ເມືອງນາແລ ເປີດຂະບວນການວັກຊີນກັນພະຍາດ COVID-19 ໃຫ້ກຸ່ມທີ່ມີຄວາມສ່ຽງສູງຮອບທີ 1

ເມືອງນາແລ ແຂວງຫລວງນໍ້າທາ ເປີດຂະບວນການວັກຊີນກັນພະຍາດ COVID-19 ໃຫ້ກຸ່ມທີ່ມີຄວາມສ່ຽງສູງຮອບທີ 1, ໃນວັນທີ 10-15 ມີນານີ້ ທີ່ໂຮງໝໍເມືອງ, ໂດຍການເຂົ້າຮ່ວມຂອງ ທ່ານ ບຸນປີ ໄລປະເສີດ  ເຈົ້າເມືອງນາແລ.

ຕາມການຕົກລົງເຫັນດີເປັນເອກະພາບຂອງຄະນະສະເພາະກິດຂັ້ນເມືອງ  ເຊິ່ງກຸ່ມທີ່ມີຄວາມສ່ຽງສູງທີ່ໄດ້ຮັບການໃຫ້ບໍລິການໃຫ້ວັກຊີນໂຄວິດ-19 ແມ່ນຜູ້ທີ່ມີອາຍຸ 18-59 ປີ, ມີສຸຂະພາບແຂງແຮງດີ,ພະນັກງານແພດໝໍ, ຄະນະສະເພາະກິດຂັ້ນເມືອງ, ພະນັກງານປະຈຳດ່ານປະເພນີ,ພະນັກງານສູນກັກກັນ, ການນໍາພັກ-ລັດ, ປກຊ, ປກສ, ພະນັກງານລັດຖະກອນ, ພະນັກງານໂຮງແຮມ, ເຮືອນພັກ, ຮ້ານອາຫານ,ພະນັກງານທະນາຄານ ແລະ ປະຊາຊົນຜູ້ທີ່ມີຄວາມສ່ຽງສູງໃນທົ່ວເມືອງ.

ເຊິ່ງເມືອງນາແລ ໄດ້ຮັບວັກຊີນຊີໂນຟາມ ຈາກ ສປ ຈີນ   ທັງໝົດ 550 ໂດສ  ມີຜູ້ຮັບການໃຫ້ບໍລິການທັງໝົດ 516  ຄົນ  ໃນການໃຫ້ວັກຊີນກັນພະຍາດໂຄວິດ-19  ໃຫ້ກຸ່ມທີ່ມີຄວາມສ່ຽງສູງຮອບທີ 1 ນີ້ ທາງແພດໝໍ ກໍໄດ້ກວດເຊັກສຸຂະພາບ ແລະ ໃຫ້ຄຳແນະນໍາ ກັບຜູ້ທີ່ຈະຮັບການບໍລິການວັກຊິນເປັນຢ່າງດີ ທັງກ່ອນຮັບວັກຊີນ ແລະ ຫລັງຮັບວັກຊີນ ໃນການປະຕິບັດຕາມເງື່ອນໄຂ ແລະ ຂໍ້ຫ້າມຕ່າງໆ  ເພື່ອໃຫ້ໄດ້ຮັບຜົນດີໃນຕໍ່ໜ້າ ສຳລັບໂດສ ທີ 2 ແມ່ນຈະເລີ່ມໃຫ້ບໍລິການອີກໃນ ວັນທີ 6-10 ເມສາ 2021.