ນະຄອນຫລວງເປີດຂະບວນການ ສັກວັກຊີນກັນໂຄວິດ-19 ເຂັມທຳອິດ
ໃນວັນທີ 12 ມີນາ 2021 ພະແນກສາທາລະນະສຸກ ນະຄອນຫລວງວຽງຈັນ ໄດ້ເປີດຂະບວນການສັກວັກຊີນກັນພະຍາດໂຄວິດ-19 ເຂັມທຳອິດໃຫ້ບຸກຄົນທົ່ວໄປ ແລະ ບຸກຄົນທີ່ມີຄວາມສ່ຽງສູງ ທົ່ວນະຄອນຫລວງວຽງຈັນຢ່າງເປັນທາງການ ຢູ່ໂຮງໝໍຊຸມຊົນ ເມືອງຈັນທະບູລີ ນະຄອນ ຫລວງວຽງຈັນ.
ທ່ານ ນາງ ໄຊພອນ ນັນທະພອນ ຫົວໜ້າພະແນກສາທາລະນະສຸກ ນະຄອນຫລວງວຽງຈັນ ລາຍງານໃຫ້ຮູ້ວ່າ: ການສັກວັກຊີນໃນຄັ້ງນີ້, ທົ່ວນະຄອນຫລວງວຽງຈັນ ໄດ້ເລີມຈັດຕັ້ງປະຕິບັດແຕ່ວັນທີ 9 ມີນາ 2021 ເປັນຕົ້ນມາ ຢູ່ບັນດາເມືອງຕ່າງໆ ແລະ ຄາດວ່າ ຈະໃຫ້ສຳເລັດສັກວັກຊີນ ເຂັມທຳອິດ ໃນວັນທີ 20 ມີນາ 2021, ສ່ວນເຂັມທີ່ສອງ ແມ່ນຫ່າງຈາກເຂັມທຳອິດ 28 ມື້ (ທຸກຄົນຕ້ອງໄດ້ກັບມາສັກອີກ) ເຊິ່ງກຸ່ມເປົ້າໝາຍແມ່ນບຸກຄົນທົ່ວໄປທີ່ມີອາແຕ່ 18-60 ປີ, ລວມເຖິງ ບຸກຄົນ ທີ່ມີຄວາມສ່ຽງສູງ ກໍຄື ພະນັກງານແພດໝໍ, ຜູ້ທີ່ເຮັດວຽກຢູ່ສູນກັກກັນ ແລະ ເຮັດວຽກຢູ່ຕາມຊາຍແດນ, ຕາມດ່ານເຂົ້າ-ອອກຕ່າງໆ ໃນຂອບເຂດທົ່ວປະເທດ ຕະຫລອດຮອດພະນັກງານ ທະຫານ, ຕຳຫລວດ, ພະນັກງານ-ລັດຖະກອນ.
ສຳລັບເງື່ອນໄຂຂອງຜູ້ທີ່ຈະໄດ້ຮັບວັກຊີນ ຕ້ອງເປັນຜູ້ທີ່ມີຄວາມສະໝັກໃຈ, ມີສຸຂະພາບແຂງ ແຮງ, ບໍ່ມີພະຍາດ ຫລື ໂລກປະຈຳຕົວ ແລະ ອື່ນໆ. ພາຍຫລັງໄດ້ຮັບວັກຊີນແລ້ວ ແມ່ນບໍ່ໃຫ້ດື່ມສິ່ງຂອງມືນເມົາ (ເຫລົ້າ, ເບຍ) ແລະ ອາຫານທີ່ມີລົດຊາດເຜັດເຄັມ.
ທ່ານນາງ ໄຊພອນ ນັນທະພອນ ໃຫ້ຮູ້ອີກວ່າ: ວັກແຊງທີ່ນຳມາສັກໃນຄັ້ງນີ້, ແມ່ນໄດ້ຮັບການຊ່ວຍເຫລືອ ຈາກ ສປ ຈີນ ຈຳນວນ 3 ແສນໂດສ໌ໃນທົ່ວປະເທດ, ໃນນັ້ນນະຄອນຫລວງວຽງຈັນ ໄດ້ຮັບ 58 ພັນກວ່າໂດສ໌.
