ຈີນຈະອອກ ວີຊາ ໃຫ້ງ່າຍຂຶ້ນຕໍ່ຊາວ ຟີລິບປິນ ທີ່ສັກວັກຊີນຂອງຈີນ

ສຳນັກຂ່າວຕ່າງປະເທດ ລາຍງານເມື່ອວັນທີ 15 ມີນານີ້ວ່າ ສະຖານທູດຈີນທີ່ປະເທດ ຟີລິບປິນ ປະກາດວ່າ ຈະອອກ ວີຊາ ໃຫ້ກັບຊາວຟີລີບປິນໄວຂຶ້ນ, ງ່າຍຂຶ້ນ ຖ້າຫາກສັກວັກຊີນຂອງຈີນ ແຕ່ບໍ່ໄດ້ລະບຸເຖິງຜູ້ທີ່ສັກວັກຊີນຊະນິດອື່ນແຕ່ຢ່າງໃດ.

ຈີນໄດ້ມີການເຄື່ອນໄຫວຫຼາຍຢ່າງກ່ຽວກັບວັກຊີນຂອງຕົນ ເພື່ອຍົກສູງຖານະບົດບາດຂອງຕົນຢູ່ໃນ ອາຊີ ແລະ ໃນໂລກ ນັບທັງການໃຫ້ວັກຊີນຕ້ານໂຄວິດ-19 ຕໍ່ຜູ້ທີ່ເຂົ້າຮ່ວມງານມະຫາກຳກີລາ ໂອລີມປິກທີ່ ໂຕກຽວໃນປີນີ້ ແລະ ງານມະຫາກຳກີລາລະດູໜາວທີ່ປັກກິງໃນປີ 2022 ອີກດ້ວຍ.

ວັກຊີນ CoronaVac  ຜະລິດໂດຍບໍລິສັດ Sinovac Biotech ເປັນໜຶ່ງໃນ 3 ຊະນິດວັກຊີນຕ້ານໂຄວິດ-19 ທີ່ທາງການຟີລິບປິນ ອະນຸຍາດໃຫ້ນຳໃຊ້ແບບສຸກເສີນໃນປະເທດ.

ຟີລິບປິນເລີ່ມສັກວັກຊີນຕ້ານໂຄວິດ-19 ແຕ່ວັນທີ 1 ມີນາເປັນຕົ້ນມາ ໂດຍວັກຊີນ CoronaVac ຂອງລັດຖະບານຈີນສົ່ງໃຫ້ຈຳນວນ 600.000 ໂດສ.