳປີ 2020 ແລະ ວາງທິດທາງແຜນການ 2021 ຂອງຫ້ອງຕຳຫຼວດ ປກສ ນວ, ເມື່ອກາງເດືອນ ກຸມພາ 2021 ຜ່ານມານີ້,  ໄດ້ສຸມກຳລັງຕຳຫຼວດ ປກສ ນວ ຕ້ອງສ້າງໃຫ້ໄດ້ການຫັນປ່ຽນໃໝ່ໂດຍສຸມໃສ່7 ໜ້າວຽກດັ່ງນີ້:

1. ຮັກສາຄວາມເປັນລະບຽບຮຽບຮ້ອຍຂອງສັງຄົມ ສຸມໃສ່ວຽກງານແນວຄິດ ໃຫ້ຫຼາຍຂຶ້ນກວ່າເກົ່າ, ມີຄວາມຕື່ນຕົວໃນທິດທາງທີ່ດີຂຶ້ ແລະເຮັດສຳເລັດໜ້າທີ່ການເມືອງ.
2. ປັບປຸງແບບແຜນການຊີ້ນຳບັນຊາໃຫ້ເປັນລະບົບ ເຮັດໃຫ້ການຊີ້ນຳ-ບັນຊາໂລ່ງລ່ຽນ ຕາມສາຍວິຊາສະເພາະແຕ່ກົມໃຫຍ່ຕຳຫຼວດລົງຮອດກອງວິຊາສະເພາະ ຂອງພະແນກຕຳຫຼວດເມືອງ, ບັນຫາສຳຄັນ ຕ້ອງມີການຊີ້ນຳຢ່າງເປັນເອກະພາບ.
3. ປັບປຸງການເຄື່ອນໄຫວເຮັດໜ້າທີ່ວິຊາສະເພາະໃຫ້ມີການຫັນປ່ຽນໃໝ່, ແກ້ໄຂຮີດເກົ່າຄອງເດີມ, ຈຳກັດບັນດາຊ່ອງວ່າງຢູ່ແຕ່ລະຂັ້ນຕອນຂອງການດຳເນີນວຽກງານ. ໃນນີ້, ໃຫ້ກຳນົດອອກບົດແນະນຳ, ຄູ່ມືກຳນົດຂັ້ນຕອນ, ວິທີການເຄື່ອນໄຫວແຕ່ລະວຽກໃຫ້ຈະແຈ້ງ, ກຳນົດຕົວຊີ້ວັດ ຂອງແຕ່ລະຂົງເຂດວຽກ ໃຫ້ສອດຄ່ອງກັບຂໍ້ຕົກລົງຂອງເຈົ້າຄອງ ນວ ແລະຄາດໝາຍແຕ່ລະແຜນງານໂຄງການ ຂອງກະຊວງ ປກສ.
4. ສຸມໃສ່ແກ້ໄຂບັນດາປາກົດການຫຍໍ້ທໍ້ທີ່ພົ້ນເດັ່ນ 7 ອັນ ທີ່ມະຕິກອງປະຊຸມໃຫຍ່ຄັ້ງທີ່ VII ອົງຄະນະພັກນະຄອນຫຼວງວຽງຈັນກຳນົດ ແລະບັນຫາອື່ນໆອີກທີ່ປະກົດຂຶ້ນໃຫ້ຫຼຸດລົງ 5-10% ໃນປີ 2021, ຢາກແກ້ໄຂໄດ້ ລະດົມກຳລັງຕຳຫຼວດ, ປະສານສົມທົບຢ່າງກົມກຽວ ແລະ ປະກອບສ່ວນຢ່າງຕັ້ງໜ້າ. ໃຫ້ສ້າງແຜນການທີ່ລະອຽດ, ຈະແຈ້ງເຊິ່ງກຳນົດຈຸດປະສົງ, ຄາດໝາຍ, ໜ້າວຽກ, ຄວາມຮັບຜິດຊອບ ຂອງແຕ່ລະພາກສ່ວນ, ມາດຕະການແກ້ໄຂແຕ່ລະກໍລະນີບົນພື້ນຖານລະບຽບກົດໝາຍ. ຢາກສ້າງແຜນການແກ້ໄຂທີ່ມີຄຸນນະພາບດີ ກໍ່ຕໍ່ເມື່ອ ຄົ້ນຄວ້າຊອກໃຫ້ເຫັນໄດ້ທີ່ໄປທີ່ມາ, ເງື່ອນໄຂ, ສາເຫດ ຂອງບັນຫາໃຫ້ຊັດເຈນເທົ່າທີ່ສາມາດເຮັດໄດ້.
5. ຍົກສູງຄຸນນະພາບວຽກງານຂອງຕົນໂດຍນຳໃຊ້ວິທະຍາສາດ, ເຕັກໂນໂລຊີເຂົ້າ ໃນການເຄື່ອນໄຫວວຽກງານ, ສ້າງໃຫ້ໄດ້ວິຊາການທີ່ເປັນມືອາຊີບໃນການເຮັດວຽກງານບໍລິການຮັບໃຊ້ປະຊາຊົນ ແລະວຽກງານສະກັດກັ້ນ ແລະແກ້ໄຂອາຊະຍາກຳຕ່າງໆ. ຢາກເຮັດໄດ້ຕ້ອງຮູ້ລະດົມຂົນຂວາຍແນວຄວາມຄິດໂດຍຜ່ານການສຳມະນາວິທະຍາສາດ.
6. ແກ້ໄຂບັນດາປາກົດການຫຍໍ້ທໍ້ ທີ່ມີຢູ່ພາຍໃນກຳລັງເຮົາໃຫ້ໝົດໄປ ເພື່ອກຳຈັດບໍ່ໃຫ້ເກີດມີຫາງສຽງວິພາກວິຈານຂອງສັງຄົມ ແລະການຕຳນິສົ່ງຂ່າວ ຂອງຂັ້ນເທິງ ໃນວຽກງານບໍລິການສັງຄົມ, ການດຳເນີນການສືບສວນ-ສອບສວນຄະດີ.
7. ຂໍໃຫ້ຄະນະບັນຊາທຸກຂັ້ນ, ນາຍ ແລະ ພົນຕຳຫຼວດຢູ່ໃນທຸກເຫຼົ່າວິຊາສະເພາະເພີ່ມທະວີຄວາມສາມັກຄີເປັນເອກະພາບພາຍໃນໃຫ້ດີ, ທຸກສະຫາຍ ພ້ອມພຽງຮຽງໜ້າກັນສ້າງກຳລັງ ປກສ ນວ ໃຫ້ມີຄວາມເຂັ້ມແຂງ, ກາຍເປັນຕົວແບບ.